2 Makabisi 3
3
BakuSilya mbobakatalika kupensha baJuda
1Ciindi ceenka ico bantu bakumushi usalalite wakalinga kucite luumuno, alimwi bakalinga kunyumfwa kabotu milawo yoonse yakwe Lesa, pakwiinga Onyasi munene wabapailishi, wakalinga shikupaila alimwi wakalinga kupatite shibiibi. 2Nabi bamaami abalo bakalinga kulemenesha musena uyo akupa bulemu kuŊanda yakwe Lesa akupa shipo shibotu. 3A Selekusi alakwe, mwaami wakuEsha, wakalinga kukusha ndalama mulibokoshi lyakwe ayi ape mulambu kumilambu iyandika yoonse ishiyene shiyene.
4Bushiku bumwi muntu umwi liina lyakwe nguSimoni wakumukowa wakwe Benjameni, uyo lakwe wakalinga munene shikweendelesha shintu muŊanda yakwe Lesa, wakapusana amunene wabapailishi pamilawo yamumushika wamundabala. 5Pakucana kwaamba ayi taakwe kunyumfwana a Onyasi, wakaya kuli Apolonyasi mwanaakwe Telaseyo, uyo ciindi ico ngowakalinga Muleli Munene waku Silya aku Fenisha. 6Simoni wakamulwiita ayi mulibokoshi lyamaali amuŊanda yakwe Lesa yaku Jelusalemu muli maali atashishitwe atashibikitwe mweelwe atayandiki akumilambu, ono bulya calinga kweelete kwaatola kumwaami. 7Apolonyasi wakaya kumwaami, wakamushibisha ndalama shilya shakaambwa. Penkaapo mwaami wakasala Eliodolo, mutanjilili wakwe munene, wakamutuma amulasho wakwaamba ayi akalete maali ayo alifulila.
Lweendo lwakwe Eliodolo kuJelusalemu
8Eliodolo wakanyamuka ciindi ceenka ico, wakacita anga ulisuni kuya mukubona ndabala shaku Silyaaku Fenisha sombi wakalinga kusuni ico ncaakalinga kuyanda mwaami. 9Ndyaakashika kuJelusalemu Munene wabapailishi abantu bamundabala bakamutambula mubulemu. Penkaapo lakwe wakaambila Onyasi isho nshaakanyumfwa, wakamwaambila calweendo lwakwe. Alimwi wakamwiipusha nancakwiila mbocibete. 10Mupailishi Munene wakasansulula ayi amwi maali ngabamukalubinje abanabanshiwa, 11Mwakalinga shimwi ndalama shaIlikano, mwanaakwe Tobyasi, muntu mubile abumbi. Paceebo ceeco maswi akwe Simoni alya akalinga abubeshibo. Ncakwiila cakalinga bobulya, buboni boonse pantu pomwi akalinga makalogilamu 1300 asilifa a makilogilamu 6000 a golodi mpeeke. 12Wakanungaawo ayi tecakalinga kweelete kubapensha babikite lushomo mubusalashi bwaŊanda yaLesa Isalalite icite bulemu pacishi coonse capaanshi. 13Sombi Eliodolo pakukonkela milawo iyo mwaami njakalinga kweelete kwinjila mulibokoshi lyamwaami. 14Bakasalila limwi bushiku bwakubelenga buboni ubo, lyalo bakenjila muŊanda yakwe Lesa, ayi alibonene mwiine. Pakubona sheesho, bantu boonse bamundabala bakapenga abuumbi. 15Bapailishi bakaliwisha paanshi alifumo lyoomawo kucipaililo kafwete shabupailishi, lyalo wakalambila Lesa ulya wakabapa milawo yakwaamba sha ndalama shakubikisha ayi ababikile kabotu balya beshi bakabikeemo. 16Ulya ndyakabona ciinso camunene wabapailishi wakanyumfwa nkumbu mumoyo wakwe, pakwiinga ciinso cakwe cakatubuluka tuu, wakasakamana mumoyo wakwe. 17Misonshi akututuma shakamuwita, alimwi abuumba mumoyo wakwe bwakaboneka kubantu boonse bakalinga kulangilisha. 18Bantu baanji bakuJelusalemu bakaswa mumaanda abo ayi bapaile kabotu boonse pantu pomwi amwiine musena usalalite. 19Bamanyina wesu bakacicila mumikwakwa bakafwalabo masaka mushibuno, makolo kalibo patuba. Bamyooye balo bakalingabo mumaanda abo bakacica, bamwi kumisumba, bamwi peculu pa lubumbu, sombi bamwi bakalingabo kusondela pamabwelyo. 20Boonse bakatambika maansa kwiculu kabapaila. 21Matongooshi abantu boonse akusakamana kwa Mupailishi Munene shakaleta buumba.
Lupesho lwakwe Eliodolo
22Lilya baJuda ndyebakapaila ku Mwaami Lesa wa nkusu shoonse ayi ababambile kabotu ndalama shabo boonse abo bakabikilaamo, 23Eliodolo wakatalika kucita isho nshaakabaambila. 24Wakashika abasebenshi bakwe pafwaafwi a libokoshi lya ndalama, Mwaami Lesa, Mwaami wamishimu yoonse mwiine buleelo boonse wakacita caankamiko ciloondesha abuumbi. Ono balya boonse batakwe kuloonda kwinjila mumusena uyo, bakakankamana ankusu shakwe Lesa, bakawisuka akuloonda abuumbi.
25Pameenso pabo pakaboneka liaki lyakalinga kufwete kabotu, alakwe wakalinga kutantitewo wakalinga aciinso ciyoosha. Liaki lyakasotokela Eliodolo cankusu akumuuma cibaka. Uyo wakalinga kutantitewo wakalinga kufwete shankondo sha golodi. 26Ono pafwaafwi a Eliodolo uyo pakaboneka basankwa bobilo bankusu babotu camaansa abilo, kabafwete shakufwala shibotu. Bakesa beemikana palubasu pakwe Eliodolo, umwi kululyo aumwi kucipiko, kabamukwipabo akuuma cankusu. 27Eliodolo wakawa paanshi, pameenso pakwe pakashiya mbii. Bantu bakwe bakamubika pamacila akumutola. 28Mpomunyaawo wakenjila muŋanda yandalama, kali alikoto lyabasebenshi bakwe, sombi ono bakacita kumunyamuna, kaatacikonshi kweenda eenka. Apo nkusu shakwe Lesa uyo shakaboneka, patuba. 29Pakubona muntu wakacenjeshekwa a nkusu shakwe Lesa uyo ulibo ndwii, kaataambi nabi kuyeeya ayi ulaba kabotu. 30Ba Juda bakalumba Lesa uyo wakalemenesha bobulya musena wakwe usalalite. Ono Ŋanda yakwe Lesa iyo cino ciindi yakalinga kuloondesha akutalibilika, ono yakalinga kuswitebo kusangalala akukondwa. Paceebo cakulibonesha Mwaami Lesa Ushi Nkusu shoonse.
31Babye bamwi Eliodolo bakasenga Onyasi munene wabapailishi, ayi apaile kushinkusu shoonse ayi muntu ulipafwaafwi kufwa, amuboosheshe buumi. 32Ono munene wabapailishi, pakuyeeya ayi cimwi ciindi mwaami inga wayeeya ayi baJuda mbobakacita Eliodolo cibiibi, bakatula mutulo ayi muntu uyo ayume. 33Lilya munene wabapailishi boonse ndyaakalinga kupailila cibiibi cakwe Eliodolo, basankwa bobilo beenka balya, kabafwete sheenka shilya, wakababonekela Eliodolo akumwaambila ayi, “Ulumbe camaansa obilo Onyasi munene wabapailishi boonse, kwaamba ayi Mwaami Lesa akulekelele buumi bwako paceebo cakwe Onyasi. 34Ono webo nowapenshekwa bobulya, unolwiita bantu nkusu shinene shakwe Lesa.” Ndyakaambabo sheesho, basankwa balya tabakwe kuboneka.
Eliodolo mbwaakasanduka moyo
35Eliodolo ndyaakapabo mutamba kuMwaami Lesa, wakabalasha shiinji paceebo cakupulusha buumi bwakwe. Lyalo bakalashanya a Onyasi mubulemu, wakaya abeshilumamba bakwe kuMwaami. 36Wakapa bukamboni pameenso aboonse pakwaamba shamilimo yakwe Lesa Wiindaawo isho lakwe shaakabona a meenso akwe. 37Ono mwaami wakeepusha Eliodolo ayi amulwiite muntu uyo weelete kutuma alimwi kuJelusalemu. Alakwe wakakumbula ayi, 38“Na mulicite muntu umwi ngomupatite nabi mpaanshi wakasandukila buleelo bwanu, mumutume eenka uyo uko, sombi mwishibe ayi utoosa kaaumitwe abuumbi, na akapuluke, pakwiinga kweenka uko kuli nkusu shakwe Lesa. 39Uyo lakwe kumishaabo kwiculu ulanga cishi ico, balo ulaabatabilila. Boonse bayaako amiyeeyo ibiibi balabooma akubacaya.” 40Yenka iyo njempuuwo yakwe Eliodolo akufunwa kwalibokoshi lyamaali aku Ŋanda yakwe Lesa.
Currently Selected:
2 Makabisi 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.