1 Corintios 7
7
Casarakuymanta consejokuna
1Kay tapumuwasqaykichiktam contestamuykichik, allinchá kanman runapa mana casarakuyninqa. 2Ichaqa mana huchaman wichinanpaqmi sapakama warmiyuq otaq qosayuqpas kananku. 3Qosaqa imam debernintam warminwan cumplinan, chaynataqmi warmipas imam debernintam qosanwan cumplinan. 4Warmipa cuerponqa manam kikinpañachu aswanqa qosanpañam, qosapa cuerponpas manataqmi kikinpañachu aswanqa warminpañam. 5Warmikichikwan otaq qosaykichikwan kaytaqa ama neganakuychikchu, negaspaqa neganakuychik as punchawkunallapaq iskaynikichik tanteanakuspa, chaynapi Diosta mañakunaykichikpaq tiempoykichik kananpaq, chaymantaqa kaqllayá kakuychik, yanqañataqmi mana aguantayta atiptikichik Satanás huchaman wichiykachisunkichikman.
6Kaykunataqa nikichik consejaspaymi, manam kamachikuyta hinachu. 7Ñoqaqa munaymanmi llapallankupas ñoqa hina kanankuta, ichaqa Diosmi sapakamaman atiyta qon, wakinmanmi qon casado kananpaq, wakinmanñataq soltero kananpaq.
8Solterokunapaqwan viudakunapaqmi ichaqa allin kanman mana casarakuspa ñoqa hina kayninku. 9Sichum mana aguantayta atispaqa casarakuchunyá, huknin-huknin munapayaymantaqa casarakuymi aswan allinqa.
10Casado kaqkunatam ichaqa kamachini, warmiqa amayá qosanmantaqa rakikuchunchu. Kay kamachikuyqa manam ñoqapachu aswanqa Señorpam. 11#Mt 5.32; 19.9; Mr 10.11-12; Lc 16.18.Rakikuruspanqa amataqyá hukwanqa casarakuchunchu, mana chayqa qosanwan amistachun. Qosanpas amataqyá warmintaqa saqechunchu.
12Wakinkunatam ichaqa ñoqa nini, manam Señorchu, hukkaq wawqepa warmin Diospi mana iñiq kanqa, ichaqa paywan hawka yachakunqa, hinaptinqa amayá saqechunchu. 13Chaynataq hukkaq warmipa qosan Diospi mana iñiq kanqa, ichaqa paywan hawka kawsakunqa, hinaptinqa amayá saqechunchu. 14Diospi mana iñiq qosaqa, Diospi iñiq warminraykum Diospaq sapaqchasqa, chaynataqmi Diospi mana iñiq warmipas Diospi iñiq qosanrayku Diospaq sapaqchasqa. Mana chayna kaptinqa wawa-churinkunachá Diospi mana iñiqkunapa churinkuna hina kanman, chaynapim Diospaq sapaqchasqaña kachkanku. 15Diospi mana iñiq qari otaq warmi rakikuyta munaspaqa rakikuchunyá, chaynapiqa wawqepas panipas libreñam. Diosqa qayawarqanchik hawkayaymanmi. 16Yaw warmi, ¿yaqachu qosaykita salvaruwaq? Yaw qari, ¿yaqachu warmikita salvaruwaq?.
17Imayna kaspapas sapakamam Señorpa qosqanman hina kawsanan hinaspa sapakamata Diospa qayasqanman hina, chaynatam llapa iñiqkunaman kamachini. 18Pitapas judío hina qari kayninkupi señalasqata Dios qayaptinqa amayá chaywanqa hukmanyachunchu, mana señalasqata qayaptinqa amataqyá señalachikuchunchu. 19Manam imananchu señalasqa otaq mana señalasqa kayninchikpas, Diospa kamachikuynin kasukuymi allinqa. 20Dios qayaptin imaynam kasqankuman hinallayá sapakama kachunku. 21Esclavo kachkaspallaraq qayasqa kaptikiqa manam imananchu, librakuyta atispaqa librakuchunyá. 22Pipas esclavo kachkaspan Señorpa qayasqan kaspaqa libreñam Señorta servinanpaq, chaynataqmi libre kachkaptin Señor qayaptinqa Cristopa esclavonñam rikurirun. 23Diosmi preciowan rantisurqankichik, chaynaqa amayá runapa esclavonqa kaychikchu. 24Chaynaqa, wawqe-panikuna, imaynam qayasqa kasqaykichikman hinayá Diospa qayllanpi sapakama takyaychik.
25Solterakunamantaqa manam Señorpa kamachikuynin kanchu, ichaqa Señorpa kuyapayawasqanman hina confianza kasqanraykum consejoyta qoni. 26Mana allin tiempokunapi kasqanchikrayku, ñoqamantaqa allinmi kanman solterolla kayninku. 27Casado kaspaqa amayá warmikimantaqa rakikuychu. Sapallayki kaspaqa amaraqyá warmita maskaychu. 28Chaywanpas casarakuspaykiqa manam huchallikuchkankichu, soltera warmi casarakuspanpas manataqmi huchallikuchkanchu, casarakuqkunam ichaqa kawsayninkupi sasachakuypi kanqaku. Ñoqaqa munaymanmi mana sasachakuyniyuq kanaykichikta.
29Wawqe-panikuna, kaytam niyta munaykichik, manañam tiempo kanñachu, chaymi kunanmantaqa casadokunapas mana warmiyuqpas kanman hinaña kawsananku. 30Llakisqa kaqkunapas mana llakiyuq hinam kananku, kusisqa kaqkunapas mana kusikuyniyuq hinam kananku, chaynataqmi rantiqkunapas mana kapuqniyuq hinaña kananku. 31Kay pachapi allin kaqkunawan servichikuqkunapas allin kaqkunawan mana servichikuq hinam kananku, kay pacha qawasqanchikqa tukuruqllam.
32Manam munaymanchu llakisqa kanaykichikta. Soltero qariqa Señorpa kaqninkunallapim ocupakun, paypa munasqanta ruwananpaq. 33Casado qarikunañataqmi ocupakunku kay pachapi kaqkunamanta chaynapi warminta agradananpaq. 34Casada warmiqa manam soltera warmi hinachu, soltera warmiqa Señorpa kaqninkunapim ocupakun cuerponpiwan espiritunpi Diospaq sapaqchasqa kananpaq. Casada warmiñataqmi ocupakun kay pachapi kaqkunamanta chaynapi qosanta agradananpaq.
35Kaytaqa nikichik allinnikichikpaqmi, manam harkakuspaychu aswanqa allinta kawsaspa mana hukmanyaspa Señorta servinaykichikpaqmi.
36Ichapas soltera churinmanta pipas piensanman:
Harkakusqayraykum payayarunman, nispa.
Chaynata piensaspan casarachiyta munaptinqa allinmi, casarachichunyá, manam chayqa huchachu. 37Sichum pipas mana obligasqa kachkaspa, libre kasqanman hina munanman warmi churinqa solteralla kananta, hinaspaqa allintam ruwan. 38Chaynaqa, casarachispaqa allintam ruwan, mana casarachispanñataqmi aswan allintaraq ruwan.
39Casada warmiqa leyman hinaqa qosanmanmi hukllawasqa kachkan qosan kawsachkaptinqa, qosan wañukuptinmi ichaqa libreña piwanpas munasqanwan casarakunanpaq, ichaqa Señorpi iñiqwan. 40Ichaqa tanteasqayman hinaqa kusikuyniyuqmi kanman mana huktawan casarakuspanqa. Ñoqaqa creenim Diospa Espiritunqa ñoqapi kasqanta, chaynapim kaynata rimapayaykichik.
Currently Selected:
1 Corintios 7: RCHQ2
Highlight
Copy
Compare
Share
Want to have your highlights saved across all your devices? Sign up or sign in
Chuya Qellqa Revisión @ Sociedad Bíblica Peruana, 2012
