Kulonga 18
18
Jetulo mbwaakafwakashisha Mose
1Ono mupongoshi wakwe Mose musankwa wiitwa ayi Jetulo, mupailishi wa mucishi ca Midyani, wakanyumfwa shoonse Mwaami Lesa nshaakacitila Mose alimwi abene Isilaeli ndyaakabatanjilila kubakusha mucishi ca Ijipiti. 2Paceebo ceeci wakesa kuli Mose, kaali aSipola mukaakwe Mose uyo wakalinga wacaala kwisule, 3pantu pomwi aGeshomu alimwi aEliyasa, bana bakwe basankwa bobilo. Mose wakaambaawo kale ayi, “Ndaba muswamashi mucishi ceensu.” Aboobo wakatumba mwanaakwe musankwa umwi ayi Geshomu.#Kulo 2:21-22#Mili 7:29 4Wakaambaawo kale alimwi ayi, “Lesa uyo wakalinga kulambila bata wakancafwa alimwi akumpulusha mumaansa amwaami wa mucishi ca Ijipiti uyo wakalinga kusuni kuncaya.” Aboobo wakatumba mwanaakwe musankwa umwi ayi Eliyasa. 5Anu Jetulo, pantu pomwi amukaakwe Mose alimwi abana bakwe basankwa bobilo, bakesa muluyanga, kukalundu kasalalite uko Mose nkwaakalinga wayaka misumba. 6Ceebo Jetulo wakalinga watuma kale maswi ayi, “Nebo nemupongoshi wako ndi munshila pantu pomwi amukaako alimwi abana bako.” 7Mose wakamucinsha. Ndibakakumana, Mose wakafukama akumufyonta. Kuswawaawo bakeepushanya mbuli mbobakalinga kubuka, akwinjila mumusumba wakwe Mose. 8Mpeeke Mose wakalwiita Jetulo shoonse Mwaami Lesa nshaakacitila mwaami Falawo alimwi abene Ijipiti, kwaamba ayi afune bene Isilaeli. Wakamulwiita amapensho oonse ngobakabaawo mulweendo alimwi ambuli Mwaami Lesa mbwaakabapulusha. 9Jetulo ndyaakanyumfwa makani oonse aya, wakasangalala 10akwaamba ayi, “Aalumbaishikwe Mwaami Lesa uyo wakamupulusha mumaansa a mwaami Falawo alimwi abene Ijipiti! Aalumbaishikwe Mwaami Lesa uyo wakapulusha bantu bakwe mubusha! 11Ono ndeshiiba ayi Mwaami Lesa ulicite nkusu kwiinda pabalesa boonse, mukwiinga wakacita boobo ciindi bene Ijipiti ndibakalinga kubona bene Isilaeli ayi taaku mbobabete.” 12Lyalo Jetulo wakaleta mulambu wakutenta amilambubo imwi akubenga kuli Lesa. Mpomunyaawo Aloni alimwi abamatanjilili boonse bene Isilaeli bakayaakwe mukulya nyama iyo yakapekwa kuli Lesa ayi bamulambile.
Kusalwa kwa boomboloshi
(Duto 1:9-18)
13Pabushiku bwakaboolaawo, Mose wakalinga koombolosha bantu abo bakalinga kucite milandu. Aboobo wakasebensa kuswa macuunsa kushikila amacolesha. 14Ono Jetulo ndyaakabona milimo yoonse iyo yakalinga kucita Mose, wakamwiipusha ayi, “Ino nciinshi ici ncootoocitila bantu? Ceebonshi utoocita milimo iyi weenkabo abantu kabakushingulukite pano kuswa macuunsa kushikila amacolesha?” 15Mose wakamukumbula ayi, “Ndyeelete kucita bobulya mukwiinga bantu balesa kuli ndime ayi beshibe kuyanda kwakwe Lesa. 16Na bantu bobilo batoopikishanya, balesa kuli ndime. Mpeeke anebo ndyeembona ululeme awabisha. Kuswawaawo ndabalwiita milasho alimwi amilawo yakwe Lesa.”
17Lyalo Jetulo wakaamba ayi, “Ici ncootoocita taciluleme, sobwe. 18Utoolilemyabo omwiine alimwi akulemyabo baabo bantu. Iyi ncito njinene abuumbi alimwi tooelete kwiisebensa weenka. 19Ono nyumfwa nkulwiiteko mboweelete kucita, kwaamba ayi Lesa akucafweeko. Ncibotu ayi webo ubebo shikwiimikaninako bantu kuli Lesa alimwi akuleta matongooshi abo kuli nguwe. 20Ulyeelete kubeeisha milasho amilawo yakwe Lesa akubasansulwita mbuli mbobeelete kwikala alimwi anshebeelete kucita. 21Sombi kwiilikaawo, ulyeelete kusala basankwa bamwi beenga basebensa mulimo wa butanjilili. Bamwi balyeelete kuba batanjilili ba bantu bali cuulu, bamwi mwaanda, bamwi makumi osanwe alimwi abamwi likumi. Bantu abo mbweshi ukasaale balyeelete kuba bantu balemeka Lesa, bashomeka alimwi batakoonshi kutambula mashinka kanwa. 22Alimwi balyeelete kuba boomboloshi ba bantu lyoonsebo. Lyalo inga kabaleta milandu iyumu kuli ndiwe, sombi balyeelete kunokoombolosha yeeyo yoonse iniini beene. Ici cilaakukuubilaako ceebo milimo njewalinga kucita weenka, balaakuyaabana. 23Na ukacite boobo kweelana abutokwaamba Mwaami Lesa, teshi ukalilemyeewo alimwi bantu boonse aba balaakunooya mumaandaabo, amilandu yabo keemanite.”
24Mose wakanyumfwila maswi akamulwiita Jetulo. 25Wakasala basankwa beenga basebensa kuswa pabene Isilaeli boonse. Wakabasala ayi babe batanjilili ba bantu, bamwi ba bali cuulu, bamwi mwaanda, bamwi makumi osanwe alimwi abamwi ba bali likumi. 26Balo bakalingabo boomboloshi ba bantu lyoonse, kunootola milandu iyumu kuli Mose sombi kaboombolosha milandu iniini beene.
27Mpeeke Mose wakalashanya aJetulo uyo wakaboola kumishaabo.
Currently Selected:
Kulonga 18: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
