2 Makabisi 2
2
Jelemiya wakashisa Tente ya Mwaami Lesa
1“Mumabuku tulacanaamo ayi ngu Jelemiya mulaluki ngowakaambila bantu bakatolwa busha balya ayi bashise mulilo umwi waku cipaililo, mbuli mbotwaamba. 2Lakwe wakabapa libuku lyamilawo, wakabalwiita ayi batakaluubi milawo ya Mwaami Lesa, alimwi ayi batakeeleshi kuba amiyeeyo yabo ya tulesa twa golodi a silifa ashakufwala shakwe shibotu isho shifwala batashomi. 3Wakabikaawo alimwi milawo imwi iyi yakwaamba ayi batayeeyi ayi milawo iyi yaswabo mumyooyo yabo.
4“Mumabuku eenka ayo, twakabelengamo ayi mulaluki uyo, Lesa wakamwaambila, kuyumuna tente acibokoshi cacipangano, wakatantaaco kumulundu uko Mose nkwakabonena cishi ico Lesa ncaakamupa. 5Ndyaakashika uko, Jelemiya wakacana cicengo mulibwe, wakabikaamo tente alibokoshi lyacipangano, alimwi acipaililo cakutentelaawo lubani, lyalo wakacala pamulyango wa cicengo ico. 6Pesule lyakwe beshikukonkela bakesa mu kulembaawo shishibisho munshila, sombi nshila iyo yakabaalila kwicana. 7Jelemiya ndyaakanyumfwa, wakabakalalila, ayi, musena uyu ulaakunooshishitwe kushikila mwiine Lesa akabike pantu pomwi bantu bakwe, akutondesha nkumbu shakwe. 8Ciindi ceenka ico Mwaami Lesa ulaakubonesha patuba shintu ishi. Bulemu bwa Mwaami Lesa alikumbi lilya shilaakuboneka, bweenka mbuli mboshakacitika ciindi cakwe Mose alimwi lilya Solomoni ndyaakapaila ayi Ŋanda yakwe Lesa isalashikwe mubulemu. 9“Mumabuku umo bakaambilisha ayi Solomoni uyo pakwiinga wakalinga musongo, wakatola mulambu usalalite muŊanda yakwe Lesa ndyaakamana kwiiyaka. 10Ono lyalo anga nguMose mbwaakapaila kuMwaami Lesa, mulilo wakaswita kuculu kwisa mukutenta milambu, alakwe Solomoni wakapaila, mulilo wakaseluka kuswa kwiculu akutenta milambu. 11Mose wakwaamba ayi, milambu yapya yoonse pakwiinga ‘milambu yakwaana milandu tabakwe kwiilya.’ 12Solomoni wakasekelela mushobo uyo nshiku shosanwe a nshiku shotatwe.
13“Mumabuku amumakalata aamba shakwe Neemiya tulacanaamo makani amwi alyanga ngaya mweenka umo tulabona ayi Neemiya wakayaka ŋanda yakubikaamo mabuku, wakabikaamo mabuku aamba sha baami abalaluki alimwi ashakulemba shakwe Defedi amakalata abaami aamba pa shipo shabwaami. 14Comwi comwi alimwi Judasi uyo wakabika mabuku oonse alya akasoweka paciindi cankondo. Mabuku ayo tucaacite mumaansa esu. 15Ono namulyaasuni mabuku ayo, mutume bantu
16Swebo twamulembela, pakwiinga tulipafwaafwi akucita cisekelelo cakusalasha Ŋanda yakwe Lesa. Mulaakucita kabotu n kamuyeeya inshiku ishi. 17Lesa ngowakapulusha bantu bakwe boonse, alimwi wakababoosesha cishi cabo, bwaami, bupailishi akusalwa kwabo. 18Mbuli mbobakashomesha mumulawo. Bweenka bulya swebo tulyalushomo ayi lakwe ulaakutufwita nkumbu coonoono, lyalo ulaakutuleta pantu pomwi soonse kuŊanda yakwe Isalalite, kuswa kushishi shoonse shapaanshi, pakwiinga wakatufuna kushibiibi shinene, alimwi wakasalasha Ŋanda yakwe.”
Maswi ataanshi amulembi
19Jasoni wakuKilene wakalemba mabuku osanwe akwaamba sha mpuuwo yakwe Judasi Makabisi abamakwabo, sha kusalasha Ŋanda inene yakwe Lesa ashakutola cipaililo cakutentelaawo milambu yakwe Lesa. 20Wakaamba ashankondo iyo njebakalwana aAntyokusi, Epifane amwanaakwe Eupetole. 21Wakaamba ashimwi shakuculu isho shakababonekela abo bakatolelela milambu yaciJuda. Bweenka ubo nabi bantu aba bakalinga bakubelengabo, bakatola cishi cabo coonse, akutandaanya makoto abatashomi. 22Bakabwesa alimwi aŊanda yakwe Lesa, yakalinga kupukite mucishi coonse capaanshi pano. Bakapulusha ndabala, akuboosha Milawo njebakalinga ayi balube. Shoonse ishi shakacitika pakwiinga Lesa wakabanyumfwila nkumbu akubeta nkumbu. 23Shoonse isho Jasoni wakuKilene shakaamba mumabuku osanwe, swebo tutokweelesha mukufwiimpya mulibuku lyomwi lyeenka. 24Pakubona kufula kwashintu shili mumabuku umo twakayeeya ayi, usuni kunyumfwa kabotu makani akalekale ayo, balapenga paceebo cakufula kwa makani. 25Paceebo ceeco twakeeleshesha kusangalasha bantu basuni kubelenga, twakeelesha kuceesha ncito basuni kushiceesha mumyooyo ayi bashinyumfwishe, alimwi twakalinga kusuni kusandula boonse beshi kushibelenga. 26Swebo sotwakatalika incito yakulemba shoonse isho mukufwiimpya, twakacana ayi teeshi incito ibombu, sombi njakuswa nkasaalo akucesha bushiku. 27Cilyaanga ngumuntu utoobamba shamatebeto. Lakwe uyo ngooba ancito ilemesha ayi abasangalashe abo bamwi. Sombi pakusangalasha beshi kubelenga abo baanji twakasumina kucita incito iyumu iyi. 28Tutooshomabo ayi bakalemba shakalekale isho, bakayandoola yandoola kabotu shintu shoonse. Swebo tulisunibo kulemba isho mukufwiimpya.
29Muntu utooyaka Nanda yonoono ulyeelete kwishiba mboiyakwa ŋanda yoonse, sombi usuni kubotesha ŋanda ulalabilila shakubona sheesho shiyandika ayi ayiboteshe. 30Mukuyandoola shakalekale, pakulanga mbasu shoonse, apakulanga shoonse nabi nshiniini, kulaba amuntu uyo wakalemba shintu isho pakutanguna. 31Na walemba mukusuna kushifwiimpyabo, ulyeelete kusuminishikwa kwaamba ayi ashifwiimpye, utaambi shoonse. 32Tutalike ono makani esu. Tutabikiiwo amakani amwi. Inga caba cabuluya namwaasotokela makani amwi akutalika akalekale ayo. Uku nkuceesha makani akwaamba eene ene.
Currently Selected:
2 Makabisi 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.