Zaŋ 7
7
Malam ma Yezu hay a pam 'ar ka Yezu kakay
1A dəba na na, Yezu ma daw ka mey ka mey, ma hala dala ma Galiley. Akwa na a wuɗey ma hala dala ma Zudey, na Zuif hay ma səpam ma da zəɗadəmara 'ar ba da huɗa na, tikay. 2Da har ana na, magurlam ma Gwadzavok ma zuif hay a gurawa ha. 3Malam aŋga hay ma ləvamar: «Daway ba ka sləna a Zudey, ma gawla ɗek hay ka slafama ma nəkadama tek eɗek me key ana hay tiyatsa. 4Ndaw a slafa ma kəzlada tek aŋga na me key ana kakay, kendzey a sar a ndaw ma ɓada vaw na. Haɗaw ka key aha tek hay andza neney sana, ɓada vaw ɗek a bəla.» 5Akwa na, malam aŋga na hay tekeɗe na, a pam aha 'ar ka ŋga kakay. 6Yezu ma ləvatar tok: «Har a ɗaw ka slawa tsaray kakay, ama har a kwar na, kwa varay varay na, hayaha tsa. 7Bəla a slafa ma ŋgəladakwar dey kakay tikay, ama yah na, a ŋgəladaya dey kakay zləna, i ɓada ha tek aŋga me key haya kakay ana hay. 8Kuray tok na, tsəlam a magurlam ana, yah na, i da daɓa ha tikay, hərway har a ɗaw ka ndesley tsaray kakay.» 9Andza ŋga ma ndəvada guma ŋga neney me tsey na, ŋga me ndzey təŋga da Galiley. 10Ama andza malam aŋga hay ma dawam ba a magurlam na, ŋga tiyatsa me zəgey tsəveɗ ma daway, mandzara ndaw ka nəkada, ma tsəlay a wutsey ta wutsey.
Me tetəkey ma Yezu da har a magurlam ma Gwadzavok hay
11Da har ma magurlam na, Zuif hay ma səpama ma ləvam: «Ɗagay ŋga da may tok?» 12Da walaŋ ma ndaw ma kusa na hay na, ndaw hay tabiyaha a tsam haɗadzidzay na ka ŋga; sana a ləvam: «Ndaw ana na, ndaw hayaha.» Sa na hay tey waya: «A'ay, dzadzak a key na a pafata wuiya ka ndaw ma kusa na hay. 13Amana kwa ndaw ma tsafa ndar ndar na dakay, a wasam ta Zuif hay. 14Andza magurlam a wersley wurasl a hana, Yezu me tsəley a 'Ay me key Kuley, ŋga ma zlar ma tatəkadata ndaw hay. 15A rəzlata Zuif hay ha taya ma ləvam: «Ŋga neney ka dzeŋgey kakay ana na, a səradərawa tek ana andza ha na, da may?» 16Yezu ma mbəɗatar kava: «Me tetəkey ndaw a ɗaw ana a sawa na da yah ana kakay, amana, da Ndaw ma sləradiyawa na. 17Kendzey haɗaw ndaw ana a sar me key tek andza ma Bay ma Bəla me wuɗey ana na, a da sərada me tetəkey a neney a sawa da Bay ma Bəla tsukuɗu, i tsey na ma bay 'ar ma vaw ɗaw ana ɗaw? 18Ndaw me tsey guma ma bay 'ar ma vaw ŋga na na, a səpey na maram a vaw ŋga na. Ama ndaw me səpey maram ma Ndaw ma sləradərawa na na, a tsey dərka, kwa maləwaɗay da ŋga na dakay. 19Ma vəladukurawa Mewey na, Moyiz kakay ɗaw? Amana ndaw asləta da walaŋ a kwar me key andza ma Mewey ana na dakay. Azlakwa ɗagay ka səpəmaya ma da kəɗaya ba vagay aha na, ka mey?» 20Ndaw ma kusa hiya na hay, ma mbəɗamar kava: «Fakalaw ka zəgaka ba ɗaw? Ɗagay ma səpaka ma da kəɗaka vagay aha na way?» 21Yezu me mbəɗey kava, ma ləvatar: «I me key na zeheɗ asləta dada, amana a rəzlakwar tobiya kwar aha. 22Moyiz ma vələkurawa me sley kuɗey, -kwa a zlawa na ka ŋga tsa kakay, ama a sawa na da baba tete hay-, kuray na ma təɗafama me sley na ta pas ma mesley adzay. 23Haɗaw azlakwa ndaw a slafa me ndzefey me sley kuɗey, ta pas ma mesley, mandzara Mewey ma Moyiz ka ŋgəsey sana, ɗagay ka kafamaya mevel hərway i me ndeley ndaw kərem, ta pas ma mesley na, ka mey? 24Mbəkadama me key sariya ma tek na kuray ma nəkadama na, ama kam sariya na andza ma dzerey!» 25Ndaw ma Zeruzalem hay ma ləvam: «Neney na ndaw ana ma səpama ma da kəɗama ba vagay aha na kakay ɗaw? 26Nəkafama a tsey aha guma ndar ndar, amana, a tsamar guma kakay. Bay lakwa hay ka da səradama ba, azlakwa ŋga na Kriste dərka na ɗaw? 27Ama ndaw a neney ana a sawa na da may na la səradakwa, Kriste ka da sawa ba na, ndaw a da sərada ha a sawa na da may tikay.» 28Arka Yezu a tatəkadata ha ndaw hay da 'Ay me key Kuley na, me ləvey: «Ka səradəmaya azlakwa tok na, ka səradama i sawa na da may! Amana i sawa na ma 'ar a ɗaw ana kakay. Ndaw ana ma sləradiyawa na na a tsey dərka. Ŋga na ka səradama kakay. 29Ama yah na, i sərada zləna, ka vəɗay i sawa na ka tsakay ŋga, ma sləradiyawa na, ŋga.» 30Arka taya ma səpam ma zəgama, amana ndaw ka slafa ma pafa har ma zəga kakay, zləna, har aŋga ka slawa tsaray kakay. 31Da walaŋ ma ndaw ma kusa na hay na, ndaw me pey 'ar ka ŋga na hay na haɗa. Arka taya ma ləvam: «Aza Kriste na ka da sawa ba na, a da key zeheɗ a fəna ma ndaw eɗey me key ana ɗaw?» 32Guma a hana hay ma sasəkwafama da walaŋ ma ndaw ma kusa hiya na hay na, me husey a sləmay ma Fariziyeŋ hay, arka na baba ɗuhwa na me key kuley ana hay, ta Fariziyeŋ hay ma kuyam sidzew ata hay, ma ka zəgəmərawa. 33Yezu me ləvey: «Mendzey ɗaw ta kuray na a zawa nekəɗey dada, arka na, i da mey ’ar ka slam ma Ndaw ma sləradiyawa na. 34Ka da səpəmaya, amana, ka da ndzafəmaya ha kakay, hərway ka slam i ma daw ana na, ka slafama ma daway kakay. 35Da har ana ŋga na na, Zuif hay ma ləvam ka 'ar vaw ta na: «A da daw ma ŋga na a may, ha i da ndzafakwa ha kakay ana na? Tsukuɗu a da daway təŋga, ka slam ma ndaw ma zlaɗa 'ar ahiya da walaŋ ma Grek hay ana ɗaw? A da daway ma da tatəkadata Grek hay ɗaw? 36Ɗagay guma ŋga na me tsey ana na ka ləva na teŋgey: ‹Ka da səpəmaya amana ka da ndzafəmaya ha kakay, ka slam a ɗaw i kava ana na ka da slafama ha ma daway, kakay?.›»
Pas ma magurlam madakwaydok ana
37Andza pas ma magurlam me ndəvey, pas ana ŋga na na ɗuhwa ha satsa, Yezu me lətsey deŋ da 'Ay me key Kuley, me tələkey mey ta magala ha: «Haɗaw ndaw ana yam a harta na ŋga ka sawa ka tsakay ɗaw ka da sey. 38Ndaw me pey 'ar ka yah na, andza ma Mewindey Kokwoɗ ana hay me ləvam ana na: «Da vaw ŋga na, 'ar yam me vəley mendzey ana a da vawa» 39A tsey andza ha na ka Mesəfrey Kokwoɗ ana ma ndaw ma pam 'ar ka ŋga na hay, ma da ndzafam ana. Akwa da na ŋga na na, Mesəfrey Kokwoɗ ana tsaray dakay, zləna, Yezu ana ka ndzefey maram tsaray kakay. 40Da walaŋ ma ndaw ma kusa ahiya ma pafama sləmay ka guma ŋga na hay na, sa na hay ma ləvam: «Dərka na, neney na Ndaw sek.» 41Sa na hay ma ləvam: «Kriste na ŋga.» Ama sa na hay ma ləvam sa tey: «Kriste na a slafa ma bawa da Galiley ɗaw? 42Mewindey Kokwoɗ ana hay a ləvam na, a da bawa na da zuwal ma David kakay ɗaw? Da Betlehem, wuraw bəzaha na ma yəmərawa David da huɗa na kakay ɗaw?» 43Ndaw ma kusa hiya na hay a da tsam ba ka vaw andza neney na, hərway ŋga. 44Sa ma ndaw hay nekəɗey da walaŋ ata a satar ma zəgama, amana kwa ndaw ka pafa har kakay. 45Sidzew hay ma məmawa ka slam ma baba ɗuhwa na me key kuley ana hay ta Fariziyeŋ hay ma ləvəmatar: «Ɗagay ka zəgəmərawa kakay na, ka mey?» 46Sidzew hay ma mbəɗam kava: «Ɗaɗa ndaw ka tsey guma andza ma ndaw a neney na, dakay.» 47Fariziyeŋ hay ma ləvəmatar: «Ta kuray adzay na ka pafəkurawa wuiya ba tiyatsa ɗaw? 48Da walaŋ ma ndaw ma fada hay ta Fariziyeŋ hay na, ndaw asləta da walaŋ ana ka pey 'ar ba ka ŋga, daha ɗaw? 49Si ndaw a neney tedehe na hay dada, ma səradama Mewey kakay ana hay, taya na ndaw ma kəla 'ar ahiya.» 50Amana ndaw asləta da walaŋ ma Fariziyeŋ hay, a zəlamar Nikodem, ndaw aŋga na zlezle, ma daway ka tsakay ma Yezu ana me ləvey: 51«Mewey lakwa a slafa ma dzuwa ndaw mandzara ka tsənadama guma ŋga na, mandzara ka səradama tek aŋga na ma kawa na ɗaw?.» 52Taya ma mbəɗamar kava: «A da key na kah ndaw Galiley tiyatsa ɗaw? Səpa haya haya ha, aza ka ndzafa na, kwa ndaw sek ka lətsawa da Galiley na dakay.» 53Arka, kwa way way ma daway təŋga a mbaw ŋga.
Currently Selected:
Zaŋ 7: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun