Kulonga 34
34
Mabwe apampamene abili
(Duto 10:1-5)
1Mwaami Lesa wakaambila Mose ayi, “Besa mabwe obilo apampamene mbuli ataanshi alya, lyalo ndyeshi nembewo maswi eenka alya akalinga pamabwe ataanshi ayo ngowakapwaya. 2Ciilo macuunsa ukalibambile akunyamuka kwisa peculu lya Kalundu ka Sinayi mukukumana anebo. 3Taaku nabi womwi ngoweelete kwisaakwe nabi weelete kuboneka pamusena uli woonse pakalundu. Alimwi taaku mbelele nabi ŋombe sheelete kunoolya mweela kalundu.” 4Aboobo Mose wakabesa mabwe apampamene obilo akuyaawo kuKalundu ka Sinayi pabushiku bwakaboolaawo macuunsacuunsa, kweelana abwakamwaambila Mwaami Lesa.
5Mpomunyaawo Mwaami Lesa wakaseluka mulikumbi akwiimikana aMose, akulibanda liina lisalalite ayi Mwaami Lesa. 6Lyalo Mwaami Lesa wakeenda kunembo lyakwe Mose, akoolobesha ayi, “Nebo neMwaami Lesa ndime Lesa uswite lulekelelo ankuumbu, utafwambaani kukalala, ubonesha lusuno lunene alimwi ushomeka.#Kulo 20:5-6; Shakube 14:18; Duto 5:9-10; 7:9-10 7Ndalama cipangano cangu kumashalane ali shuulu ashuulu, alimwi akulekelela bantu pabubi ashibiibi shabo. Sombi teshi nkaalilwe kupa mulandu baana alimwi abameeshikulu babo, kushikila akulishalane lyatatu alyane, ceebo ca shibiibi sha bamashali babo.”
8Mpeeke Mose wakeendililabo kufukama cakushisha ciwa panshi akulambila. 9Wakaamba ayi, “NoBaami baLesa, na ncakwiila mulikondetwe muli ndime, ndamusenga ayi muye aswebo. Bantu aba mbeshicimpamya, sombi mutulekelele pabubi bwesu alimwi ashibiibi shesu akututambula ayi tube bantu banu.”
Cipangano mbocakabushikwa
(Kulo 23:14-19; Duto 7:1-5; 16:1-17)
10Mwaami Lesa wakaambila Mose ayi, “Ono bulya ntoopangana abene Isilaeli. Ndaakucita shintu shinene pameenso abo, isho shitana kucitikwaawo pakati ka mishobo imwi mucishi coonse ca panshi. Bantu boonse balaakubona shintu shikankamika isho nebo neMwaami Lesa nsheenga ndamucitila. 11Munookonkela milawo yoonse njeshi mwaambile sunu. Ndaakutanda bene Amoli, bene Kenani, bene Iti, bene Pelisi, bene Ifi alimwi abene Jebusi kunembo lyanu. 12Mutakeeleshi kupanga cipangano abantu ba mucishi ico ncemutooyaamo, mukwiinga inga kaba koose kuli ndimwe. 13Sombi mukamwayulule shipaililo shabo, mukanyonyoole mabwe ngobakeemika pamisena yakulambililaawo alimwi akutimbula shikoshanyo shakwe Ashela, lesa wabo mwanakashi wakubesa.#Duto 16:21
14“Tamweelete kulambila lesa umwi, ceebo nebo neMwaami Lesa, ndishibusuba. 15Mutakeeleshi kupanga cipangano abantu ba mucishi ico, mukwiinga pakunoolambila balesa babo alimwi akubabengela milambu, balaakumutamba amwebo. Paceebo ceeci mulaakulya nshebabenga kubalesa babo. 16Ono bana banu inga baakweeba banakashi baswamashi abo beenga babakusha kuli ndime, akutalika kulambila balesa babo.
17“Tamweelete kupanga balesa basheela alimwi akunoobalambila.#Kulo 20:4; Bene Lefi 19:4; Duto 5:8; 27:15
18“Mulyeelete kulama bushiku bwakusekelela kulya cimaande. Kweelana ambondakamwaambila, mukanoolya cimaande kwa nshiku shili shosanwe ashobilo mumweenshi wa Abibu, ceebo ngomweenshi ngomwakaswa mucishi ca Ijipiti.#Kulo 12:14-20; Bene Lefi 23:6-8; Shakube 28:16-25
19“Woonse mwaana musankwa wakwiiya ngwaangu pantu pomwi abaana basankwa bakwiiya ba shifubwa boonse,#Kulo 13:2 20Sombi mulyeelete kulubula mwanaambongolo wakwiiya kwiinda mukubengelawo mwanaambelele pamusena wa njiyo. Na mwabula kumulubula, mulyeelete kumutyola nshingo. Bana banu basankwa bakwiiya boonse mukanoobalubula.#Kulo 13:13
“Taaku muntu weelete kwisa kuli ndime kaatacite mulambu.
21“Mulicite nshiku shosanwe alimwi abomwi isho nshemweelete kusebensa milimo yanu, sombi pabushiku bwasanu ashobilo, tamweelete kusebensa, nabibo ciindi cakulima alimwi acakutebula.#Kulo 20:9-10; 23:12; 31:15; 35:2; Bene Lefi 23:3; Duto 5:13-14
22“Ono mulyeelete kulama bushiku bwakusekelela kutebula, paciindi ico ndyemutalika kutebula shishango shanu shitaanshi sha witi, alimwi akulama ciindi cakusekelela kwa Shimpaka ciindi ca cilimo na mwamana kuyobolola shisepo shanu.#Bene Lefi 23:15-21; Shakube 28:26-31; Bene Lefi 23:39-43
23“Anu basankwa banu boonse bamanene balyeelete kwisa mukulambila ndime neMwaami Lesa, Lesa wa bene Isilaeli, mankanda otatwe mumwaaka. 24Na nkamane kutanda mishobo iyo kunembo lyanu alimwi akukomenyako cishi canu, taaku nabi womwi ngweshi akeeleshe kukoma cishi canu paciindi cakusekelela uko kucitwa mankanda otatwe.
25“Pakubenga munyama ayi ngumulambu kuli ndime, tamweelete kubenga shinkwa. Alimwi mutakeeleshi kushiyako cipansha ca nyama yakacaikwa pabushiku bwa Pasika bwakwiibaluka kusotokela nabi comwi ayi cikalikwe ciilo.#Kulo 12:10
26“Lyoonse pamwaaka, mukanooleta shakulya shanu isho nsheenga mwataanguna kutebula kuŋanda ya Mwaami Lesa.
“Mutateleki kana ka mpongo mumukupa wa banyina.”#Duto 26:2; Duto 14:21
27Lyalo Mwaami Lesa wakaambila Mose ayi, “Lemba maswi oonse aya mukwiinga cipangano cesu awebo alimwi a bene Isilaeli cili pamaswi ngomunya aya.” 28Mpeeke Mose wakekala kweenka uko aMwaami Lesa kwanshiku shili makumi one, nkokwaamba ayi malumwi amashiku, kaatali nabi kunwa cintu nabi comwi. Wakalemba maswi a cipangano ayo pamabwe apampamene. Maswi ngaakalemba njiMilawo ili Likumi.
Mose mbwaakaseluka paKalundu ka Sinayi
29Mose ndyaakaseluka paKalundu ka Sinayi kaayumwite mabwe obilo apampamene pakalinga kulembetwe Milawo ili Likumi, ciwa cakwe cakalinga kubala ceebo wakalinga kwaamba aMwaami Lesa. Nacibi boobo, mwiine taakalinga kwishi. 30Ono Aloni alimwi abantu bamwi boonse ndibakalangilisha Mose akubona ayi ciwa cakwe citoobala, bakaloonda kumushika pafwaafwi. 31Sombi Mose wakabeeta, lyalo Aloni alimwi abamatanjilili boonse ba bene Isilaeli bakaya kuli nguwe, alakwe wakatalika kwaambaabo. 32Kuswawaawo boonse bene Isilaeli bakabungana kuli nguwe, lyalo wakabalwiita milawo yoonse yakamupa Mwaami Lesa paKalundu ka Sinayi. 33Mose ndyaakamana kwaambaabo, wakalifweka cisani kumeenso. 34Lyoonse Mose ndyaakalinga kwinjila muTente ya Cipangano mukwaamba aMwaami Lesa, wakalinga kulifwekula cisani kumeenso. Ono na waswaamo, wakalinga kulwiita bene Isilaeli shoonse Mwaami Lesa nshaakalinga kumulwiita. 35Abalo bantu ndibakalinga kubona ayi ciwa cakwe citoobala, wakalinga kucibooshaawo cisani kushikila ciindi ico ncaakalinga kuya mukwaamba aMwaami Lesa.#2 Koli 3:7-16
Currently Selected:
Kulonga 34: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
