2 Makabisi 9
9
Kufwa kwakwe Antyokusi Epifane
1Ciindi ico Antyokusi wakaswaako ansooni kucishi ca Pesha. 2Wakenjila mundabala ya Pesepolosi, kaasuni kunyaya buboni bwamuŋanda yatulesa twabo ayi abe mweendeleshi wandabala iyo. Sombi bantu bakooko bakamubukila bamutandaanya a shilwanyo shabo mumaansa, lyalo Antyokusi abantu bakwe bakacica. Beene ndabala iyo bakamutandaanya, lakwe waboolela ansooni shiinji. 3Ndyaakashika ku Ekibatana, wakanyumfwa isho shaakacita Nikanoli abeshilumamba bakwe Timoti. 4Wakakalala abuumbi, kuboosha cishole kubaJuda paceebo camusampu ngobakamucitila ndyeebakamutandaanya. Lyalo wakaambila beshilumamba beensha cikoci ayibanyamune cikoci kuya kuJelusalemu kuteemikana. Ono koombolosha kwakwiculu kwakalinga palinguwe, pakwiinga mukulinyufwa kwakwe wakaamba ayi, ono ndaakushika kuJelusalemu, ndakusandula ndabala isho shikabe shuumbwe sha baJuda.
5Sombi Mwaami Lesa ubona shoonse, Lesa wabene Isilaeli, wakamupensha pakumupa malwashi atashilikiki alimwi ataboneki. Antyokusi ndyakaambabo maswi akwe, mumala mwakatalika kucisa kwakutacileka, kamunyona abuumbi. 6Ishishakalinga kumweelete pakwiinga wakapensha bantu bamwi ayi baciswe mumala munshila shishiyene shiyene. 7Nacibi boobo taakwe kucileka kuyobeka, lyalo kulinyumfwa kwakwe kwakeendaawo. Wakakunka mulilo wabukali bwakwe kubaJuda, waambila shikumweensha kwaamba ayi eendeshe paceebo ceeco wakawa pa cikoci cakalinga kucica, lyalo pakuwa wakalicisa mubili woonse koocisa. 8Sombi lakwe taana kucileka kuyobeka kwakwe, akulisumpula kwakwe kwakeendaawo. Wakakunka mulilo wabukali kubaJuda, waambila wakalinga kumweensha ayi eendeshe. Paceebo ceeco wakawa pa cikoci cakwe mubili woonse. 9Pesule mumeenso akwe mwakalinga kuswa mapila, lyalo kaacili muumi, minyemfwu ya mubili wakwe yakaboola, kanyumfwa kucisa abuumbi paceebo cakuboola kwamubili wakwe beshilumamba bakalinga kunyumfwa bunya. 10Paceebo cakununka bunene, teepakalinga nabi womwi wabantu bakwe wakalinga kusumina kunyamuna mubili wakwe, kabalangabo mwiculu.
11Kuswa waawo wakacileka kulinyumfwa kwakwe kunene, wakatalika kubaako amaano, pakubona ayi Lesa wamupensha bobulya, pakwiinga wakalinga kunyumfwa kucisa lyoonse. 12Ono paceebo cakwaamba ayi alakwe mwiine kununka takukwe kushibila, lakwe wakaamba ayi, “Ncibotu kumunyumfwila Lesa, alimwi taaku muntu utoofwa kayeeya ayi ulyeelene a Lesa.”
13Pesule lyakwe muntu mubiibi uyo wakapaila ku Mwaami Lesa, uyo utooboneka ayi tatoomucitila nkumbu. 14Lyalo wakaambisha ayi ndabala isalalite njaakali kucicila ayi aisale akwaamba ayi ibe momushuumbwe shaba Juda, sombi ono ilyaangulukite. 15Ono bamaJuda abo mbakalinga kuyeeya ayi tabeelete kubabika mushuumbwe sombi ayi nkubasowabo abanababo boonse ayi shiyuni a shiloongolo shikabalye, ono lakwe ayi ulakubeelanisha akubantu bakuAtenesi. 16Ono Ŋanda yakwe Lesa njaakabanyaya ashintu shoonse, bakaibotesha ashintu shibotu. Balaakuboosha mbale shisalalite shoonse isho akubikaawo ashimwi shibotu, ashalo ndalama shiyandwa kumulambu balakukusha kulibokoshi lyakwe. 17Wakashomesha ayi kubikaawo pashoonse isho lakwe uyo ulaakusanduka muJuda, lyalo ulaakufwakashisha shishi shoonse shabantu, ayi akamushimike nkusu shanu.
Antyokusi mbwaakalemba nkalata kubaJuda
18Antyokusi ndyaakabona ayi mapesho akwe tatoomana, cakali kuyandika nkoomboloshekwa kuli Lesa cakalinga kumweelete wakasowa lushomo wakalemba nkalata ili anga ngumupailo. Nkalata iyo yakalinga bobulya:
19“KubaJuda, bantu bangu babulemu, nebo Antyokusi, mwaami wanu amutanjilili wabeshilumamba ntoomwaansha, ntooshoma ayi muli bayumu abuumi bubotu.”, 20“Na muli kabotu abaana boonse, na makani oonse atookweendabo kabotu, ndalumba abuumbi ono nebo lushomo lwangu luli kuli Lesa. 21Ntoomuyeeya amoyo usangalete ucite bulemu ankumbu shoonse isho shemutoombonesha, kuswa kucishi ca Pesha, lilya ndyeendakalinga kuciswa bulwashi buyoosha. Ono ndakayeeya ayi ntalike kubambila bantu shaluumuno. 22Teeshi kwaamba ayi ndabisha moyo, sobwe, ntoolindila isho sheshi nkacite. 23Ndakacibona ayi bata ndyeebakalinga kuya cilwana mucishi catulundu, wakasalila limwi muntu shikulya liina lyakwe. 24Naawacita boobo ayi shimwi nashacitika mu kuteshiba, paanshi kwesa maswi alupesho, bantu bamucishi batakapengi, inga kabashi kale ayi uyu ngomwaami. 25Kunungaawo, apo, ndishi ayi, bamwi balashisa abaabo boonse beelete kuba baami ayi tubone sheshi shacitika, paceebo ceeco ndeeta mwanaangu Antyokusi ayi ese abe mwaami mumusena wangu. Palya ndyeencendela misena imwi ya cishi cesu, ono ndisuni kushiya mumaansaanu nobamwi inga kamumulangaako. Alakwe ndamulembela nkalata yeenka iyo. 26Ono ntoomusenga ayi mwibalukile limwi shintu shibotu shendakamucitila pantu pomwi ndabona womwi aomwi muli ndimwe. Amwebo mwindilishe kutunyumfwila nkumbu nebo amwanaangu. 27Ntooshoma ayi alakwe ulaakukonkela muncito yangu amoyo ubotu alimwi ubombu.”
28Ulya muntu ucaya babye ngu muntu usampula Lesa. Akapenge amapesho anene, eelene aayo ngakapensha babye, bakakufwita kucishi cabeene pakati kamalundu. Bakafwa alufu lwa mapesho anene. 29Filipo, mubye wakalekale, wakatola malilo kumishaabo. Ono paceebo cakuloonda Antyokusi mwanaamwaami, wakacicila kuIjipiti kuli Pitolemi Filometa.
Currently Selected:
2 Makabisi 9: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.