Matalikilo 46
46
Jakobo abamuŋanda yakwe mbobakaya kuIjipiti
1Jakobo wakalongela shoonse nshaakalinga kucite. Lyalo wakaya kuBiyasheba uko nkwaakaya mukubenga mulambu kuli Lesa wakwe Isaki, ishi. 2Lesa wakaamba anguwe mashiku akumwiita ayi, “Jakobo! Jakobo!” Wakakumbula ayi, “Nkambo.”
3Lyalo Lesa wakaamba ayi, “Ndime Lesa, Lesa wa baiso, utaloondi kuya kuIjipiti. Bamulunyungu lwako ndaakubalengesha kuba mishobo inene uko kweenka. 4Ntooya awebo kuIjipiti, alimwi bamulunyungu lwako ndaakubaboosha kucishi cino. Josefu ulaakunooliiwo waakufwa.”
5Jakobo wakanyamuka kuswa kuBiyasheba. Bana bakwe basankwa bakatantika Jakobo, bana babo baniininiini alimwi abamakaabo mushikoci shakatuma mwaami wa Ijipiti. 6Bakabwesa shifubwa shabo ashintu shoonse nshibakalinga kucite muKenani akuya kuIjipiti. Jakobo wakaya abamulunyungu lwakwe boonse.#Mili 7:15 7Bana bakwe basankwa abanakashi alimwi abashikulu bakwe basankwa abanakashi.
8Bamuŋanda yakwe Jakobo bakaya kuIjipiti anguwe ngumwanaakwe munenebantu Lubeni 9abana bakwe Lubeni basankwa beetwa ayi Anoki, Palu, Esiloni alimwi aKami. 10Simyoni, abana bakwe basankwa beetwa ayi, Jemuwelo, Jamini, Oadi, Jakini, Sowa alimwi aShaulo, baana basankwa mbaakashalila mumwanakashi mwine Kenani. 11Lefi, abana bakwe basankwa beetwa ayi Geshoni, Koati aMelali. 12Juda abana bakwe basankwa beetwa ayi Shela, Pelisi alimwi Sela. Bana bakwe Juda basankwa bamwi beetwa ayi Ele aOnani bakafwita muKenani. Bana bakwe Pelisi basankwa nguEsiloni alimwi aAmulu. 13Isaka abana bakwe basankwa beetwa ayi Tola, Jashabu, alimwi aShimuloni. 14Sebuluni abana bakwe basankwa beetwa ayi Seledi, Eloni alimwi aJalilu. 15Aba mbaana basankwa Jakobo mbwaakashalila muli Leya kabacili kuMesopotamya kuleka Daina mwanaakwe mwanakashi. Ono boonse pantu pomwi bamulunyungu lwakwe Jakobo muli Leya bakaba makumi otatwe abotatwe.
16Gadi abana bakwe basankwa beetwa ayi Sefoni, Agi, Shuni, Esiboni, Eli, Alodi alimwi aAleli. 17Asha abana bakwe basankwa Imuna, Ishifa, Ishifi, Beliya alimwi anankashi yabo Sela. Bana bakwe Beliya basankwa nguEba alimwi aMikaeli. 18Aba boonse bali likumi abosanwe alimwi awomwi mbamulunyungu lwakwe Jakobo muli Silupa musha uyo Labani ngwaakapa Leya, mwanaakwe mwanakashi.
19Muli Lakelo mukaakwe, Jakobo wakashalilaamobo baana basankwa bobilo, Josefu alimwi aBenjameni. 20MuIjipiti Josefu wakashala baana basankwa bobilo, Manase alimwi Efuleemu, muli Asenati mwanaakwe Potifela, mupailishi wa muEliopolisi.#Mata 41:50-52 21Bana bakwe Benjameni basankwa nguBela, Beka, Ashibelo, Gela, Naamani, Eyi, Loshi, Mupimu, Upimu, alimwi aAadi. 22Aba bali likumi abone mbamulunyungu lwakwe Jakobo muli Lakelo.
23Dani amwanaakwe musankwa Ushimu. 24Nafutali abana bakwe basankwa beetwa ayi Jasilu, Guni, Jesa alimwi aShilemu. 25Aba bali bosanwe abobilo mbamulunyungu lwakwe Jakobo muli Biluya musha Labani ngwaakapa Lakelo mwanaakwe mwanakashi.
26Boonse pantu pomwi mbamulunyungu lwakwe Jakobo mbwaakayaabo kuIjipiti, kutabelengelaako bamalokashi bakwe, abo bakalinga makumi osanwe alyomwi alimwi abosanwe awomwi. 27Ono kubikaako abaana basankwa bobilo Josefu mbwaakashala kuIjipiti, bamulunyungu lwakwe Jakobo bakaya kuIjipiti bakalinga makumi osanwe aobilo pantu pomwi.#Mili 7:14
Jakobo abamulunyungu lwakwe muIjipiti
28Jakobo wakatanjisha Juda ayi aambile Josefu bakumanine muGosheni. Ndibakashika, 29Josefu wakatanta mucikoci ca maaki cakwe akuya mukukumana abaishi muGosheni. Ndibakakumana, Josefu wakakumbata baishi munshingo akulila kwa ciindi cilaamfu. 30Jakobo wakaambila Josefu ayi, “Ndilibambite kufwa bulya mbondakubona akwishiba kwaamba ayi uli muumi.”
31Mpeeke Josefu wakaambila bamakwabo abamwi boonse bamuŋanda yakwe Jakobo ayi, “Ndyeelete kuya mukwaambila Falawo ayi bamakwesu abamuŋanda ya bata, abo bakalinga kwikala kuKenani, besa kuno kuli ndime. 32Ntoomulwiita ayi muli beembeshi alimwi mulalama shifubwa alimwi ayi mwaletelela mbelele, mpongo, ŋombe alimwi ashintu shanu shimwi shoonse. 33Mwaami amwiita akumwiipusha ncemucita, 34mumwaambile cakushinisha ayi mwakalinga bafubi alimwi mucili bafubi bweenka mbuli bamashali banu bakulukulu. Na mwaambe boobo ndyeshi amusuminishe kwikala mumusena wa Gosheni.” Josefu wakaamba boobo mukwiinga bene Ijipiti tebakalinga kusunene abeembeshi.
Currently Selected:
Matalikilo 46: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
