1 Zaŋ 5
5
Me pey 'ar ka Bəzey ma Bay ma Bəla na, slasləlay ma ma wuɗa vaw
1Kwa way way me pey 'ar Yezu na Kriste na, ŋga na ma ya ha da Bay ma Bəla. Arka kwa way way ma wuɗa Bay ma Bəla Baba na, a key na a wuɗa ndaw ana, ŋga na na ma yaha da Bay ma Bəla na. 2Ka neney na ka səradakwa ka wuɗəkwata ha bəzey ma Bay ma Bəla hay na, kendzey andza ka wuɗakwa ha Bay ma Bəla, ka kakwama ha andza mey ma mewey ŋga hay na. 3Hərway ma wuɗa vaw ma Bay ma Bəla na andza neney: hayna wafukwata vaw ka mey ma mewey ŋga hay. Mey ma mewey ŋga na hay na, tek me ləhey ahiya kakay, 4haɗaw azlakwa ndaw ma ya hiya da Bay ma Bəla ana hay tabiyaha ka zəgama 'ar ma sleɗ ba ka bəla na. 'Ar ma sleɗ ana ma zəga ha ka bəla na na, me pey 'ar a lakwa. 5Ɗagay ma zəga 'ar ma sleɗ ana ka bəla na way? Sey ndaw ana ŋga na me pey 'ar: Yezu na Bəzey ma Bay ma Bəla ana. 6Ndaw ana ma sawa ta yam arka ta mambaz, Yezu Kriste, ta yam dada tsa kakay, amana, ta yam ta mambaz, arka ma ka seydewe na na Mesəfrey, hərway ma mey na, Mesəfrey na dərka na. 7Arka taya ma dzəmaya makar me key seydewe na na, 8Mesəfrey, yam ta mambaz, arka taya neney makar ana hay na, ma dzəma mey ahiya da seydewe ana asləta. 9Haɗaw ka təɓəkwata ha seydewe ma ndaw hay na, seydewe ma Bay ma Bəla na ɗuhwa ha a fəna sa. Hərway seydewe ma Bay ma Bəla na andza neney, a kərawa seydewe na na, hərway ma Bəzey ŋga. 10Ndaw me pey 'ar ka Bəzey ma Bay ma Bəla na, seydewe neney ŋga da vaw ŋga daha. Ndaw me pey 'ar kakay na, Bay ma Bəla a tərada ndaw maləwaɗay aha, hərway ka pey 'ar ka seydewe na Bay ma Bəla ma kərawa kavəday ma Bəzey ŋga na kakay. 11Arka seydewe na na, ŋga kəɗey: Bay ma Bəla a vəlandukurawa mendzey ma ndəvey kakay ana, mendzey ana na, ŋga da Bəzey ŋga. 12Ndaw ana ka ndzafa Bəzey ana ba na, ka ndzafa mendzey tsoy, ndaw ana ka ndzafa Bəzey ma Bay ma Bəla kakay na, ka ndzafa mendzey ana kakay tey.
Mendzey fandar fandar ma Kretiyeŋ
13I windadukuraɓa tek a neney hay tabiyaha na, ma aza ha səradama, ha ndzafama mendzey me ndəvey kakay ana ba, kuray a neney hay ma pam 'ar ka Bəzey ma Bay ma Bəla ana. 14Tek ana lakwa ma səradakwa da mevel a lakwa ka slam dey ŋga na na neney: Haɗaw i tsəhafakwa tek na ŋga me wuɗey ana na, a tsənadandakwar sləmay. 15i səradakwa a pafandakwar aha sləmay na, kendzey la tsəhafakwa mey mey na, i səradakwa, i ndzafakwa tek ana lakwa ma tsəhafakwa na. 16Kendzey ndaw a nəkada malam aŋga a ŋgəsey aha, meŋgəsey ana na, a da kəlada a memətsey kakay na, ŋga ka ɗuley mey, arka aza Bay ma Bəla a da vəlar mendzey, kendzey andza dərka na meŋgəsey ana na, a dada ndaw a memətsey kakay na. Meŋgəsey ma dada ndaw a memətsey ana na, daha; i tsey, ha ɗuley mey na, ka sapa ma meŋgəsey ana ŋga na tikay. 17Tek me key hayakakay ana waray waray na, meŋgəsey, ama meŋgəsey hay tabiyaha na, a dadama ndaw a memətsey kakay. 18Ka səradakwaha, kwa way way ma yaha da Bay ma bəla na, a ŋgəsey sakay, ama Ndaw na ma yaha da Bay ma Bəla ana na, a da wafa vaw, arka Ndaw hayakakay ana na, slam har aŋga ka ŋga dakay. 19Ka səradakwa lakwa ndaw ma Bay ma Bəla hay, amana, bəla gədem a ndelemey aha da har ma Ndaw haykakay ana. 20Ka səradakwa Bəzey ma Bay ma Bəla ka sawa ba, arka ma vəlandakwar ma sərada tek, ma da sərada Ndaw na dərka na. Arka lakwa na, da Ndaw na dərka na na, da Bəzey ŋga Yezu Kriste. Ŋga na Ndaw na dərka na, ŋga na Bay ma Bəla, ŋga na mendzey me ndəvey kakay ana. 21Dem a ɗaw hay, ka da zlaram ta ’ərlam so na hay zlay.
Currently Selected:
1 Zaŋ 5: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun