Kulonga 21
21
Kulama basha
(Duto 5:12-18)
1“Ono njeeyi milawo njeweelete kupa bene Isilaeli. 2Na woola mwine Ebulu musha, ulyeelete kukusebensela myaaka yosanwe awomwi. Mumwaaka wasanu ayobilo, ulyeelete kwaangululwa mubusha cakutalipila nabi cintu comwi. 3Ono na taakalinga kweebete ndyaakaba musha wako, pakunooya teelete kutola mukaakwe. Sombi na wakesa kaaebete, pakunooya ulakonsha kutola amukaakwe. 4Ono na mwaami wakwe ngowakamupa mwanakashi wakweeba uyo ngwaakashalilamo baana basankwa abanakashi, mwanakashi uyo alimwi abana bakwe mba mwaami wakwe uyo. Nkokwaamba ayi musha uyo ulaakuyabo eenka. 5Sombi na musha uyo waamba mwiine ayi, ‘Nebo ndimusuni mwaami wangu, mukaangu, bana bangu alimwi nshisuni kwaangululwa.’ 6Lyalo mwaami wakwe uyo ulyeelete kumutola kumusena nkobanambilila neMwaami Lesa. Na bashika, ulyeelete kumwiimika kucisasa nabi kucisamu ca kumulyango akumutulula kutwi. Mpeeke ulaba musha wakwe wa nshiku shoonsebo.#Bene Lefi 25:39-46
7“Ono na musankwa woolisha mwanaakwe mwanakashi busha, mwaana uyo teelete kwaangululwa kweelana abwaangululwa basha basankwa. 8Na woolishikwa kumuntu ucite muyeeyo wakumweeba, sombi wamukaka mukwiinga wabula kumukondelesha, musha mwanakashi uyo ulyeelete kuulishikwa kuli baishi alimwi. Mwaami wakwe inga tamuulishi kubaswamashi, mukwiinga lakwe mwiine taakwe kushomeka kumwanakashi uyo. 9Alimwi na musankwa woola mwanakashi musha kwaamba ayi abe mulokashi wakwe, ulyeelete kumulama anga ngumwanaakwe mwanakashi. 10Ono na musankwa weeba mwanakashi aumwi wabili, ulyeelete kutolelela kupa mukaakwe mutaanshi shakulya ashakufwala bweenka mbuli mbwaakalinga kumupa. Alimwi ulyeelete kupekwa shoonse sheelete mwanakashi wa muŋanda. 11Na waalilwa kupa shintu shotatwe ishi kumukaakwe mutaanshi uyo, ulyeelete kumuleka cakutatambulawo maali naaceyi.
Milawo ya pamicito ya bucayi
12“Uyo woonse weenga wooma muntu, ono pesule uyo woomwa wafwa, alakwe ulyeelete kucaikwa.#Bene Lefi 24:17 13Sombi na ngamapuso, kaatasuni kumucaya, inga walobokela kumusena uyo ngweshi nkamusalile ayi apuluke.#Shakube 35:10-34; Duto 19:1-13; Joshu 20:1-9 14Sombi na muntu wakalala akucaya mubye kashanga, alakwe ulyeelete kucaikwa nabi na wacicila kucipaililo cangu ayi akapulukileeko.
15“Uyo woonse weenga wooma baishi nabi banyina, ulyeelete kucaikwa.
16“Uyo woonse weenga wacata umwi akumuulisha nabi kucatwa kaacimucite, alakwe ulyeelete kucaikwa.#Duto 24:7
17“Awooyo woonse weenga wanyansha baishi nabi banyina, ulyeelete kucaikwa.#Bene Lefi 20:9; Mate 15:4; Maako 7:10
18“Na bantu bobilo balwana, ono umwi wooma mubye libwe nabi likoofi, sombi muntu uyo wabula kufwa, nakubi boobo waciswa cakunooletebo mubulo. 19Uyo wooma mubye teelete kupekwa mulandu na muya nshiku muntu uyo kaabuka akunokweendaako ankooli. Nakubi boobo uyo wakamuuma ulyeelete kulipila mubye ceebo cakumusowela ciindi, alimwi ulyeelete kumulama kushikila akanyumfwe kabotu.
20“Na muntu wooma musha wakwe musankwa nabi mwanakashi musako, mpeeke musha uyo wafwa mpomunyaawo, muntu uyo ulyeelete kupekwa mulandu. 21Sombi na musha uyo weensha bushiku bomwi nabi shobilo kutafwa, mwaami wakwe teelete kupekwa mulandu, mukwiinga musha uyo mbubile bwakwe.
22“Alimwi na bantu bamwi batoolwana, ono bacisa mwanakashi uli bubi akulengesha ayi atikaanye, sombi wabula kucisikwawo munshila imwi, uyo wamucisa ulyeelete kulipila maali ngeenga ibaye wapingula. Maali ayo alyeelete kusuminishikwa aboomboloshi. 23Sombi na mwanakashi uyo wacisikwa bunene, cilyeelete kuba buumi pabuumi, 24liinso paliinso, liino paliino, lyaansa palyaansa, ncimpanta pacimpanta.#Bene Lefi 24:19-20; Duto 19:21; Mate 5:38 25Cilonda ca mulilo pacilonda ca mulilo, cimenga pacimenga, kucisikwa pakucisikwa.
26“Alimwi na umwi muntu wooma musha wakwe musankwa nabi mwanakashi paliinso, ono lyatuluka, ulyeelete kumwaangulula mubusha kwaamba ayi abe ngomalipilo a liinso lyakwe lyatuluka. 27Na wamusokola liino, ulyeelete kumwaangulula mubusha kwaamba ayi abe ngomalipilo a liino lyakwe lyasokolwa.
Bafubi nshebeelete kucita
28“Ono na mucende wayasoola muntu umwi akumucaya, mucende uyo ulyeelete kumucaya kumabwe, alimwi nyama iyo tayeelete kulikwa. Sombi mufubi wa mucende uyo teelete kupekwa mulandu. 29Sombi na mucende uyo lyoonse ulishibite kuyasa bantu alimwi mufubi wa mucende uyo wakalwiitwa, sombi taakwe kunoomucalila mucimpati, na wayasa muntu cakumucaya, ulyeelete kucaikwa kumabwe alimwi mufubi wakwe alakwe ulyeelete kucaikwa. 30Nacibi boobo na mufubi wasuminishikwa kulipila maali kwaamba ayi alubule buumi bwakwe, ulyeelete kulipila maali oonse asunikwi. 31Alimwi na mucende uyo wayasa mwanike musankwa nabi mwanakashi, nkukonkela mulawo ngomunya uyu. 32Na mucende uyo wayasa musha musankwa nabi mwanakashi, mufubi ulyeelete kulipila mwaami wa musha uyo maali a silifa ali makumi otatwe. Alakwe mucende ulyeelete kucaikwa kumabwe.
33“Na muntu umwi wakusha cifwekesho pacilindi nabi wakaba cilindi cimwi, ono wabula kufwekaawo, mpeeke mucende nabi mbongolo yawitaamo, 34ulyeelete kulipila pacifubwa ico. Ulyeelete kulipila maali kumufubi akucaasha cifubwa ico cifwite. 35Alimwi na mucende wa muntu umwi wacaya mucende wa mubye, bantu bobilo abo balyeelete kuulisha wooyo muumi akwaabana maali. Alakwe mucende wafwa uyo, balyeelete kubaana nyama. 36Sombi na cilishibikitwe ayi mucende uyo ulishibite kuyasoola babye, ono mufubi wakwe taakalinga kumucalila mucimpati, ulyeelete kulipila mucende muumi kumubye, akucaasha mucende uyo wafwa.
Currently Selected:
Kulonga 21: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
