1 Zaŋ 4
4
Ka da səradakwa tek ma sawa da Bay'ərlam na teŋgey?
1Dzam a ɗaw hay, ka da pam 'ar ka mendzey ma mesəfrey hay tabiyaha tsa zlay, amana həlafəmata suwet ka mesəfrey ana hay ba ɗagay, ma səradata taya na ma Bay ma Bəla ɗaw, hərway ndaw sek maləwaɗay ana hay, ma pa mey ahiya ka bəla kambəlaɓa. 2Ka da səradama Mesəfrey ma Bay ma Bəla na, ka neney: mesəfrey waray waray ma ɓada na, Yezu Kriste na a sawa da slaw vaw na, na ŋga na a sawa na da Bay ma Bəla. 3Mesəfrey waray waray ma tsada Yezu ba ka vaw na, a sawa da Bay ma Bəla kakay. Mesəfrey ana ŋga na na, ndaw dugwan ma Kriste, na kuray ma tsənadama a tələkadama ha mey, a sawa ha na, zla ekəɗey na, ŋga ka bəla. 4Dem a ɗaw hay, kuray na da Bay ma Bəla ana hay na, kuray na ka zəgafəmata 'ar ma sleɗ ba, ka ndaw sek ana ŋga na hay. Hərway Ndaw ana da walaŋ a kwar ana na, a fəna ndaw ana ŋga na ka bəla na. 5Taya na ndaw ma bəla ɗey hay, kəɗey na a tsam na, guma ma bəla tiyatsa, arka na bəla a dzəkatar sləmay. 6Lakwa na, lakwa ndaw ma Bay ma Bəla hay, ndaw ana ma wuradara mevel aŋga a ma sərada Bay ma Bəla na, a dzəkandakwar sləmay. Ndaw ana ndaw ma Bay ma Bəla kakay na, a dzəkandakwar sləmay kakay. Ka da səradakwa Mesəfrey ma dərka, ta na ma mezləgey na kava tok.
Ma wuɗa vaw ma sawa da Bay ma Bəla na
7Dzam a ɗaw hay, wuɗakwa vaw ka 'ar vaw lakwa na hay, hərway ma wuɗa vaw na a sawa da Bay ma Bəla, kwa way way ma wuɗey ndaw na, a bawa da Bay ma Bəla, arka na a husey a ma da sərada Bay ma Bəla. 8Ndaw ma wuɗey ndaw kakay na, ka ndzafa Bay ma Bəla tsaray kakay, hərway Bay ma Bəla na a wuɗey vaw. 9Nəkafama ma wuɗa vaw ma Bay ma Bəla a da ɓawa vaw da walaŋ a lakwa na andza neney: Bay ma Bəla ma sləradərawa Bəzey ŋga malay aha ka bəla, ma aza lakwa ka da səfərakwama ta ŋga. 10Nəkafama ma wuɗa vaw na andza neney: ma wuɗərawa Bay ma Bəla na lakwa kakay, ma wuɗandakwar na ŋga. Ŋga ma sləradərawa Bəzey ŋga, andza gənaw ma ger aha, ma da bazləmada meŋgəsey lakwa hay. 11Dzam a ɗaw hay, haɗaw Bay ma Bəla ka wuɗandukurawa ba andza ha tok na, lakwa tiyatsa na, wuɗakwama vaw ka 'ar vaw lakwa na hay tey. 12Bay ma Bəla na, ɗaɗa ndaw ka nəkada ta dey ŋga na dakay, haɗaw ka wuɗakwama vaw ka 'ar vaw lakwa na hay na, Bay ma Bəla a da ndzey da lakwa, arka ma wuɗa vaw ŋga da lakwa ka ndesley ba. 13Ka da səradakwa lakwa ma ndzaya da ŋga, ŋga tey da lakwa na, ka neney: ŋga ka vəlandakwar Mesəfrey ŋga ba. 14Arka la na, la kama seydewe na zləna, la ka nəkadama ba na Baba, ma sləradərawa Bəzey ŋga, andza Ndaw me buwey bəla ha. 15Kwa way way ma ɓada Yezu na Bəzey ma Bay ma Bəla na, Bay ma Bəla na ma ndza ha da ŋga, ŋga tey da Bay ma Bəla. 16Arka la na, la səradama, ma wuɗa vaw ma Bay ma Bəla me key da walaŋ ala na, ka vəday la ma pəmawa 'ar kava, Bay ma Bəla na kokwoɗ aha. Ndaw ma ndzey da ma wuɗa vaw na, ma ndza ha da Bay ma Bəla, Bay ma Bəla tey ma ndza ha da ŋga. 17Da tek a neney tok na, ma wuɗa vaw da walaŋ a lakwa ka ndesley ba, ma lakwa ka da ndzakwa da ma sərafa ka pas ma sariya, ma vəday ŋga na, ŋga andza na ha na na, lakwa tey na, i da kakwama andza ha tey da bəla na tiyatsa. 18Zluwer da ma wuɗa vaw na daha tikay, ama ma wuɗa vaw na hayna na, a kəlada zluwer ba a bəla, hərway zluwer na, me wesey ta me hətey, arka na ndaw me wesey na, ma ndasla ha da ma wuɗa vaw kakay. 19Ka wuɗakwama vaw na, ka vəday ma wuɗandukurawa tsəfəmey aha na, ŋga na. 20Haɗaw ndaw a ləvey: «I wuɗa Bay ma Bəla» ama a ŋgəladata dey ta malam aŋga hay kakay na, ŋga na ndaw maləwaɗay. Azlakwa ndaw a wuɗa malam aŋga, na ŋga ma nəkada na kakay na, a da slafa ma wuɗa Bay ma Bəla, ma nəkada kakay ana na, kakay. 21Nəkadama mey ma mewey ana la ma ndzafəmərawa da ŋga na: «Ndaw ana ma wuɗa Bay ma Bəla na, ka wuɗa malam aŋga tiyatsa.»
Currently Selected:
1 Zaŋ 4: MOF
Highlight
Share
Copy
Want to have your highlights saved across all your devices? Sign up or sign in
Le Nouveau Testament en langue Mofu © 2007 Alliance Biblique du Cameroun