Kulonga 20
20
Milawo ili likumi
(Duto 5:1-21)
1Lesa wakaambila Mose maswi aya akwaamba ayi, 2“Ndime Mwaami Lesa, Lesa wanu nendakamukusha mucishi ca Ijipiti umo momwakalinga basha.
3“Utalambili Lesa aumwi, sombibo ndime.
4“Utalipangili shibumbwabumbwa shikoshanya ashintu sha kwiculu, mucishi ca panshi, nabi shili mumaanshi panshi lya cishi. 5Utafukamini cibumbwabumbwa cili coonse nabi kucilambila, mukwiinga nebo neMwaami Lesa, Lesa wanu, ndi shibusuba. Ndapa mulandu bantu abo bampatite, alimwi akubamulunyungu lwabo kushikila akulishalane lyatatu alyane.#Kulo 34:17; Bene Lefi 19:4; 26:1; Duto 4:15-18; 27:15 6Sombi ndabonesha lusuno lwangu kushuulu ashuulu sha baabo bansuni akukonkela milawo yangu.#Kulo 34:6-7; Shakube 14:18; Duto 7:9-10
7“Utasebenseshi liina lyangu mushintu shitaluleme, mukwiinga nebo neMwaami Lesa, Lesa wanu ndaakupa mulandu muntu woonse weshi akabule kusebensesha kabotu liina lyangu.#Bene Lefi 19:12
8“Ingashila bushiku bwakookesha bwa Cibelu alimwi akubusalasha.#Kulo 16:23-30; 31:12-14 9Ulicite nshiku shosanwe abomwi nsheweelete kusebensa milimo yako, 10sombi bushiku bwasanu ashobilo, mbushiku bwangu ubo mboweelete kookesha. Taaku muntu weelete kusebensa pabushiku ubo, nkokwaamba ayi webo, bana bako, basha bako, shifubwa shako nabi baswamashi bekala mucishi cako.#Kulo 23:12; 31:15; 34:21; 35:2; Bene Lefi 23:3 11Munshiku shosanwe abomwi, nebo neMwaami Lesa ndakalenga cishi ca panshi, liculu, lweenge alimwi ashintu shoonse shili muli nshisho. Sombi pabushiku bwasanu ashobilo ndakookesha. Nceceeco nebo neMwaami Lesa, ncendakapeta coolwe bushiku bwakookesha bwa Cibelu akubusalasha.
12“Lemeka baiso abanyoko kwaamba ayi ukekale nshiku shiinji mucishi ico nebo neMwaami Lesa nceshi nkakupe.#Duto 27:16; Mate 15:4; 19:19; Maako 7:10; 10:19; Luka 18:20; Efe 6:2; Efe 6:3
13“Utacaayi muntu, sobwe.#Mata 9:6; Bene Lefi 24:17; Mate 5:21; 19:18; Maako 10:19; Luka 18:20; Loma 13:9; Jemu 2:11
14“Utaciti bulale.#Bene Lefi 20:10; Mate 5:27; 19:18; Maako 10:19; Luka 18:20; Loma 13:9; Jemu 2:11
15“Uteepi.#Bene Lefi 19:11; Mate 19:18; Maako 10:19; Luka 18:20; Loma 13:9
16“Utapi bukamboni bwakubeca pali shikamukobonyoko.#Kulo 23:1; Mate 19:18; Maako 10:19; Luka 18:20
17“Utakumbwi ŋanda ya shikamukobonyoko camunyono. Utakumbwi mukamwiine, musha wakwe musankwa nabi mwanakashi, ŋombe shakwe, mbongolo shakwe nabi shintu shakwe shimwi.”#Loma 7:7; 13:9
Boowa bwa bantu
(Duto 5:22-33)
18Ono bantu ndibakanyumfwa cilulumo alimwi akulila kwa lupeenga, akubona kubeka kwa mfula alimwi abwiishi bwakalinga pakalundu, bakatutuma kuboowa. Mpeeke bakeemikanabo palaale. 19Lyalo bakaambila Mose ayi, “Twaambilebo webo weenka, tutoonyumfwa. Tutooloonda ayi na Lesa aambe aswebo, tutoofwa.”#Ebulu 12:18-19 20Mose wakabakumbula ayi, “Mutaloondi, mukwiinga Lesa wesabo mukumweelesha akulengesha ayi mutolelele kumunyumfwila kwaamba ayi mutakabishi.” 21Sombi bantu bakalingabo mpomunyaawo palaale, eenkabo Mose ngowakasena pafwaafwi alikumbi lishiya apo pakalinga Lesa.
Milawo ya shipaililo
22Mpeeke Mwaami Lesa wakaambila Mose kulwiita bene Isilaeli ayi, “Mwaboona mbuli ndime neMwaami Lesa mbondaamba amwebo kuswa kwiculu. 23Tamweelete kulipangila balesa ba silifa nabi golodi twakunoolambila pantu pomwi anebo. 24Mumpangile cipaililo ca bulongo apo mpweshi mubengele milambu ya mbelele, mpongo alimwi aŋombe isho sheshi shitentwe shoonse, alimwi ayi shibe milambu ya bwanabwankashi. Pamusena woonse mpweenga ndasala ayi munoonambilila, ndaakwisa kuli ndimwe mukumupa coolwe. 25Na mukampangile cipaililo ca mabwe, mutakapangishi mabwe akubesa mukwiinga na mwasebensesha ceela cakubesesha mabwe, nkokwaamba ayi mwaamana ncito kuli ndime.#Duto 27:5-7; Joshu 8:31 26Mutakampangili cipaililo cicite pakutantila. Na mukacite boobo, mulaakubonesha matakosha anu nobeene pakunooyacitanta pali ncico.”
Currently Selected:
Kulonga 20: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
