Yakubu 5
5
1Mbá mɩ ɩkɛ ñɩm tɩnaa yɔ, iwelesini-m lɛɛlɛɛyɔ! Iwili nɛ isisi kʋñɔmɩŋ weyi ɩkɔŋ-mɩ talʋʋ yɔ ɩ-yɔɔ! 2Mɩ-ñɩm ɖazaa nɛ ŋgbam tɔɔ mi-tokonaa. 3Mi-sika nɛ mi-liidiye ñɩ́ɣ́yʋ́ʋ pamʋ kálɩkɔ́daɣ. Kálɩkɔ́daɣ ŋ́gá kɔkɔŋnɩ lɩzʋʋ aseɣɖe se ɩtala camɩyɛ. Halɩ kɔkɔŋ yebu ɖɔɖɔ nɛ mɩ-maɣmaɣ ɩpʋʋ ɛzɩ miŋ ñakʋʋ pʋyʋ yɔ. Ikpeɣli ñɩm pɩtɩɩfɛyɩ, ŋgʋ́, kɛtɛzaɣ alɩwaatʋ taa ɖɩwɛɛ. 4Ɩtɛhɛyɩ tʋmlaɖaa mbá palakɩ tʋmɩyɛ mɩ-hayɩm taa yɔ pe-liidiye. Ɩnɩɩ ɛzɩma mbʋ́ patɩmɩɣnɩ-mɩ yɔ! Mbá pakʋŋ mɩ-tɔɔnaɣ yɔ, pamabɩ kobusi nɛ Kɩpaɣlʋ Caabiyuu nɩɩ. 5Mi-wezuu caɣʋ taa kedeŋa yɔɔ cɩnɛ lɛ, ɩwɛ leleŋ taa nɛ ɩcanɩɣ mɩ-tɩ. Ɩtɔɔ camɩyɛ nɛ ɩpaɣlɩ ɛzɩ kpɩna wena pɔkɔŋ kʋʋ se pɔtɔɔ yɔ#5.5 Kpɩna wena pɔkɔŋ kʋʋ se pɔtɔɔ yɔ: papɩzɩɣ pɛɖɛzɩ-tʋ se: paɖaŋnɩ-wɛ kɛtɛzaɣ kɩyakʋ yaa pɔkɔŋ ñɩm tɩnaa kʋʋ.. 6Ɩkʋ ɛyáa kʋtʋʋzaa tɔm nɛ ɩtɛ ɩkʋ-wɛ nɛ pasɩ: patapɩzɩ pakaɖɩnɩ-mɩ.
Ɩɖɔkɩ mɩ-tɩ, Kɩpaɣlʋ kɔŋ!
7Taabalaa! Pʋ-yɔɔ meheyiɣ-mɩ se ɩɖɔkɩ mɩ-hɔ nɛ pʋkɔɔ pɩsɩɩnɩ alɩwaatʋ ndʋ́ Kɩpaɣlʋ kɔŋ yɔ. Ɩcɔnɩ ɛzɩma mbʋ́ haɖʋ ɖɔkʋʋ ɛ-hɔyɛ nɛ ɛɖaŋ se ɛkɔŋ tɔɔnaɣ kɩbaŋga kʋm ɛ-hayɩm taa yɔ: ɛɖɔkʋʋ ɛ-hɔyɛ nɛ kajalaɣ tɛŋ nɛ kɛtɛzaɣ ñɩŋ panɩɩ. 8Mɩ ɖɔɖɔ, ɩɖɔkɩ mɩ-hɔ ḿbʋ́, iyele nɛ mɩ-lɩmaɣza kpa ɖoŋ. Mbʋ́ pʋyɔɔ yɔ, alɩwaatʋ ndʋ́ Kɩpaɣlʋ kɔŋ yɔ, tɩwɩzɩ talʋʋ.
9Taabalaa! Ɩtaatɩmnɩ ɖama, pɩtɛkɛ ḿbʋ́, Ɛsɔ hʋʋnɩ-mɩ nɛ ɛkʋ mɩ-tɔm. Ɩcɔnɩ ɩna: tɔm hʋyʋ talɩ nɔnɔɔ taa! 10Taabalaa! Ɩtɔzɩ náyaa mbá pɔyɔɔdaɣnɩ Kɩpaɣlʋ nɔɔ yɔ pɔ-yɔɔ, ɩla ɛzɩ palabʋ yɔ. Pɔɖɔkɩ pɔ-hɔ siŋŋ alɩwaatʋ ndʋ́ pɔtɔkaɣ kʋñɔŋ yɔ. 11Đɩtɔŋ se pehiɣ pa-tɩ! Mbʋ́ pʋyɔɔ yɔ, paaɖɔkɩ pa-tɩ kpam. Ɩtɛm nɩʋ ɛzɩma mbʋ́ Yɔɔbʋ kɔɖɔkɩ ɛ-tɩ ɛ-kʋñɔŋ taa yɔ. Đɔɖɔ lɛ, ɩna mbʋ́ Kɩpaɣlʋ ha-ɩ pʋwayɩ yɔ. Ɛlabɩ-ɩ ḿbʋ́, mbʋ́ pʋyɔɔ yɔ, ɛnaɣ ɛyáa pʋtɔdɩyɛ nɛ ɛlakɩ-wɛ camɩyɛ.
12Man-taabalaa! Pɩtɩŋa pɩ-taa lɛ, ɩtaaɖuu: ɩtaaɖuuni ɛsɔdaa yaa tɛtʋ yaa nabʋyʋ. Yee ɩtɔm se: «Ɛɛ» yɔ, pɩkɛ «Ɛɛ.» Ɩtɔm se: «Aayɩ» yɔ, pɩkɛ ɖɔɖɔ «Aayɩ.» Pɩtɛkɛ ḿbʋ́, Ɛsɔ hʋʋnɩ-mɩ nɛ ɛkʋ mɩ-tɔm.
Ɖɩsɛɛ Ɛsɔ kʋdɔndɩnaa yɔɔ
13Mɩ-taa nɔɔyʋ wɛ kʋñɔŋ taa yaa we? Pʋdʋ ɛsɛɛ Ɛsɔ. Mɩ-taa nɔɔyʋ wɛ laŋhʋlʋmɩyɛ taa yaa we? Pʋdʋ etee hendu nɛ ɛsa Ɛsɔ. 14Pɩwɩɣ mɩ-taa nɔɔyʋ yaa we? Pʋdʋ ɛ́yáa Krɩstʋ ŋgbɛyɛ taa sɔsaa nɛ powolo petendi Ɛsɔ ɛ-yɔɔ nɛ pasayɩ-ɩ num Kɩpaɣlʋ hɩɖɛ taa. 15Pɛwɛnɩ lidaʋ pe-tenduu taa yɔ, pɩyakɩ kʋdɔndʋ ñʋʋ: Kɩpaɣlʋ lakɩ nɛ ɛ-yɔɔ cɛ nɛ yee ɛɛlaba kɩwɛɛkɩm yɔ, ekpeɣ-i-pʋ ɖɔɖɔ. 16Pʋ-yɔɔ meheyiɣ-mɩ se iheyi ɖama mɩ-kɩwɛɛkɩm nɛ itendi Ɛsɔ ɖama yɔɔ nɛ mɩ-yɔɔ cɛ. Weyi ɛtʋʋzɩ Ɛsɔ ɛsɩndaa yɔ, yee ɛsɛ Ɛsɔ nɛ ɛ-laŋɩyɛ tɩŋa yɔ, ɛ-Ɛsɔ sɛʋ wɛɣ ɖoŋ pɩtɩɩfɛyɩ. 17Ɩtɔzɩ Elii yɔɔ, ɛkɛ ɛyʋ yem ɖɔɖɔ ɛzɩ ɖa yɔ: eetendi Ɛsɔ siŋŋ se ɛtaayele nɛ tɛʋ nɩɩ. Toovenim, pɩkpaɣnɩ puwiye ńɖɩ́ lɛ, tɛʋ yele nɩʋ pɩnzɩ naadozo nɛ hɔɔlʋʋ. 18Pʋwayɩ lɛ, ɛtasɩ-ɩ tenduu se kɩnɩɩ. Peeɖe ɛ́lɛ́ yeba nɛ kɩpazɩ nɩʋ nɛ tɔɔnaɣ la ɖɔɖɔ.
Ɩpɩsɩnɩ mbá peleba toovenim nʋmɔʋ yɔ kɩ-taa
19Man-taabalaa! Mɩ-taa lɛ, nɔɔyʋ pɩzɩɣ ele toovenim nʋmɔʋ taa, nɛ lɛlʋ pɩsɩnɩ-ɩ nʋmɔʋ ŋ́gʋ́ kɩ-taa. 20Ɩtɩlɩ se: yee mɩ-taa nɔɔyʋ eleba toovenim nʋmɔʋ nɛ nɔɔyʋ hɔm-ɩ nɛ ɛpɩsɩnɩ-ɩ kɩ-taa yɔ, ɛlɩzɩ-ɩ nɛ sɩm taa. Đɔɖɔ lɛ, lakasɩ ńzɩ́ sɩlakɩ nɛ Ɛsɔ kpeɣ ɛyáa kɩwɛɛkɩm sakɩyɛ#5.20 kɩwɛɛkɩm sakɩyɛ: papɩzɩɣ pɛɖɛzɩ-tʋ ɖɔɖɔ se: weyi ɛhɔm-ɩ yɔ ɛ-kɩwɛɛkɩm. Ɩcɔnɩ 1 Tim 4.16..
Currently Selected:
Yakubu 5: KABI
Highlight
Share
Copy
Want to have your highlights saved across all your devices? Sign up or sign in