Matalikilo 45
45
Josefu mbwaakaliyubulula kubamakwabo
1Mpeeke Josefu wakashika pakwaalilwa kulicata pameenso a basebenshi bakwe. Aboobo wakabaambila ayi basweemo mucipinda umo mobakalinga. Taaku umbi wakalingaamo Josefu ndyaakalinga kulisansulula kubamakwabo.#Mili 7:13 2Wakalila abuumbi cakwaamba ayi bene Ijipiti bakanyumfwa, akushisha cikani ici kuŋanda yakwe Falawo. 3Josefu wakaamba ayi, “Ndime Josefu. Sa bata bacili boomi?” Bamakwabo ndibakanyumfwa boobo bakaloonda cakwaalilwa akukumbula. 4Lyalo Josefu wakabambila ayi, “Amusene pafwaafwi.” Mpeeke bakasena alimwi wakabaambila ayi, “Ndime mukwabanu Josefu uyo ngomwakoolisha ayi atolwe muIjipiti. 5Ono mutakankamani akulipa mulandu nobeene ceebo cakungulisha kokuno. NguLesa mwiine wakantanjisha kuli ndimwe kwaamba ayi mpulushe bantu. 6Uno ngumwaaka wabilibo kuba munsala mucishi cino, sombi kucisa aimwi myaaka yosanwe yakutalima nabi kutebula. 7Lesa wakantanjisha kokuno kunembo lyanu ayi mupulushe munshila ikankamanisha iyi, alimwi ayi ncakwiila mwebo abamulunyungu lwanu mutafwi. 8Aboobo teshi ndimwe mwakantuma kokuno, sombi nguLesa. Wakanengesha kuba muntu wacinenenene ukonkela Falawo mubweendeleshi. Ndime nyendelesha ŋanda yakwe yoonse, alimwi ndimweendeleshi wa cishi coonse ca Ijipiti.
9“Ono mweendeshe muye kuli bata mukabaambile ayi Josefu mwanaanu musankwa waamba ayi, ‘Lesa wanengesha kuba mweendeleshi wa cishi ca Ijipiti coonse, ono bese kuno cakufwambaana. 10Mulaakunookala mumusena wa Gosheni kwaamba ayi mukabe pafwaafwi anebo. Nkokwaamba ayi mwebo, bana banu, bashikulu, mbelele, mpongo, ŋombe shanu alimwi asheesho shoonse nshemucite. 11Na kamuli muGosheni inga ndakonsha kumubikaako maano. Kucili myaaka yosanwe ya nsala. Aboobo nshisuni kwaamba ayi mwebo, bana banu, ashifubwa shanu mufwe kunsala.’ ”#Mili 7:14 12Josefu wakatolelela ayi, “Ono noonse, awebo Benjameni, mwaboona kwaamba ayi ncakwiila ndime Josefu. 13Mukabalwiite bata nkusu nsheencite muno muIjipiti asheesho shoonse nshemwabona. Lyalo mukabaleete kokuno cakufwambaana.”
14Mpomunyaawo wakakumbata Benjameni mukwabo akutalika kulila. Alakwe Benjameni wakalila pakumukumbata. 15Lyalo kaacilila buumpute wakakumbata bamakwabo boonse womwi awomwi akubafyonta. Mpeeke ndyaakamana kucita boobo bamakwabo bakatalika kwaambaakwe.
16Makani akwaamba ayi bamakwabo Josefu besa ndyaakashika kuŋanda ya mwaami, Falawo abacinenenene bakwe bamwi boonse bakakondwa. 17Mpeeke Falawo wakaambila Josefu ayi, “Ambila bamakwanu baye bakalongele shintu pambongolo shabo, akuboolela kucishi ca Kenani. 18Lyalo bakese kuno abaishiwabo abamuŋanda shabo boonse. Ndaakubapa musena wiindaawo kubota muno muIjipiti, alimwi balaakuba ashintu shiinji shiinda anshebayanda mubuumi bwabo. 19Anu baambile babwesele limwi ashikoci kuno kuIjipiti kwaamba ayi bamakaabo, bana babo alimwi abaishiwabo bakeendeleemo. 20Batakalisukami akushiya shintu shabo shimwi. Shintu shiindaawo kubota mucishi coonse ca Ijipiti shilaakuba shabo.”
21Bana bakwe Jakobo abo bakacita bweenka mbobakalwiitikwa. Josefu wakabapa shikoci kweelana abwakaamba mwaami Falawo. Wakabapa ashakulya ayi banooya cilya mulweendo. 22Wakabapa ashakufwala shimwi, aumwi aumwi comwi. Sombi Benjameni wakamupa maali asilifa ali myaanda yotatwe ashakufwala shimwi shosanwe. 23Baishi wakabatumina mbongolo likumi shakayumuna shintu shiindaawo kubota muIjipiti ashimwi likumi shakayumuna witi ashakulya shimwi sha mulweendo. 24Wakabashindikila paniini, lyalo ndibakalinga kupansaana wakabaambila ayi, “Tabaambani munshila.”
25Bakashiya Ijipiti akuya kuli Jakobo ishiwabo, kuKenani. 26Mpeeke bakamwaambila ayi, “Josefu ucili muumi! Ngumweendeleshi wa cishi ca Ijipiti coonse.” Jakobo wakacatwa citu, aboobo taakwe kukonsha kubashoma.
27Nacibi boobo, ndibakamulwiita makani oonse Josefu ngaakabaambila, alimwi ndyaakabona shikoci Josefu nshaakatuma ayi beendeleemo, maano akaboolaamo. 28Lyalo wakaamba ayi, “Ono ndashooma, ncakwiila mwanaangu Josefu ucili muumi! Ndaakuya nkamuboneewo kaantana kufwa.”
Currently Selected:
Matalikilo 45: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
