Kulonga 35
35
Milawo ya pabushiku bwakookesha bwa Cibelu
1Mpomunyaawo Mose wakabunganya bene Isilaeli boonse akubaambila ayi, “Mwaami Lesa waamba ayi mwebo mulyeelete kunookonkela milawo iyi, 2Munshiku shosanwe abomwi mulyeelete kusebensa milimo yanu, sombi bushiku bwasanu ashobilo, mbushiku busalalite bwakookesha, bubengetwe kuli ndime neMwaami Lesa, Lesa wanu. Uyo woonse weenga wasebensa milimo pabushiku ubu, ulyeelete kucaikwa.#Kulo 20:8-11; 23:12; 31:15; 34:21; Bene Lefi 23:3; Duto 5:12-14 3Pabushiku ubu bwakookesha, tamweelete kukunka nabibo mulilo mumaanda anu.”
Shipo sha muTente ya Cipangano
(Kulo 25:1-9)
4Mose wakaambila bene Isilaeli boonse ayi, “Mwaami Lesa waamba ayi mulyeelete kukonkela milawo iyi. 5Amupe cipo kuMwaami Lesa. Uyo woonse usuni kucita boobo, ulyeelete kuleta cipo ca golodi, silifa nabi bulonse, 6booya bwa mbelele buboneka anga ndiculu, bufubelafubela abusalalabo pyu, shisani shibotu shiteshimite, booya bwa mpongo, 7shipaya sha mbelele shisankwa isho nshebakaalula mushobo usalala, shipaya shimwi shibotu abuumbi, ashisamu sha mulombe, 8mafuta a olifi a mumalampi, tununkila kabotu twa mumafuta akunanika bantu alimwi amutununkila kabotu pakutenta. 9Ulyeelete kutambula mabwe asalala amabwe amwi amakwebo a cakufwala ca mupailishi munene ciitwa ayi efodi alimwi acakufwala cakwe ca pacaamba.
Shintu sha muTente ya Cipangano
(Kulo 39:32-43)
10“Bacishi milimo boonse balyeelete kwisa mukupanga shintu shoonse shaamba Mwaami Lesa. Mbuli 11Tente, cakufwekaawo ca ndilyo, cakufweka peculu, shakukobekesha alimwi ashintu shamakonko one sha ndilyo, mbaalo, shisamu alimwi ashapanshi sha nshisho, 12Libokoshi lya Cipangano, shisamu shakunyamwishaako sha ndilyo, cifwekesho alimwi acisani cakushitilisha, 13tebulu alimwi ashisamu shakunyamwishaako sha njiyo alimwi ashintu sha ncico shimwi shoonse, ashimaande shakapekwa kuli Lesa. 14Balyeelete kupanga cakubikawo malampi alimwi ashintu sha ncico, malampi alimwi amafuta a ngawo, 15cipaililo cakutentelawo tununkila kabotu alimwi ashisamu shakucinyamwishaako sha ncico, mafuta akunanika, tununkila kabotu pakutenta, cisani cakushitilisha kumwinjililo wa Tente, 16cipaililo ca milambu yakutenta alimwi acili anga nguseefwa ca bulonse ca ncico, shisamu shakucinyamwishaako alimwi ashintu sha ncico shoonse, mbale ifongomene yakusambilaamo acapanshi ca ncico, 17shisani shakubika mweela lubansa, shisamu sha ndulo, shapanshi alimwi acisani cakushitilisha pamwinjililo wa mulushito lushitilishitwe, 18mpoopo alimwi antaambo sha Tente alimwi asha kulushito. 19Balyeelete kutunga shakufwala shibotu abuumbi isho bapailishi nsheshi bakanoofwala pakusebensa mulimo wa bupailishi muMusena Usalalite nkokwaamba ayi shakufwala shisalalite shakwe Aloni alimwi abana bakwe basankwa.”
Bantu mbobakaleta shipo shabo
20Lyalo bene Isilaeli boonse bakoonduluka, 21alimwi boonse abo bakasuna kucita bwakabalwiita Mose, bakaleta cipo kuMwaami Lesa cakupangisha Tente ya Cipangano. Bakaleta shoonse shakalinga kuyandika pamilimo yakulambila alimwi akupanga shakufwala sha bupailishi. 22Basankwa abanakashi boonse abo bakasuna kuleta cipo, bakaleta mapiini akulibotesha, masikiyo, ninga, shakufwala munshingo alimwi amishobo ipusenepusene ya makosa a golodi akushibenga ayi ncipo cakutambeeka kuMwaami Lesa. 23Abo boonse bakalinga kucite booya bwa mbelele buboneka anga ndiculu, bufubelafubela alimwi abusalalabo pyu, shisani shibotu shiteshimite, booya bwa mpongo, shipaya sha mbelele shisankwa isho nshebakaalula mushobo usalala, shipaya shimwi shibotu abuumbi, bakashileta. 24Aboobo boonse bakalinga kukonsha kubenga silifa nabi bulonse, bakaleta shipo shabo kuMwaami Lesa. Abalo abo bakalinga kucite shisamu sha mulombe sheenga shasebensa kumulimo uli woonse, bakashileta. 25Mpeeke boonse banakashi bakalinga kucishi milimo yakoosa busalu bakaleta busalu bwa booya bwa mbelele buboneka anga ndiculu, bufubelafubela alimwi abusalalabo pyu, busalu bwakutungisha shisani shibotu shiteshimite isho mbobakoosa. 26Bakoosa abusalu bwa booya bwa mpongo. 27Balo bamatanjilili ba bene Isilaeli bakaleta mabwe eetwa ayi kanelyani amabwe amakwebo amwi akubika paefodi alimwi apacakufwala pacaamba. 28Bakaleta atununkila kabotu mubuyani alimwi amafuta a olifi a mumalampi, a mumafuta akunanika alimwi amutununkila kabotu pakutenta. 29Boonse bene Isilaeli abo bakasuna kubenga, bakaleta shipo shabo kuMwaami Lesa kwaamba ayi basebenseshe kumilimo iyo njaakaambila Mose ayi bakacite.
Bayaki bacite lushibo ba Tente ya Cipangano
(Kulo 31:1-11)
30Mpomunyaawo Mose wakaambila bene Isilaeli ayi, “Mwaami Lesa wasala Besalelo mwanaakwe Uli, uyo mushikulu wakwe Elu kuswa mumukowa wakwe Juda. 31Lesa mwiine wakamwisusha Mushimu wakwe akumupa lushibo, busongo alimwi amaano a kwishiba milimo ili yoonse ya buyaki, 32Nkokwaamba ayi busongo bwakuyeeyela bweenga bwaba cintu cibotu akucipanga agolodi, silifa, alimwi abulonse. 33Ndamupa abusongo bwakutimbula kabotu mabwe alimwi akwaabamba mpwaaelete, kubesa shisamu, alimwi akucita milimo imwi yoonse ya buyaki. 34Mwaami Lesa wakapa Besalelo alimwi aOolyabu mwanaakwe Ayisamaki kuswa mumukowa wakwe Dani busongo bwakwiisha bamwi lushibo lwabo lwa buyaki. 35Wakabapa lushibo lwa muncito shipusenepusene isho shicita beshikutala pashintu shiyumu, beshikuyeeyela bweenga bwaba cintu cibotu, abaabo beshikutunga booya bwa mbelele buboneka anga ndiculu, bufubelafubela alimwi abusalalabo pyu, shisani shibotu shiteshimite, alimwi ashakufwalabo shimwi shoonse. Bantu bobilo aba balakonsha kucita milimo ili yoonse, alimwi mbeshikuyeeyela bweenga bwaba cintu cibotu.
Currently Selected:
Kulonga 35: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
