Kulonga 31
31
Bacishi kuyaka Tente ya Cipangano
(Kulo 35:30—36:1)
1Mpomunyaawo Mwaami Lesa wakaambila Mose ayi, 2“Ndasala Besalelo mwanaakwe Uli, mushikulu wakwe Elu wa mumukowa wakwe Juda, 3alimwi ndamwisusha Mushimu wangu. Ndamupa lushibo, maano alimwi abusongo bwa pabuyaki buli boonse. 4Nkokwaamba ayi busongo bwakuyeeyela bweenga bwaba cintu cibotu akucipanga agolodi, silifa, alimwi abulonse. 5Ndamupa abusongo bwakutimbula kabotu mabwe alimwi akwaabamba mpwaaelete, kubesa shisamu, alimwi akucita milimo imwi yoonse ya buyaki. 6Ndasala aOolyabu mwanaakwe Ayisamaki, wa mumukowa wakwe Dani kwaamba ayi asebense aBesalelo. Alimwi ndapa busongo bunene kubacishi milimo boonse, kwaamba ayi bapange cili coonse ncendaamba 7mbuli Tente ya Cipangano, Libokoshi lya Cipangano, cifwekesho ca nkumbu alimwi ashakubotesha shoonse sha muTente. 8Nkokwaamba ayi tebulu ashintu sha njiyo, cakubikawo malampi ca golodi wiine wiine ashintu sha ncico, cipaililo cakutentelawo tununkila kabotu, 9cipaililo cakubengelawo milambu yakutenta ashintu sha ncico, mbale ifongomene yakusambilaamo alimwi acapanshi ca ncico, 10shakufwala shabulemu shisalalite shakwe Aloni alimwi abana bakwe isho shakunoofwala na batoosebensa mulimo wa bupailishi, 11mafuta akunanika, alimwi atununkila kabotu twa muMusena Usalalite. Pakupanga shintu shoonse ishi, balyeelete kupanga kweelana ambondakakwaambila.”
Bushiku bwakookesha bwa Cibelu
12Mpeeke Mwaami Lesa wakaambila Mose 13ayi akalwiite bene Isilaeli ayi, “Kamulama nshiku shangu shakookesha sha Shibelu, mukwiinga nkeshibilo ka myaaka yoonse pakati pali ndimwe anebo, kwaamba ayi nebo neMwaami Lesa ndamulengesha kuba bantu bangu. 14Mulyeelete kulama bushiku bwakookesha mukwiinga bulisalalite. Uyo woonse ngweshi akabule kulama bushiku ubo akunoosebensa pali mbubo, uyo ulyeelete kucaikwa. 15Mulicite nshiku shosanwe abomwi nshemweelete kusebensa milimo yanu, sombi bushiku bwasanu ashobilo, mbushiku bwangu ubo busalalite kuli ndime neMwaami Lesa. Uyo woonse weenga wasebensa mulimo uli woonse pabushiku ubo, ulyeelete kucaikwa.#Kulo 20:8-11; 23:12; 34:21; 35:2; Bene Lefi 23:3; Duto 5:12-14 16Anu bene Isilaeli balyeelete kulama bushiku ubo ayi nkeshibilo ka Cipangano. 17Bushiku ubo nkeshibilo ka nshiku shoonse pakati kabene Isilaeli alimwi anebo, ceebo nebo neMwaami Lesa ndakalenga liculu alimwi acishi ca panshi munshiku shosanwe abomwi, ono pabushiku bwasanu ashobilo, ndakacileka kusebensa akookesha.”#Kulo 20:11
18Ono Lesa ndyaakamana kulwiita Mose paKalundu ka Sinayi, wakamupa mabwe obilo apampamene alya, apo Lesa mwiine mpwaakalemba milawo.
Currently Selected:
Kulonga 31: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
