Kulonga 17
17
Maanshi akaswa mumwaandami
(Shakube 20:1-13)
1Mpomunyaawo bene Isilaeli boonse bakaswa muluyanga lwiitwa ayi Sini, kabaya bweenda kuswa kumusena umwi akuya kumwi, kweelana ambwaakalinga kubalwiita Mwaami Lesa. Ndibakashika kuLefidimu, bakayaka misumba sombi tekwakalinga maanshi akunwa. 2Paceebo ceeci bene Isilaeli bakatongookela Mose akwaamba ayi, “Tupe maanshi akunwa.” Mose wakabakumbula ayi, “Ino mutootongookelanshi? Mutokweelesheshanshi Mwaami Lesa?”
3Sombi bantu bakanyumfwa nyotwa abuumbi, akutolelela kutongookela Mose. Bakamwaambila ayi, “Sa wakatukusha mucishi ca Ijipiti, akutuleta kokuno ayi utucaaye, bana besu alimwi ashifubwa shesu kunyotwa?” 4Mpeeke Mose wakapaila cakulilila Mwaami Lesa ayi, “Ino bantu aba ntoobacita buyani, mukwiinga balilibambite kunguma mabwe?”
5Mpomunyaawo Mwaami Lesa wakaambila Mose ayi, “Itawo bamatanjilili ba bene Isilaeli bamwi akutanjila kunembo lya bene Isilaeli boonse. Unyamune ankooli iyo njewakoomishako paMulonga wa Nailo, unooya. 6Nebo ntokwiimikana kunembo lyako kumwaandami wa kuKalundu ka Sinayi. Uume nkoli yako mumwaandami uyo, lyalo maanshi atooswa muli nguwo kwaamba ayi bantu banwe.” Aboobo Mose wakacita mbomunya ubo pameenso a bamatanjilili ba bene Isilaeli.
7Mpeeke musena uyu bakootumba ayi Masa alimwi ayi Meliba, mukwiinga bene Isilaeli bakatongooka alimwi akweelesha Mwaami Lesa ndibakaamba ayi, “Sa Mwaami Lesa ncakwiila uli aswebo nabi tau?”#Shakube 20:2-13
Nkoondo abene Amaleki
8Kuswawaawo, bene Amaleki bakesa akutalika kulwana abene Isilaeli kuLefidimu. 9Lyalo Mose wakaambila Joshuwa ayi, “Sala basankwa bamwi kwaamba ayi bakaye mukulwana abene Amaleki ciilo. Nebo ndaakwiimikana peculu pakalundu, kaancite ankooli iyo Lesa njaakandwiita ayi nyamune.” 10Aboobo Joshuwa wakacita kweelana abwakamulwiita Mose, akuya mukulwana abene Amaleki. Sombi Mose, Aloni alimwi aElu bakatanta peculu pakalundu. 11Paciindi ico Mose ncaakalinga kutambikite maansa mwiculu, bene Isilaeli bakalinga kukoma. Sombi na waaloshesha panshi, bene Amaleki bakalinga kutalika kukoma. 12Ono maansaakwe Mose ndyaakacisa kutambika mwiculu, Aloni alimwi aElu bakamuletela libwe ayi akaleewo. Mpeeke balo bakeemikana umwi kululyo aumwi kucipiko, akucatilila maansaakwe kwaamba ayi anoolibo mwiculu kushikila kwipila kwa lisuba. 13Munshila iyo Joshuwa wakakoma bene Amaleki cakumaninina.
14Lyalo Mwaami Lesa wakaambila Mose ayi, “Ulembe mbuli mbondakoma munkondo iyi kwaamba ayi bantu bakanokwiibalukilaako. Alimwi ulwiite Joshuwa ayi ntoolengesha bantu kubula kwiibalukawo tubili bene Amaleki.”#Duto 25:17-19; 1 Samwe 15:2-9 15Mpomunyaawo Mose wakayaka cipaililo akucitumba ayi, “Mwaami Lesa njembembela yangu yakukoma.” 16Alimwi wakaamba ayi, “Amunyamune mbembela ya Mwaami Lesa mwiculu! Mwaami Lesa ulaakutolelela kulwana abene Amaleki inshiku shoonse!”
Currently Selected:
Kulonga 17: BBBLI
Highlight
Copy
Compare
Share
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.
