Baluku 4
4
1Busongo ndyelibuku lya Milawo yakwe Lesa,
Milawo yakwe ilaakubako
kushikila lyoonse alyoonse.
Boonse bakonkela busongo ubo, balaakuba abuumi,
sombi beshikubusowa balaakufwa.
2Boolelaamo Jakobo use ucane busongo,
weende kuya ncikonkela
kubala kwamumuni wambubo.
3Utapi bulemu kumuntu umwi
nabi kupa coolwe kubeensu.
4Tulicite webo Isilaeli,
ceebo tulishi shikondelesha Lesa.
Kumbulushikwa kwaJelusalemu
5Amuyumye myooyo nobantu bangu,
ndimwe nomutabilisha
liina lya Isilaeli!
6Bakamuulisha kubantu bakusengwe,
sombi kuteeshi ayi munyonyoolwe,
sombi mwakaabwa kubalwani
banu ceebo cabukali bwakwe Lesa.
7Mukwiinga mwakamukalasha Cilenga wanu,
pakutola milambu kutulesa twanu,
paciindi cakutola kuli Lesa.
8Mwakaluba Lesa walyoonse alyoonse
uyo wakamulela.
alimwi mwakanyumfwisha nsoni
Jelusalemu uyo wakalinga
anga mbanyina wanu.
9Lakwe wakabona bukali bwakwe Lesa kabumuwita,
lyalo wakaamba ayi,
“Amunyumfwishe nobantu nomukala mu Siyoni
Lesa watutumina mapesho anene anene.
10“Ndakabona banabangu
basankwa abanakashi kabatolwa busha
uko Lesa wamuyayaya nkwakabatumisha.
11Ndakabalela akukondwa
sombi pakubona babatola busha,
ndakanyumfwa nsoni akulila.
12Kutabi eshi asangalale anebo nemukalubinje,
nendakafwitwa baanji baanji.
Bakanshiya neenka mumatongo,
ceebo cakubisha kwa banabangu.
13Tabakwe kwilemenesha milawo yakwe,
nabi kweenda munshila
shakubulwa kwakwe Lesa
nabi kweenda munshila ya mulasho
mukukonkela bululami bwakwe.
14“Ono amuse kokuno,
mwebo nobantu nomukala pafwaafwi aSiyoni!
Amwibaluke busha bwa bantu
bangu kucishi ceensu
uko Lesa wamuyayaya
kwakabatuma ayi abape mulandu.
15Lesa wakabaletela mushobo wakulaale,
kwaamba ayi ese abalwaane,
mushobo utacite nsoni,
waamba mushobo utanyumfwiki,
mushobo utacite bulemu kubamanene,
mushobo utacite nkumbu kubaana koonse.
16Bantu bamushobo uyu
bakabwesa baana basankwa
abo basunikwi abanyina
wabo bamukalubinje
bakatola abaana banakashi
banyina wabo abo bakacala beenka,
kubashiya kabalila.
17“Sombi nebo inga ndamucafwa buyani?
18Muntu wakamuletela mapesho aya,
ngweshi akamufune kubalwani banu.
19Kamuya, nobanabangu, kamuyabo,
ceebo mwanshiya kale neenka.
20Ndafwala shaluumuno,
ndafwala masaka amalilo.
Ndaakulila kuli Lesa wangu walyoonse alyoonse
pabuumi bwangu boonse.
21“Amuyumye myooyo nobanabangu,
mupaile kuli Lesa.
Lakwe ulaakumupulusha kumapesho
akubalwani banu.
22Nebo ntooshoma ayi
Lesa wanshiku shoonse
ulaakumupulusha.
Musalalite uyo wansangalasha ceebo ca nkumbu
isho sheshi shikamupolele pakutacelwa
kuswa kumupulushi wanu wamuyayaya.
23Ndishi kwaamba ayi mutooya kulale,
mulyungumene mumoyo wanu,
akulila mumeenso anu.
Sombi Lesa ulaakumuboosha kuli ndime,
mulikondetwe ayi mukale anebo kwa lyoonse alyoonse.
24Bantu bekala pafwaafwi aSiyoni,
abo bakamubona mwabwesekwa busha,
pakutacelwa balaakubona Lesa akamupulushe.
Kupuluka uko cilaakumupolela abulemu bunene abunene
bwakwe Lesa wamuyayaya.
25Nobanabangu, kamukalika amoyo mukupenga
bukali bwamushikila bwaswa kuli Lesa.
Ee! Beshilumamba bali mucite
sombi mutoobanyonyoola coonoono,
alimwi mulaakubalyatoola lyatoola
kushikila bakafwe.
26Banabangu basunikwi bakeenda mishinso ilaamfu,
bakabatola anga nimbelele
shitacite mweembeshi,
kutolwa abalwanibabo.
27“Amuyumye myooyo nobanabangu,
mupaile kuli Lesa,
ceebo uyo wakamupensha camushobo uyu,
uyo eenka ngweeshi akamwiibaluke.
28Mbuli mbomusuni nobeene,
mwakashiyana aLesa,
bweenka ubo mulakuboolela kuli Nguwe,
mumuyandoole amoyo wanu woonse.
29Pakwiinga mbuli Lakwe
wakamuwaala mumapesho,
bweenka ubo ulaakumupulusha,
alimwi mulakwikala kamusangalete kushikila muyayaya.”
Kusangalashikwa kwa bene Jelusalemu
30Yumya moyo webo Jelusalemu.
uyo wakakupa liina ilyo,
eenka uyo ulakukusangalasha.
31Bantu abo bakakucita shibiibi
bakakondwa kunyonyoolwa kwako,
mapesho alakubashikila.
32Kundabala isho kubakapengela
banabako mubusha,
kulakuboneka mapesho.
Mapesho alimwi alakuwita ndabala
iyo yakatambula banabako baangitwe.
33Pakwiinga bweenka mbuli ndabala iyo
mbuyakakondwa kuwa kwako,
kusangalala paceebo cakunyonyoolwa kwako,
bweenka ubo ndabala iyo ilakupenga.
Paciindi ico ayalo ilakupasuka.
34Ndaakwinyaya lusangalalo
ceebo kulinyumfwa kuli mubuunji bwabantu bakwe,
kusangalala kwakwe kulakuba malilo.
35Mulilo weshi ukaswe kuli Lesa walyoonse alyoonse
ulaakutenta ndabala iyo panshiku shiinji,
lyalo kwenka uko kulakuba amyuuya ibiibi
paciindi cilaamfu.
36Langa kucwe, webo oJelusalemu,
bona cisangalashi ico
Lesa ncatookutumina.
37Bona batoosa banabako,
abo mbuwakabona kabaya kucishi ceensu.
Ncakwiila batoosa,
Usalalite ulya akubabunganya
kuswa kucwe kushikila a kumbo
kabasekelela bulemu bwakwe Lesa.
Currently Selected:
Baluku 4: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.