Kulonga 30
30
Cipaililo cakutentelawo tununkila kabotu pakutenta
(Kulo 37:25-28)
1“Upange cipaililo ca cisamu ca mulombe cakutentelawo tununkila kabotu pakutenta. 2Cilyeelete kunokweelenebo mumbasu shoonse, nkokwaamba ayi masentimita ali 45 koonse koonse, sombi masentimita ali 90 kuya mwiculu. Shintu shili anga ngameeca shone isho shili pamakonko one, shilyeelete kunoocatenebo acipaililo. 3Peculu, mumbasu shoonse shone alimwi ashintu shili anga ngameeca, moonse ukananikemo golodi wiine wiine. Alimwi mweela ukashingulushemo mutika wa golodi. 4Mumbasu shobilo sha cipaililo, ukapangilemo shakukobekaamo sha golodi shobilo umo mweshi mukanoobikwa shisamu shakunyamwisha cipaililo. Shakukobekaamo isho ukashipangile munshi lya mutika. 5Shisamu shakunyamwisha shilyeelete kuba sha cisamu ca mulombe isho nsheshi ukananike golodi. 6Cipaililo ici, ukacibike pansengwe lya cisani ico cileleela panembo lya Libokoshi lya Cipangano, panembo lya cifwekesho cankumbu ca Libokoshi lya Cipangano uko nkweshi nkanookumanina awebo. 7Anu lyoonse macuunsa na Aloni wesa mukubamba malampi, ulyeelete kutentelawo tununkila kabotu abuumbi pacipaililo ico. 8Ulyeelete kucita mbomunya ubo pakwisa mukunyasha malampi macolesha. Paceebo ceeci kupa cipo ici ca tununkila kabotu kulyeelete kutolelela lyoonsebo mumashalane anu oonse acisa. 9Pacipaililo ici, tamweelete kupetawo cipo ca tununkila kabotu tukashikwa, mulambu wakutenta uli woonse nabi cipo ca fulaulo. Kuteelesha kutila cipo ca cakunwa pali ncico. 10Aloni ulyeelete kucita kwishibila kwa kusalasha cipaililo linkanda lyomwi pamwaaka. Ulyeelete kunanika bulowa bwa mulambu wakulekelelwa shibiibi pashintu shili anga ngameeca. Nkokwaamba ayi ici cilyeelete kunoocitika lyoonsebo pamwaaka mumashalane anu oonse acisa. Sombi cipaililo ici cilyeelete kunoosalalite cancinencine, cinoolibo caangu nebo neMwaami Lesa.”
Musonko wa muTente ya Cipangano
11Mpomunyaawo Mwaami Lesa wakaambila Mose ayi, 12“Ono pakubelenga bene Isilaeli, musankwa munene woonse ulyeelete kundipila mweelo umwi ulubula buumi bwakwe, kwaamba ayi pakunoobelenga bantu batakacaniki mumwaalu. 13Nkokwaamba ayi muntu woonse weshi akabelengwe ulyeelete kulipila mweelo weelete ngobasuminisha bantu boonse. Muntu woonse ulyeelete kulipila maali ayi ncipo kuli ndime.#Kulo 38:25-26; Mate 17:24 14Aboobo musankwa munene woonse weshi akabelengwe ucite myaaka ili makumi obilo alimwi akuya kunembo, ulyeelete kundipila maali aya. 15Pakulipila maali alubula buumi bwabo aya, muntu mubile teelete kulipila aanji, nabi mukandu kulipila aniini. 16Mwaakubwesa maali aya kuswa kubene Isilaeli, mukaasebenseshe pamilimo ya muTente ya Cipangano. Musonko uyo ulaakuba wakulubula buumi bwabo, aboobo anebo ndaakunoobalama.”
Mbale ifongomene ya bulonse
17Lyalo Mwaami Lesa wakaambila Mose alimwi ayi, 18“Ukapange mbale ifongomene yakusambilaamo ya bulonse acapanshi ca njiyo coonse cikabe ca bulonse. Ukacibike pakati lya Tente alimwi acipaililo akubikaamo maanshi. 19Aloni alimwi abana bakwe basankwa, balyeelete kunoosamba maanshi ayo kumaansa alimwi akumyeendo 20kabatana kwiinjila muTente, nabi kuya kucipaililo mukupa cipo ca shakulya. Lyalo teshi bakacaikwe. 21Balyeelete kusamba kumaansa akumyeendo kwaamba ayi babule kufwa. Uyu ngumulawo kuli Aloni alimwi abamulunyungu lwakwe mumashalane abo oonse acisa.”
Mafuta akunanika
22 #
Kulo 37:29
Mpeeke Mwaami Lesa wakaambila Mose ayi, 23“Ukabwese mafuta eendaawo kununkila kabotu, makilogilamu a mafuta eetwa ayi mule ali 6, makilogilamu a mafuta anunkila kabotu eetwa ayi sinamoni ali 3, makilogilamu a mafuta anunkila kabotu eetwa ayi keni ali 3 24alimwi amakilogilamu a busu bwa kasya ali 6. Shoonse shilyeelete kupimwa pacipimo cakasuminishikwa. Mukasenkanyeeko amalita a mafuta a olifi ali 4, 25kwaamba ayi akabe mafuta akunanika asalalite, ayo acite bweema bubotu. 26Mafuta ayo ukanoonanika Tente ya Cipangano, Libokoshi lya Cipangano, 27tebulu alimwi ashintu sha njiyo shoonse, cakubikawo malampi alimwi ashintu sha ncico shoonse, cipaililo cakutentelawo tununkila kabotu, 28cipaililo cakubengelawo milambu yakutenta ashintu sha ncico shoonse, mbale ifongomene yakusambilaamo alimwi acapanshi ca ncico. 29Shintu ishi shilyeelete kubengwa kuli ndime lyalo shilaakunoosalalite abuumbi, aboobo cintu coonse ceenga cakumyaako cilaakucisikwa ceebo cipaililo cilisalalite. 30Kuswawaawo ukananike Aloni alimwi abana bakwe basankwa, akubabika pabupailishi bwakunoonsebensela. 31Ukalwiite bene Isilaeli ayi, ‘Mafuta aya asalalite akunanika alyeelete kusebensa mumilimo yangu mumashalane anu oonse acisa. 32Tamweelete kunanika bantubo nabi kusebensesha nshila yakusenkanya ayi mupange mafuta amwi a mushobo mbuli wooyo. Mafuta ayo alisalalite, amwebo mulyeelete kwaalanga ayi ncakwiila alisalalite. 33Uyo woonse ngweenga wapanga mafuta ali mbuli ngawo, nabi kunanika muntu umwi uteshi mupailishi, teshi akanoociyeyeelwa kuba mulikoto lya bantu bangu.’ ”
Tununkila kabotu
34Mwaami Lesa wakaambila Mose alimwi ayi, “Ukabwese tununkila kabotu twiitwa ayi sitakiti, onika, galubanamu alimwi afulankinsensi. 35Ukatusebenseshe kwaamba ayi ukapange tununkila kabotu pakutenta ayi tube abweema bubotu. Ukasenkanyeeko amwiinyo ayi shikabe shisalalite cancinencine. 36Shimwi ukatwe kwaamba ayi shibe busu akubutola muTente ya Cipangano. Ukabusanseele kunembo lya Libokoshi lya Cipangano uko nkweshi nkanookumanina amwebo. Tununkila kabotu uto ulyeelete kwishiba ayi tulisalalite cancinencine. 37Mutakeeleshi kupanga tununkila kabotu tunenu munshila njemunya iyi. Mulyeelete kwishiba ayi tulisalalite kuli ndime. 38Na umwi muntu wapanga tununkila kabotu tuli mbuli ntuto ayi atusebenseshe mbuli mafuta anunkila kabotu, teshi akanoociyeyeelwa kuba mulikoto lya bantu bangu.”
Currently Selected:
Kulonga 30: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
