DIMISEY Ɓi madiɗa madiɗa ngi raˀa
Ɓi madiɗa madiɗa ngi raˀa
Ɗerewol Dimise, slimiɗ naŋ ti mi frasẽ na, a lumoko di ti vi hirnga ngi slimiɗ ngi Jumo’ay Magala misi zlezle ti mi grek: Psalmoy, mingiɓi mezle mazlam di dimis ti kiɗa gwat ngi dungur ase’eŋ. Ɗerewol Dimise, i micikilo mi ngi dira dibiɗ wal wal 150 magam di slra ngi huruk huruk a mbuŋ Buymisemuŋ a Israyel zlezle zleˀe. Lammbahay migam gwat gunno gunno ar taŋ na, i misi angi ɗerewol ti mi grek mizlizle zleˀe, Mizli ngi kristu mekelemey mira gam di slra kwaˀaruŋ. Ɗerewol Dimise, wurenna i muwuɗka le a wuzla zlum, misi ara i mi mulumoko di ar mi magala misi zleˀe mazilaka i ngi Davit (Dim 51-65; 67-71; ada ma), ar li cikil ngi mizli ngi korehey (42-49; 84-88), ngi Asaf (73-83, ngi Dimis maɓi ɓi ngi Zuma buy (93-99), ngi Dimis ngi zuɓa mulak vur Bumbulvuŋ (120-134), ada ma. Dimisey 116 na, ɓi mutohoko dumbuŋ a hirnga taŋhay na, i naŋ mabiga bo taŋ, sukwi ngi dimis vuna, gwat ngi dunguroy hĩ’i ngi kiɗ ase’e, gi slra ti dimis ar huruk huruk a mbuŋ Buymisemuŋ, hin miga ɓa a tohoko dimis nah vuna, ada ma. Dimis mekelemeye na, cin taŋ a sli le, asi pulaˀvra ngi mingiɓi taŋ anta cin kwaŋ kwaŋ ta, mbak so na, ar misirkam di na, a zilaka dimis misi ka tayna Cica’ay.
Ɗerewol Dimisey haɗa misi cihil taŋ anta sli wala ta. Amma gar ti nah na, zliv sukwi ngi dimiey haɗa, a slam wala gu, misi ngi hunuma Bumbulvuŋ asi naŋ madiɗa, waɗ asi gi mezle naŋ: 1) Hunuma vu (Dim 8; 19; 33; 100; 103-105; 111, 113; 114; 117; 135; 136; 145-149.) 2) Dimis maɓi ɓi ngi Zumabuy, mabiga taŋ i mingiɓi «Bumbulvuŋ i buy madiɗa» 47; 93; 96-99. 3) Dimis ngi buyoy, dira vur buy madiɗa malla dira dibiɗ ngi buy vuna: 2;18, 20; 21; 45; 72; 89; 101; 110; 144. 4) Dimis ngi ci ng’ar hay ngi Bumbulvuŋ: 15; 24. 5) Dimis ngi zuɓa mulak vur Bumbulvuŋ, Israyeley mazlaka ti taŋ mira ram ng’ar muguzlum mihirnga hirngahay makir magaka taŋ vur vi gar (Pak, muguzlum ngi luma; waɗ muguzlum ngi mazlaɓ): 84; 91; 121;122. 6) Dimis ngi zli a Siyoŋ, magam di muguzlum ngi jiŋ ngi li Buymisemuŋ muwuna vur hay naŋ a Zeruzalem: 46; 48; 76; 87; 132. 7) Dimisey misi mbur migi sedege malla mijiviɗ maɓa ɓi ngi Buymisemuŋ ngi ki mumuyuŋ ngi zay sla a slimiɗ malla mi ngi kuti da mitiɓihey: 14; 50; 53; 75; 81; 95. 8) Dimisey ngi dubuna gwat da mitiɓihey: 37; 49; 73; 78; 112; 127; 133, zliv ngi jum ng’avi taŋ i Dim 1 ati 119. 9) Dimis ngi mizli muroko ar bonoy, maɓam ɓi ngi jum ngi mitiɓihey maka ka zil da Buymisemuŋ vur mendere muluma taŋ le: 12; 44; 58; 60; 74; 79; 80; 83; 85; 90; 94; 106; 108; 123; 126; 137. 10) Bonoy ti sukwi wal wal gar na (sipi mitiɓihey nder nder, gila ɓi, jiji, ji vu ng’ar hirwuy mulak), a ga ɓa mitiɓihey a ram ti sipi jini avu Buymisemuŋ. Misi ani hanayna i tumbul ngi mbur gar, taŋ jom gar taŋ ti sukwi haɗa te’e: 5-7; 13; 17; 22; 25;26; 28; 31; 35; 38; 39; 41-43; 51; 54; 57; 59; 61; 63; 64; 69-71; 86; 88;102; 109; 120; 130; 140-143. 11) Ar dimis ngi si na vuhoy na, i mbur mitiɓi maso ga sise da Buymisemuŋ, vur naŋ mucukoŋ tir bonoy malla naŋ mupulaŋ mungra naŋ: 9-10; 30; 32; 34; 40.1-12; 92; 107; 116; 118. 12) Ngi kiɗa mi naŋ na, mbur mitiɓi maɓa wuluk naŋ ngi mumul ati ngi ndir zuy ar dimis ngi pula vu mbaka: 3; 4; 11; 16; 23; 62; 131; 139. Yesu a zli dimis le ti ɗerewol Dimise (Mark 14.2 6 waɗ ar li mekelemey). Yesu ada slufa ɓi taŋ ndrehhe, angi naŋ madubuna gwat da mizli (Mark 12.1 0; 12.3 6) waɗ ar li mekelemey, ada slufa Dim 118 ati 110, ngi ɓa ɓi ngi dira dibiɗ nga naŋ (Mark 15.3 4 waɗ mekelemey; Luk 23.4 6, anga na, a zuɓo ɓihey le neˀ neˀ ar Dimis 22 ati 31). Angi ɗerewol dimis malla angi mindir Jumoˀay Magala mindir na, Jumoˀay Nawaya a luuma na, i ɓi masa gi tumbuŋ avu Kristu, si bonoy naŋ, (Dimis 22 ati 69 na, i muslufa taŋ is mbeˀ mbeˀ ar Mat 27.3 4-48), slikiɗ naŋ ti wuzla mumucahay waɗ dudok naŋ (kaɓa ar Dim 16, 110 ati 118, Piyer a slufa taŋ le ar naŋ mitil mi ar Slra 2 ati 4). Jom gar na, ɗerewol Dimise, i muslufa le fineˀ is skat ar Jumoˀay Nawaya.
Dira dibiɗ ngi Israyeley, dira dibiɗ ngi Yesu, dira dibiɗ ngi misi kristu mudumbuŋhoy (Slra 4.2 4-26) na, ɗerewol dimise, hã dana kwana, i miviɗiviɗi, mizli gar munuwam, yo mira sipam nuwa mingiɓi ngi Buymisemuŋ ara na si, ɓa ngi ɓa ɓi taŋ da Buymisemuŋ.
Currently Selected:
DIMISEY Ɓi madiɗa madiɗa ngi raˀa: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.