2 Baami 2
2
Elija mbwaakatolwa kwiculu
1Ciindi ndicakashikila cakwaamba ayi Mwaami Lesa atole Elija kwiculu mukapupuulwa, Elija aElisha bakalinga kuya kuGilugala. 2Munshila Elija wakaambila Elisha ayi, “Ono kala pano, Mwaami Lesa wandwiita ayi nebo nje kuBetelo.” Sombi Elisha wakakumbula ayi, “Bweenka mbocibete lushinisho ayi Mwaami Lesa ngumuumi, amwebo mbomuli boomi, mbweeke ubo anebo teshi mpansaaneewo amwebo.” Aboobo bakaya boonse kuBetelo.
3Likoto lya balaluki bakalinga kwikala kweenka uko bakaya kuli Elisha akumwiipusha ayi, “Sa ulishi kwaamba ayi sunu Mwaami Lesa utootola mwaami wako kuswa kuli ndiwe?” Elisha wakakumbula ayi, “Ee, ndishi, sombi atwaaleeke.”
4Lyalo Elija wakaambila Elisha ayi, “Ono kala pano, Mwaami Lesa wandwiita ayi nebo nje kuJeliko.” Sombi Elisha wakakumbula ayi, “Bweenka mbocibete lushinisho ayi Mwaami Lesa ngumuumi, amwebo mbomuli boomi, mbweeke ubo anebo teshi mpansaaneewo amwebo.” Aboobo bakaya boonse kuJeliko.
5Likoto lya balaluki bakalinga kwikala kweenka uko bakaya kuli Elisha akumwiipusha ayi, “Sa ulishi kwaamba ayi sunu Mwaami Lesa utootola mwaami wako kuswa kuli ndiwe?” Elisha wakakumbula ayi, “Ee, ndishi, sombi atwaaleeke.”
6Lyalo Elija wakaambila Elisha ayi “Ono kala pano, Mwaami Lesa wandwiita ayi nebo nje kuMulonga wa Joodani.” Sombi Elisha wakakumbula alimwi ayi, “Bweenka mbocibete lushinisho ayi Mwaami Lesa ngumuumi, amwebo mbomuli boomi, mbweeke ubo anebo teshi mpansaaneewo amwebo.” Aboobo bakatolelela palweendo ulo boonse.
7Likoto lya balaluki bakalinga makumi osanwe bakabakonkela kuMulonga wa Joodani. Mpeeke Elija aElisha ndibakeemikana pafwaafwi aMulonga wa Joodani, balaluki abo abalo bakeemikana palaaleeko. 8Mpomunyaawo Elija wakafuula cakufwala cakwe ca peculu, wacipomba akucuuma pamaanshi. Mpeeke maanshi akapansaana, lyalo lakwe aElisha bakasubuka payumu kuya kwitala. 9Ndibakasubuka, Elija wakaambila Elisha ayi, “Ndwiite ncoosuni ayi nkucitile kaantana kutolwa.” Elisha wakakumbula ayi, “Ndisuni ntambule nkusu nshemwalinga kusebensesha kwaamba ayi mpyane musena wanu.”#Duto 21:17
10Elija wakaamba ayi, “Ico ncewasenga nciyumu, sombi inga wacitambula na wamboona ndanootolwa kuswa pali ndiwe. Na ubule kumbona nkokwaamba ayi teshi ukacitambuleewo.”
11Mpomunyaawo kabaya cibandika, pakati pali mbabo pakaboneka cikoci ca mulilo cakalinga kukwelwa amaaki a mulilo. Lyalo kapupuulwa kakatola Elija kwiculu. 12Elisha wakakabona, wakatalika kulila kuli Elija ayi, “Ta! Ta! Nobeshikufuna bene Isilaeli beshinkusu mwaya!” Lyalo taakwe kumubonaawo Elija alimwi. Mubuumba bwakwe Elisha wakakwamuna cakufwala cakwe ca peculu.#2 Baami 13:14
13Mpeeke wakaya wabwesa cakufwala ca peculu ico Elija ncaakalosha akuya mukwiimikana mulombe lwa Mulonga wa Joodani. 14Mpomunyaawo wakooma cakufwala ca peculu cakashiya Elija pamaanshi alimwi akwaamba ayi, “Uli kuli Mwaami Lesa wakwe Elija?” Wakoomaawo alimwi lyalo maanshi akapansaana. Mpeeke wakasubukila kwitala. 15Balaluki abo bakalinga makumi osanwe bakaswa kuJeliko bakamubona akwaamba ayi, “Nkusu shakwe Elija shesa kuli Elisha!” Bakaya bamukumanya, bamufukamina 16akwaamba ayi, “Swebo tuli makumi osanwe alimwi soonse tuli bayumu. Amutusuminishe tuye tulangoole mwaami wanu. Mpashi Mushimu wa Mwaami Lesa wamutola pakalundu kamwi nabi mucinyika cimwi.” Elisha wakakumbula ayi, “Sobwe mutayi.”
17Sombi balo bakayuminina cakwaamba ayi wakafwa nsoni. Lyalo wakabaleka baya. Balaluki abo boonse bakaya bayandoola kwanshiku shotatwe mutulundu amushinyika, sombi tabakwe kumubonaawo. 18Mpeeke bakaboolelabo kuli Elisha uyo wakalinga kubalindilila muJeliko. Lyalo wakabaambila ayi, “Sa nshikwe kumulwiita ayi mutayiiko?”
Shaankamiko shakwe Elisha
19Bumwi bushiku basankwa bene Jeliko bakaya kuli Elisha akwaamba ayi, “Amubone nkambo ndabala inene iyi iliyakitwe pamusena ubotu abuumbi, sombi maanshi aliimo ngabiibi abwalo bulongo tabukomeneshi shishango.”
20Wakabaambila ayi, “Amubike mwiinyo mumbale ipya, mwiilete kuli ndime.” Bakeetola kuli nguwe. 21Lyalo Elisha wakeetola kukantupu akuwaala mwiinyo mumaanshi akwaamba ayi, “Mwaami Lesa waamba ayi, ‘Ndalengesha maanshi aya kuba kabotu alimwi teshi akaleteewo lufu nabi kulengesha bulongo kutakusha shishango!’ ” 22Kuswabo pabushiku ubo maanshi ayo akaba kabotu kushikila asunu kweelana abwakaamba Elisha mulaluki.
23Mpomunyaawo Elisha wakaswa muJeliko akuya kuBetelo. Ono ndyaakalinga kuya munshila, bacikula bwangu basankwa bakaswa mundabala akumuseka mukoolobesha ayi, “Swaamo muno shilubala! Swaamo muno shilubala!”
24Elisha wakapiluluka wabalangilisha akubashingana muliina lya Mwaami Lesa. Mpeeke kwakesa bashiluwe banene bobilo bakaswa muluundu akuluma bacikula bwangu bali 42 pakati kabo.
25Mpeeke Elisha wakaya kuKalundu ka Kamelo. Kuswa kooko wakaboolela kuSamaliya.
Currently Selected:
2 Baami 2: BBBLI
Highlight
Share
Copy
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.