2 Makabisi 8
8
Nkondo itaanshi yakwe Judasi wiitwa ayi Makabisi
1Ono Judasi uyo wiitwa ayi Mkabisi pantu pomwi ababye, wakenjila cakuteshiba mundabala, wakeeta bamakwabo ayi bese. Wakasalabo beenka bakonkela kulambila kwaciJuda, wakabunjika bantu bashika ku 6,000 pantu pomwi. 2Wakasenga Mwaami Lesa ayi alangilishe akucafwa bantu babo abo bantu bamishobo imwibo yoonse mbobatobalyatilila, ono ayi ayinyimfwile nkumbu Ŋanda yabo iyo bantu batapaili mbobakaibisha. 3Wakasenga alimwi ayi aibete nkumbu ndabala njebakawisha paanshi peene, alimwi ayi anyumfwe malowa atoolila kuli nguwe. 4Alimwi wakasenga ayi ayeeye baana baniini batacite shibiibi abo bakacikwa, ayi aceeshe bukali bwakwe pabantu batooyanda liina lyakwe.
5Makabisi wakabamba kabotu beshilumamba bakwe, bantu bamishobo imwi tebakalinga kukonsha kumukoma, pakwiinga bukali bwa Mwaami Lesa bwakasanduka nkumbu. 6Wakalinga kweenda cakubenda akutenta ndabala amishi. Wakanyaya misena ibotu yakulwaninamo nkondo, wakabatandaanya balwani baanji. 7Wakeshiba ayi ciindi camashiku ncecibotu cakulwaninamo nkondo ishi. Lyalo impuuwo yakanyumfwika koonse.
Pitolemi wakatuma Nikanoli mukulwana abaJuda
8Filipo wakabona ayi Judasi utonyaya cishi paniini paniini, akukoma balwani bakwe baanji, wakalemba nkalata kuli Pitolemi, Mweendeleshi waku Silya a Fenisha, ayi ese ancafwe pancito shakwe shalwanguluko. 9Muciindi ciniinibo Pitolemi wakatuma Nikanoli, mwanaakwe Patilokilusi womwi wa mweenshinyina a mwaami. Bakamupa beshilumamba beendilila pa 20,000 bamishobo imwi ishiyene shiyene, ayi anyonyeete limwi mushobo woonse wabaJuda. Pantu pomwi a Gogiyasi uyo wakalinga mutanjilili munene wankondo. 10Nikanoli wakalinga kusuni ayi acane ndalama shamusonko shikwana 68,000 kilogilamu sha silifa, isho mwaami sheelete kulipila ku Loma, ashicane pakuulisha bantu baciJuda beshi bakacatwe. 11Ono kutasowa ciindi wakatuma maswi kumandabala ali pafwaafwi a Lweenge Lunene, ayi bese bakoole basha. Bakanyumfwana ayi pa basha 90 balaakubapa makilogilamu 34 a silifa. Takwekwishiba mapesho ngeshi akamucite uyo Shinkusu Shoonse.
12Judasi ndyaakanyumfwa ayi Nikanoli utoosa, wakashibisha babye shankondo itoosa iyo. 13Lyalo bamwi bakalinga kucite moyo ulefukite alimwi utacite lushomo lwabululami bwakwe Lesa bakacica akuya kumwi. 14Ono bamwi bakoolisha shoonse shakacalaawo, lyalo kabapailabo kuMwaami Lesa ayi abafuune babyaabo abo Nikanoli utanyumfwi shilya shakaboolisha kaatana kukumanaakwe pa nkondo. 15Bakapaila bobulya teshi kwaamba ayi beene beenka sobwe, sombi mulandu wacipangano ico Mwaami Lesa ncaakacita abashalibabo, alimwi pakwiinga liina lyakwe lisalalite a lya bulemu bukabe pakati kabo. 16Ono Makabisi wakabunganya bantu bakwe 6,000 beshikumukonkela. Wakabalwiita ayi mutaloondi balwani abo, alimwi mutapenshekwi kufula bakunsengwe, mutalwani abo pakubula bululami. Lyalo wakabaambila ayi balwane nkondo amoyo uyumu. 17Pakwiibaluka incito shabakunsengwe abo shibisha musena usalalite, shakupwayoola ndabala ashakuyanda kukasha milawo yabashalibabo. 18Wakaamba ayi, “Balo batooshoma shilwanyo shabo abusankwa bwabo, swebo tutooshoma muli Lesa Shinkusu Shoonse lakwe kubakumyabo ulakoonsha kubawisha paanshi bantu basuni kulwana aswebo nabi kumanisha cishi coonse capaanshi.”
19Alimwi Judasi wakabeebalusha shalucafwo ulo Lesa ndwaakacafwa bashalibabo, bunene paciindi cakwe Senakelibu, cilya ciindi bantu bakwe 185,000 ndibakamfwa. 20Paciindi cimwi alimwi ico kuBabiloni baJuda ndyeebakalwana nkondo aba Galasha baJuda bakalingabo 8,000, bantu bakuMasedonya bakalinga kubacafwa kabali 4,000. Nabi bakuMasedonya bakasenkana, abaJuda 8,000 balya bakabacafwa akukoma bantu 120,000, paceebo calucafwo ulo lwakaswita kwiculu. Pesule bakabanyaya shintu shiinji.
21Wakabaambila boobo akubalwiita ayi basumine kufwita milawo yakwe Lesa a cishi cabo ncebakababaanya mumakoto one. 22Bakwabo Simoni, Josefe a Jonasani bakabapa ncito yakunoolama makoto otatwe muntu womwi kaacite bantu 1,500.
23Ono wakabalwiita ayi Elyasa abelenge anyumfwike kabotu maswi amulibuku lisalalite, lyalo wakabelenga maswi aya ankondo ayi, “Lesa ulatucafwa.” Mpeeke lakwe wakatanjilila likoto lyapanembo. Ono wakaya mukulwana a Nikanoli.
24Pakwiinga Shinkusu Shoonse ulabacafwa, balo bakacaya balwani baanji bakwe Nikanoli, likoto lyoonse lyankondo bakalitandaanya. 25Bakabanyaya ndalama shilya shabantu basuni bakese mukuula basha. Bakabatandaanya balwani kulaale paniini, bakaboola kwisule pakwiinga ciindi cakamana. 26Bulya bushiku bwakalinga bwakulibambila bwa Cibelu, ncebatakwe kubakonkela. 27Ono bakabwesa shilwanyo shabalwani akubanyaya buboni bwabo, lyalo bakasalasha bushiku bwa Cibelu akulumba Mwaami Lesa, paceebo cakubafuna pabushiku ubo mbobakasala ayi atalike kunoobacitila nkumbu. 28Pabushiku bwa Cibelu ndyeebwakeenda bakabaambila bantu shintu shebakasaala kubalwani balya bakapenga kunkondo, shimwi bakaabila bamukalubinje abanabanshiwa lyalo bakabaana shakacalaawo. 29Ingayi bamane, bakapaila boonse pantu pomwi bakasenga Mwaami Lesa Shinkumbu ayi banyumfwane camaansa obilo abasebenshibabo.
Judasi mbwaakakoma Timoti aBakidesi
30BaJuda alimwi bakalwana nkondo a Timoti aBakidesi akucaya bantu bakalinga 20,000, wabanyaya shaanda shankondo shilaafu abuumbi sha kasaalwa shakalinga shiinji abuumbi, bakashaabanyabo kabotu, shimwi shakapekwa kubeene bakashipengela, alimwi abanabanshiwa, bamukalubinje abacembele. 31Bakabwesa shilwanyo shabalwani, bashibika pamusena ubotu. Ono shakacalaawo abakayaasho kuJelusalemu. 32Bakacaya a mutanjilili wabeshilumamba wakwe, Timoti, wakalinga muntu mubiibi abuumbi, ngowakacita shibiibi shiinji kubaJuda. 33Panshiku isho ndyeebakalinga kusekelela ndabala yabashalibabo, bakatenta balwanibabo abo kalekale bakatenta shisasa shisalalite shaŊanda ya Lesa. Balwani abo ngu Kalisiteni abantu bamwi, abo bakacicila muŋanda iniini. Aboobo bantu abo bakatambula lupesho lwa shibiibi shabo.
34Nikanoli, muntu wakashinganwa wakeeta 1,000 basambashi ayi aboolishe baJuda, 35wakakomwa a nkusu sha Mwaami Lesa asha bantu balya mbaakalinga kuyeeya ayi taaku mbobabete. Wakafwala shakufwala shakwe shibotu shankondo. Waswaawo bwangu eenka anga ngumusha waloonda, keendabo kabotu kwakutakusha amoyo kuya mukushika aku ndabala ya Antyoki wakasowa beshilumamba bakwe. 36Lakwe wakalinga kuyeeya shakusonkesha musonko kubaLoma ayi oolishe baJuda bakuJelusalemu busha, wakatondesha nkumbu shakwe ayi nkwaali mufuni, aboobo baJuda tabakoonshi kukomwa, pakwiinga balakonkela milasho yakwe.
Currently Selected:
2 Makabisi 8: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.