Zaŋ 6
6
Yezu a vəlatar tek me zəmey a ndaw ma kusa hiya na hay
(Mt 14.13-21; Mk 6.30-44; Lk 9.10-17)
1A dəba na na, Yezu me tesey a diya ma bəlay ma Galiley naŋgar, na ma zəlamar Tiberiyad ana satsa. 2Ndaw ma kusa hiya haɗadzidzay ma səpamar bəzay zləna, kavəday taya ka nəkadama zeheɗ aŋga me key ka ndaw dzedzey ana hay ba. 3Arka Yezu me tsəley a mamba, me ndzey andza gawla ŋga hay da ɗəma na hərwuiya. 4Ma zlambar aha na, magurlam ma Zuif hay, na ma zəlamar Pak ana a slawa ha. 5Arka andza Yezu ma tsakafada dey na, ŋga ma nəkadata ndaw hay ma kusa hiya haɗadzidzay, a səmawa ha ka tsakay ŋga. Ŋga ma ləvar a Filip: «I da haɗakukwatərawa peŋ ɗa ma taya ka zəmam na da may?» 6A tsey andza ha na, a key na a həlar suwet zləna, ŋga na na, a sərada ha tek aŋga na ma da key ana. 7Filip ma mbəɗar kava: «Peŋ ma gabal temere tsew tekeɗe na, a sley me wanəkey ka ndaw ka ndzefey ketekuɗey ketekuɗey kakay seŋgey.» 8Ndaw asləta da walaŋ ma gawla ŋga hay a zəlamar Andrey, malam ma Simoŋ Piyer, ma ləvar: 9«Wawa daha ka sləna, peŋ ma orz ŋga hay daha zlam, ta bəzey kəlef hay tsew; ama neney ana na a da sley ka mey na a way?» 10Yezu me ləvey: «Ndzadəmata ta ndzey.» Guzer ka slam ana andza dakay, taya ma ndzam ka 'arra; a kam ndaw hay gabal zlam. 11Arka Yezu ma həlata peŋ ana hana hay, ma kada sise, ma wanəkadatara a ndaw ana hay. Ma zəga kəlef ana hay, ma kada andza ha satsa; ma vəladatara ha ma zəmam ha ka mevel ata me wuɗey. 12Andza taya ma rəha hiya tsoy na, Yezu ma ləvatar a gawla ŋga hay: «Tsakalama sa na ma zawa na hay, kwa ka da zəɗey zlay.» 13Taya ma tsakalama, me rəhey tsakarak kurow kava tsew, ta sa ma peŋ ma orze a hana zlam ana ma zawa na. 14Andza taya ma nəkadama zeheɗ aŋga neney me key ana na, ndaw a hana hay ma ləvam: «Ndaw a neney na Ndaw sek, na ŋga na, ma da sawa ka bəla na.» 15Ama andza Yezu ma sərafa ba a səmawa ha ma da zəgama, ma da pada bay aha na, ŋga me wutsey makəraŋga a mamba dey mekelehe sa.
Yezu a heley ka 'ar ma bəlay ta sek
(Mt 14.22-27; Mk 6.45-52)
16Ma hakwaɗ me key na, gawla ŋga hay hay ma harɗam kasl ka mey ma bəlay. 17Taya ma tsəlam a kombiwal ma da tesey a diya naŋgar, ’ar a Kafarnawom. Dey ka zəgey tsoy, amana re Yezu ka husey ka tsakay ta tsaray kakay. 18Vavəray ma lətsawa, bəlay me tsey ɗaŋgwala. 19Taya ka guram tsoy a key kilometre zlam ta ɗakal, andza ma nəkadama Yezu a heley aha ka 'ar ma bəlay, a gurawa ha ka slam ma kombiwal na, arka zluwer ma katar. 20Ama Yezu ma ləvatar: «Neney na yah, ka wasam zlay!» 21A wuɗam akwa ma zəga a kombiwal, ama arka tsana, a da sərafama na kombiwal ma ləmar a dala ka slam ata, ma dawam a huɗa na.
Ndaw hay ma kusa hiya haɗadzidzay a səpam Yezu
22Ma medew ana na, ndaw ana ma kusa na hay na ma ndza hiya ka mey ma bəlay ana, ma sərafama kombiwal asləta na ka tesey ba, amana a səradama Yezu na a dawam dzaya da kombiwal ana kakay. Taya ma dawam tek ata makəra ta na. 23Ama tok na, sa ma kombiwal mekele hiya ma səmawa da diya ma Tiberiyad ta slam ata ma zəmawa peŋ na Bay’ərlam Yezu ma mada sise kava da huɗa na. 24Andza ndaw ana ma kusa na hay ma sərafama ba, kwa Yezu, kwa gawla ŋga na hay dzay, taya ka slam ana dakay na, taya ma tsəlam a bəzey kombiwal hay, ma mam 'ar a Kafarnawom ma da səpawa Yezu. 25Arka andza taya ma ndzafama ba da diya ma bəlay naŋgar na, taya ma ləvamar: «Rabi, ɗagay ka sawa ka sləna na, varay?» 26Yezu ma mbəɗatar kava: «Dərka dərka na i ɓadakwar, ka səpəmaya na ma vəday kuray ma nəkadəmata zeheɗ hay kakay, ma vəday kuray ma zəmam tek ɓah ka me rəhey kwar ana. 27A dafa na təɗafama ka mber, ma ndzafada tek me zəmey a neney me zey ba na kakay, amana, tek me zəmey na me ndzey a mendzey me ndəvey kakay ana, na Bəzey ma Ndaw ma da vəlakwar ana, hərway ma mey na, Baba Bay ma Bəla ta 'ar aŋga ma kafa zeheɗ aŋga kava na.» 28Taya ma ləvamar tok: «La ka kam na teŋgey, ma da key mber ma Bay ma Bəla ana na?» 29Yezu ma mbəɗatar kava: «Mber ma Bay ma Bəla na, me pey 'ar ka Ndaw ŋga ma sləradərawa na.» 30Taya ma mbəɗamar kava: «Ama kah ana ɗagay ekəɗey na, ka key na zeheɗ waray, ma la ka nəkadama, arka aza la ka da pəmaka 'ar ana na? Meslərey ɗek ana na, na waray? 31Da palah na, baba la hay ka zəmamawa mann ba, andza na ma winda ha da Mewindey Kokwoɗ ana hay: ‹Ŋga ka vəlatərawa peŋ na ma sawa da 'ərlam ana ba.›» 32Ama Yezu ma ləvatar: «Dərka dərka na, i ɓadakwar, Moyiz na ka vələkurawa peŋ na ma sawa da 'ərlam ana kakay, amana, ma vələkurawa peŋ na ma sawa da 'ərlam ana na, Baba ɗaw. 33Hərway peŋ ma Bay ma Bəla na, na ŋga na ma hərɗawa da 'ərlam ana, arka na a vəlar mendzey a bəla na.» 34Taya ma ləvamar tok: «Bay’ərlam, vəlandar peŋ ana ŋga na, ma ka pas ka pas aha kwa.» 35Yezu ma ləvatar: «Peŋ ma mendzey ana na, yah ana, ndaw ma sawa ka tsakay ɗaw na, may a da tsafa ha kakay. Ndaw me pey 'ar ka yah na, ɗaɗa yam a da harta ha kakay. 36Amana, i ka ɓadukurawa ba, kuray ka nəkadəmərawa ba, amana, ka pamar 'ar kakay. 37Mendzey ma ndaw na Baba ma vəladataya na hay na, a da səmawa ka tsakay ɗaw, ndaw ma sawa ka tsakay ɗaw ana na, i da kəlada ha kakay. 38Hərway i harɗawa da 'ərlam na, ma da key tek a ɗaw me wuɗey ana kakay, amana tek ma Ndaw ana ma sləradiyawa na me wuɗey ana. 39Arka tok na, tek ma Ndaw ana ma sləradiyawa na me wuɗey ana, na kwa ndaw asləta da walaŋ ma ndaw ma vəladatiyawa na hay na, ka da zəɗey zlay; amana i ka da mbəladatərawa ta pas ma meney madakwaydok ana. 40Akwa Baba ɗaw a wuɗey na andza ha tok, kwa way way ma nəkada Bəzey ana, me pey 'ar ka ŋga na, a ndzefey mendzey me ndəvey kakay ana; arka yah tey na i da mbəladərawa ta pas madakwaydok ana.» 41Zla da na ŋga na tsana, Zuif hay ma zlamar ma gwaŋguɗafama mey, ma vəɗay ŋga me ləvey: «Yah na peŋ na ma harɗawa da 'ərlam ana na.» 42Arka taya ma ləvam sa: «Ŋga na Yezu bəzey ma Zozef kakay ɗaw? Ka səradukwata ha andza baba ŋga na, ta may ŋga na kakay ɗaw? Azlakwa ekəɗey a ləvey: ‹i harɗawa da 'ərlam na teŋgey?›» 43Yezu me tsey guma sa ma ləvatar sa: «Mbəkadama ma gwaŋguɗey mey ka 'ar vaw kwar ana hay! 44Kwa ndaw a slafa ma sawa ka tsakay ɗaw, mandzara Baba ɗaw ma sləradiyawa na ka kavatərawa kakay, arka yah tey na, i da mbəladərawa da meney madakwaydok ana. 45Ma winda ha da ɗeriwel ma ndaw sek hay na: Ma da tatəkadata ndaw hay tabiyaha na, Bay ma Bəla na. Kwa way way ma tsənada tek ma sawa da Baba na, ma təɓa me tetəkey ŋga na na, a sawa ka tsakay ɗaw. 46Akwa na ɗaɗa ndaw ka nəkada Baba na dakay, sey ndaw ana ma sawa da 'ay Bay ma Bəla na, ŋga na, ka nəkada Baba ba. 47I ɓadakwar dərka dərka na, ndaw me pey 'ar na, a ndzefey mendzey me ndəvey kakay ana. 48Yah na peŋ ma mendzey ana. 49Da palah na, baba kwar hay ka zəməmawa mann ba na, taya ka mətsam ba. 50Andza peŋ ma hərɗawa da 'ərlam ana tey na, ndaw me zəmey peŋ ana ŋga na tey na, a da mətsey kakay. 51Yah na peŋ te dey ana, ma hərɗawa da 'ərlam ana. Ndaw ma da zəmey peŋ a neney na, a da ndzey na ma kozaha. Peŋ ana i ma da vəley ana na, slaw vaw ɗaw ana, ma vəla ha na, ma bəla ka ndzefey mendzey.» 52Ka guma ŋga neney na, Zuif hay ma zlamar ma təram vaw ka 'ar vaw ta na kambəlaɓa: «Waya ɗagay ndaw a neney a da vəlandakwar slaw vaw ŋga me zəmey na teŋgey teŋgey?» 53Yezu ma ləvatar tok: «Dərka dərka na i ləvakwar, haɗaw kuray ka zəmam slaw vaw ma Bəzey ma Ndaw kakay, haɗaw kuray ka sam mambaz aŋga na kakay na, ka da ndzafam aha mendzey a vaw kwar kakay. 54Ndaw me zəmey slaw vaw ɗaw, me sey mambaz a ɗaw na, a ndzefey mendzey me ndəvey kakay ana, yah tey na, i da mbəladərawa ta pas madakwaydok ana. 55Hərway slaw vaw ɗaw na, tek me zəmey dərka na, mambaz a ɗaw na, tek me sey na dərka na. 56Ndaw ana me zəmey slaw vaw ɗaw, me sey mambaz a ɗaw na, ma ndza ha da vaw ɗaw, i ma ndza ha da ŋga tey. 57Andza ma Baba ma sləradiyawa na na, ŋga Bay ma mesəfrey, i səfrey eɗey na ta Baba, kəɗey na, ndaw ma da zəmey vaw ɗaw na, a da səfrey na ta yah tey. 58Peŋ na ma harɗawa da 'ərlam ana na andza ha tok: ŋga na gəle ta na ma baba kwar hay ma zəməmawa na. Taya na ka mətsam ba, ama ndaw me zəmey peŋ a neney na, a da ndzey na ma kozaha.» 59Yezu a tatəkadata ndaw hay, da 'ay me ɗuley mey ma Kafarnawom na, andza neney.
Bəzay ma guma ma mesəfrey me ndəvey kakay ana
60Andza ma tsənadama ba andza neney na, ndaw hay haɗadzidzay da walaŋ ma gawla ŋga hay ma zlamar me ləvey: «Guma neney ana ger aha! Ma da slafa ma pafa sləmay na way?» 61Ama ŋga na ma sərafa ka 'ar vaw ŋga na, gawla ŋga hay a gwaŋguɗam aha mey hərwuiya na, Yezu ma ləvatar: «Neney dzay na a tsadakwar metsembeɗ na, teŋgey? 62Arka aza ka da nəkadama Bəzey ma Ndaw a tsəley aha təŋga, ka slam aŋga zlekete na na teŋgey…? 63Ma ndzaha da ndaw na Mesəfrey, slaw vaw na a nefey haɗa ha dakay. Guma ɗaw i ma tsakwar ana hay na, Mesəfrey ta sifa. 64Amana, nduw hay daha da walaŋ a kwar, a pam aha 'ar kakay.» Akwa na, Yezu a səradata zla ka vaw, ndaw ma pam 'ar kakay ana hay, ta ndaw ma da haɗəkada na. 65Ŋga me ləvey sa: «I ma ləvakurawa andza neney ana na, kavədiya: ‹ndaw a slafa ma sawa ka tsakay ɗaw, mandzara Baba ɗaw ka vələrawa tsəveɗ, kakay ana.›» 66Zla da na ŋga na na, gawla ŋga hay haɗadzidzay ma mam tek ata, a wuɗam ma səpama sakay. 67Arka Yezu ma ləvatar a na Kurow kava tsew ana hay: «Kuray na, a sakwar ma daw tek a kwar tikay ɗaw?» 68Ama Simoŋ Piyer ma mbəɗar kava: «Bay’ərlam, la da dawam na ka tsakay ŋgway sa ŋgway! Guma ɗek hay na, guma ma mendzey me ndəvey kakay ana sana. 69La na, la ka pam 'ar ba, la ka səradama ba, kah na Ndaw ma Bay ma Bəla Kokwaɗ ana.» 70Yezu ma mbəɗar kava: «Ma walakwar kuray a neney Kurow kava tsew ana na yah kakay ɗaw? Ama sa tok na, ndaw asləta da walaŋ a kwar na Setene ha.» 71A tsey andza ha na ka Zudas, bəzey ma Simoŋ Iskariyot, hərway ma da haɗəkada na ŋga, ŋga ndaw asləta da walaŋ ma gawla ŋga Kurow kava tsew ana hay.
Currently Selected:
Zaŋ 6: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun