2 Corintios 5
5
1Yachankichikmi, sichum purmaruq wasi hinalla kay cuerponchik chinkaruptinqa Diosmi hanaq pachapi wiña-wiñaypaq wasita ruwapuwachkanchik, chayqa manam runapa makinwan ruwasqachu. 2Kay pachapiraq kaspaqa maynatam munanchik hanaq pachapi kaq wasinchikmanta otaq musoq pachawan hina churakunanchikmanta. 3Chaypi kaspaqa pachayuqmi kasunchik, manam qalallañachu. 4Kay wasillanchikpiraq otaq cuerpollanchikpiraq kawsaspaqa ancha llakisqam kachkanchik, ichaqa pachanchik llatanarachikuytaqa manachá munachwanchu, aswanqa pachapasqa kaytam munachwanqa, chaynapi wañuyta kawsay vencerunanpaq. 5Kayna kanapaq ruwawaqninchikqa Diosmi, paymi garantiata hina Chuya Espirituta qowarqanchik.
6Chaynapim confiakuspa kawsachkanchik, yachanchikmi aycha cuerpopi kawsananchikkamaqa, manaraqmi Señorwan kuskachu kachkanchik. 7Iñiyllawanmi kawsachkanchik, manam ñawinchikpa qawasqanwanchu. 8Ichaqa confiakuspam kachkanchik, maynatachá munachwan cuerponchikta saqeruspa Señorwanña kawsakuyta. 9Chayraykum wañuspapas kawsaspapas Señorpa munasqan ruwayta munanchik. 10#Ro 14.10.Ichaqa llapallanchikmi Cristopa qayllanman rikurinanchik, chaynapi kay pachapi kawsaspa allinpas otaq mana allinpas ruwasqanchikman hina tocaqninchikta sapakama chaskinanchikpaq.
Dioswan allinyanakuymanta
11Chaymi Señorqa kasukuna kasqanta yachasqaykurayku runakunata iñichiypi riniku. Ichaqa Diosmi yachan imaynam kasqaykutapas, chaymi qamkunapas reqsiwanaykikuta munachkaniku. 12Manam huktawanchu kikillaykumanta alabakuchkaniku, kaykunataqa rimapayachkaykiku huktawan ñoqaykumanta kusikunaykichikpaqmi hinaspa hawallanta qawaspa alabakuqkunata kutipakunaykichikpaqmi. Paykunaqa manam sonqonkupi kaqwanchu alabakunku. 13Loco hinapas kaniku Diospaqmi, yuyayniyuqpas kaniku qamkunapaqtaqmi. 14Cristopa kuyakuyninmi ñoqanchikpi munaychakun, llapallanchikpa rantinchikpi Cristopa wañusqanta yachaspaqa, yachanchiktaqmi wañusqa hinaña kasqanchikta. 15Cristoqa llapallanchikpaqmi wañurqa, chaynapi kawsaqkunapas manaña kikillanchikpaq kawsaspa Cristopaqña kawsananchikpaq, payqa wañukuspanmi kawsarimurqa. 16Kunanmantaqa manam pimantapas aychaman hinañachu piensaniku, ñawpaqtam ichaqa Cristomantapas aychaman hinalla piensarqaniku, kunanqa manañam chaynatachu piensaniku. 17Chaynaqa, pipas Cristopi kaqqa musoq runañam, ñawpaq kaqkunaqa pasarunñam, kunanqa lliwmi musoqña.
18Tukuy kaykunaqa Diosmantam hamun. Paymi Jesucristopa ruwasqallanwan kikinwan allinyanachiwanchik hinaspam kamachiwanchik runakunata paywan allinyanachinanchikpaq. 19Diosmi Cristopi kachkarqa kay pachapi runakunata mana huchayuqpaqña hapispa kikinwan allinyanachinanpaq. Paymi kamachiwarqanchik allinyanakuymanta willakunanchikpaq. 20Chaynaqa, Cristopa rantinpi willakunaykupaq churasqam kaniku, Diosmi ñoqaykutakama qamkunaman rimapayasunkichik. Cristopa sutinpim ruegakuykiku Dioswan allinyanakunaykichikpaq. 21Cristoqa manam huchallikurqachu, ichaqa ñoqanchikraykum huchanchikkunata Dios qepiykachirqa, chaynapi Cristowan huklla kaspanchik Diospa munasqanman hinaña kawsananchikpaq.
Currently Selected:
2 Corintios 5: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
