Bene Loma 4
4
Abulaamu mbwaakalulamikwa ceebo ca lushomo
1Ono twaambe buyani pali Abulaamu mushali wesu mukulukulu sobaJuda? Nciinshi cakacitika pacikani ici? 2Lesa naakwiinga wakalulamika Abulaamu pameenso akwe kwiinda mumilimo yakwe, naalinga kucite cakulisumpwitaawo, sombi kutaamba kuli Lesa. 3Malembo akwe Lesa alaamba ayi, “Ceebo cakwaamba ayi Abulaamu wakashoma Lesa, aboobo Lesa wakamwaamba ayi uliluleme.”#Mata 15:6; Gala 3:6 4Muntu usebensa, ulafola maali ceebo ca mulimo ngwaacita. Sombi teshi kwaamba ayi ncipo mukwiinga wakaasebensela. 5Ono muntu ushomabo muli Lesa ululamika bamucita shibi, kutashoma milimo yakwe ibotu, Lesa ulamubona ayi uliluleme kwiinda mulushomo lwakwe. 6Ici nceceeci Defedi ncaakaambila ayi ulicite coolwe muntu uyo Lesa ngwaalulamika pameenso akwe, kuteshi ceebo ca milimo ibotu njaacita. 7Wakaamba ayi,
“Balicite coolwe abo Lesa mbaalekelela shibiibi shabo,
abo bacite shibiibi nshaakashiminganya!
8Balicite coolwe abo Lesa mbwaateebalukili shibiibi shabo.”#Kulu 32:1-2
9Sa coolwe cakaamba Defedi cilibo kubaabo bakapalulwa beenka? Sobwe! Abalo batakwe kupalulwa balaba acoolwe, kweelana aMalembo ngotwaswa mukwaamba ayi, “Ceebo cakwaamba ayi Abulaamu wakashoma Lesa, aboobo Lesa wakamubona ayi uliluleme.” 10Ici cakacitika Abulaamu kaatana kupalulwa, kutaamba ayi kaali wapalulwa kale. 11Pesule Abulaamu wakapalulwa ayi cibe cishibilo cakutondesha ayi Lesa wakamululamika ceebo ca lushomo lwakwe. Aboobo Abulaamu ngoishiwabo boonse abo bashoma muli Jesu. Paceebo ceeci Lesa ulabalulamika nabi tabana kupalulwa.#Mata 17:10 12Ngoishiwabo abo bakapalulwa abalo. Teshi ceebo cakupalulwa ceenka, sombi bali amunshila ya lushomo iyo yakalinga kwikalamo ishiwesu Abulaamu kaatana kupalulwa.
Lesa mbwaakapangana abaabo bashoma muli nguwe
13Lesa wakashomesha Abulaamu abamulunyungu lwakwe kwaamba ayi cishi cilaakuba cabo. Ici tacikwe kucitika ceebo Abulaamu wakakonkela Milawo, sombi mukwiinga wakashoma Lesa. Aboobo Lesa wakamubona ayi uliluleme.#Mata 17:4-6; 22:17-18; Gala 3:29 14Nkokwaamba ayi na Lesa nshaashomesha shilatambulwa kwiinda mukukonkela Milawo, ingayi kushoma muli Lesa taaku mbokubete asheesho nshaashomesha taaku mboshibete.#Gala 3:18 15Milawo ilalengesha Lesa kupa milandu bantu, sombi na taaku Milawo, taaku muntu weenga weesotoka.
16Lesa wakashomesha mukwiinga Abulaamu wakamushoma kwaamba ayi bamulunyungu lwakwe Abulaamu batambule cipo muluse lwakwe. Teshi kubaabo bakonkela Milawo beenka. Sombi abaabo bashoma bwakashoma Abulaamu ceebo Abulaamu ngoishiwesu soonse sotushoma.#Gala 3:7 17Mbweeke mbuli bwaamba Malembo akwe Lesa ayi, “Ndalengesha kwaamba ayi ube mushali wa mishobo yoonse.” Aboobo cakabota ceebo nguLesa mwiine wakashomesha. Uyu ngoLesa uyo Abulaamu ngwaakashoma, Lesa ubusha bantu kuswa kubafu alimwi ulengesha kwaamba ayi shitako shibeeko kwiinda mukusebenseshabo liswi lyakwe.#Mata 17:5 18Abulaamu wakashoma akulangila nakubi kwaamba ayi cakalinga kuboneka anga teshi cikacitike. Aboobo wakaba mushali wa mishobo yoonse. Kweelana abwaamba Malembo akwe Lesa ayi, “Bamulunyungu lwako balaakufula mbuli nyenyeenshi.”#Mata 15:5 19Wakalinga pafwaafwi kukwanisha myaaka mwaanda. Sombi taakwe kutyongola kushoma Lesa, nakubi kwaamba ayi mubili wakwe wakamana nkusu alakwe Sala mukaakwe kaatashali.#Mata 17:17 20Wakatolelela kushoma. Taakwe kutonsha paceeco Lesa ncaakamushomesha. Ncakwiila wakashoma cankusu akumulumbaisha. 21Abulaamu wakalinga kushoma cancinencine ayi Lesa ulakonsha kucita kweelana ambwaakashomesha. 22Nceceeco Abulaamu kwiinda mulushomo lwakwe, “Lesa wakamubona ayi uliluleme.” 23Maswi aya aamba ayi, “Lesa wakamubona ayi uliluleme,” taambi shapali Abulaamu eenka. 24Sombi alaamba apali ndiswe sweshi tukalulamikwe pameenso akwe Lesa ceebo ca lushomo ndotucite muli nguwe wakabusha Jesu Klistu Mwaami wesu kuswa kubafu. 25Lesa wakabenga Jesu kwaamba ayi acaikwe ceebo ca shibiibi shesu alimwi wakamubusha kuswa kubafu kwaamba ayi atululamike pameenso akwe.#Isa 53:4-5
Currently Selected:
Bene Loma 4: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
