2 Baami 3
3
Inkondo yakaba pabene Isilaeli abene Moabu
1Mumwaaka wa likumi amyaaka yosanwe ayotatwe wa bwaami bwakwe Jeoshafati mwaami wa cishi ca Juda, Jolamu mwanaakwe Aabu wakaba mwaami wa cishi ca Isilaeli. Wakalela mucishi ca Samaliya myaaka likumi amyaaka yobilo. 2Wakabisha kuMwaami Lesa sombi kuteelana abaishi nabi baJesebelo banyina. Lakwe wakapwaya libwe ndibakeemika pamusena wakulambililaawo Baali lyakashiya baishi. 3Nakubi boobo wakakakatila kushibiibi shakalinga kucita Jeloboamu mwanaakwe Nebati akulengesha bene Isilaeli kubisha bweenka mbuli nguwe. Ncakwiila taakwe kushilekaawo.
4Mesha mwaami wa bene Moabu wakalinga kusunga mbelele. Mwaaka womwi awomwi wakalinga kubenga twana twa mbelele tuli 100,000 abooya bwa mbelele shisankwa shili 100,000 ayi ngumusonko. 5Sombi Aabu mwaami wa bene Isilaeli ndyaakafwa, Mesha wakabukila mwaami wa Isilaeli. 6Cakufwambaana mwaami Jolamu wakaswa kuSamaliya akubunganya bashilumamba bakwe boonse. 7Wakatuma nkombe kuli Jeoshafati mwaami wa bene Juda yakwaamba ayi, “Mwaami wa bene Moabu wambukila, sa inga tooncafwiiko kumulwana?” Mwaami Jeoshafati wakakumbula ayi, “Ntoosa! Ndi mumaansaako pantu pomwi abantu bangu alimwi amaaki angu. 8Ninshilanshi njeshi twiinde kuya mukulwana?” Jolamu wakakumbula ayi, “Tutootola ya luyanga lwine Edomu.”
9Mpomunyaawo mwaami Jolamu, mwaami wa bene Juda awa bene Edomu bakanyamuka. Bakeenda kwanshiku shili shosanwe ashobilo. Ono maanshi akamana cakutacaalaawo nabibo tuniini twa bantu nabi shifubwa nshebakalingaasho. 10Lyalo mwaami wa bene Isilaeli wakaamba ayi, “Twamana ono! Sa Mwaami Lesa weeta sobamaami sotatwe ayi atwaabe mumaansa a bene Moabu?”
11Sombi mwaami Jeoshafati wakeepusha ayi, “Sa kuliiwo mulaluki wa Mwaami Lesa weenga watwiipushishaako kuMwaami Lesa?” Lyalo mutanjilili umwi wa bashilumamba bakwe Jolamu wakakumbula ayi, “Elisha mwanaakwe Shapati nkwaali. Wakalinga kucafwa Elija.”
12Ono mwaami Jeoshafati wakaamba ayi, “Anu ngumulaluki wancinencine.” Mpeeke bamaami abo botatwe bakaya kuli Elisha. 13Mpeeke Elisha wakaambila mwaami wa bene Isilaeli ayi, “Ceebonshi mwesa kuli ndime? Tamukwe kuyitanshi kubalaluki ba baishiwanu abanyinawanu?” Jolamu wakakumbula ayi, “Sobwe, Mwaami Lesa ngoweeta swebo sobamaami sotatwe ayi atwaabe mumaansa a bene Moabu.”
14Elisha wakakumbula ayi, “Bweenka mbocibete lushinisho ayi Mwaami Lesa Shinkusu shoonse uyo ngoonsebensela ngumuumi, mbweeke ubo anebo naakwiinga nshimulanganyiiwo nabi kumukutika nintakwe kupa bulemu baJeoshafati baami ba bene Juda. 15Ono amunangweeteewo shikulisha kalumbu.” Ono shikulisha kalumbu ndyaakalinga kukalisha, nkusu sha Mwaami Lesa shakesa pali Elisha. 16Mpeeke wakaamba ayi, “Mwaami Lesa waamba ayi, ‘Amukabe shilindi mumulonga uyuminite uyu. 17Nabi teshi kube muuwo nabi mfula, uyu mulonga uyuminite utoosula maanshi. Lyalo mwebo, ŋombe shanu ashifubwa shanu shimwi, shoonse shitoonwa maanshi akwaashiyakobo.’ ” 18Elisha wakatolelela akwaamba ayi, “KuMwaami Lesa ici ncuububo kucicita alimwi ulaakwaaba abene Moabu mumaansaanu. 19Mulaakukoma mandabala oonse acite malinga, kutimbula shisamu shabo sha shisepo, kushinka tuntupu twabo alimwi akunyonyoola myuunda yabo icite bulongo bubotu mukuwaalaamo mabwe.”
20Macuunsacuunsa ndibwakaca, paciindi cakubenga mulambu maanshi akatalika kukunka kuswa kulubasu lwa Edomu akwisusha musena uyo.
21Ono bene Moabu ndibakanyumfwa ayi bamaami botatwe besa mukubalwana, muntu woonse, nkokwaamba ayi munene amwanike uyo wakalinga kukonsha kunyamuna shakulwanisha, wakeetwa ayi aye kumanyinsa a cishi cabo. 22Ndibakabuka macuunsa lisuba lyakalinga kubala pamaanshi akulengesha ayi aboneke kusalala anga mbulowa. 23Bakaamba ayi, “Mbulowa! Mpashi makoto a bashilumamba ba bamaami botatwe babukilana akucayana beene abeene! Katiya tukasaale misumba yabo.”
24Sombi ndibakashika kumisumba iyo, bene Isilaeli bakanyamuka akubalwana tibili bacica. Bene Isilaeli bakatolelela kutandaanya bene Moabu akubacayoola. 25Bakalinga kuya cinyonyoola mandabala abo anene. Na bacana muunda ucite bulongo bubotu, mwine Isilaeli woonse wakalinga kuwaalamo libwe kushikila myuunda yoonse yakesula mabwe. Bakashinka atuntupu alimwi bakatimbula ashisamu sha shisepo. Kumeelelesho kwakacaalabo ndabala inene iitwa ayi Kili Aleseti. Balo beshikuwaala mabwe ashipaya bakashinguluka ndabala iyo akwiilwana.
26Mwaami wa bene Moabu ndyaakabona ayi waalilwa kukoma nkondo iyo, wakabwesa beshikulwanisha mipeeni bali 700 akweelesha kwiinda pakati ka balwani bakwe ayi alobokele kuEdomu, sombi wakaalilwa. 27Lyalo wakabwesa mwanaakwe musankwa wakwiiya uyo wakalinga kuyeeyelwa ayi inga wapyana bwaami bwakwe. Wakamutola akuya mukumubenga palubumbu lwa ndabala ayi ngumulambu kuli lesa wa bene Moabu. Bene Isilaeli bakaloonda abuumbi akuswaako kundabala baya kumishaabo.
Currently Selected:
2 Baami 3: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.