JOP 42
42
Jop minjika hĩhĩy naŋ
1Akẽh na, Jop a mbiɗa da Bumbulvuŋ, a ɓaŋ:
2Yi si na le, gwat gar, ki ga gu,
gwat ka mujuwa le ngi gi gar na, ɓa ki si na ta na, anta.
3Ki ɓa le: «Gwat ka mujuwa ngi gihey gar, mbur maburɗa taŋ,
manja a sin gwat neˀ le ara na, i waka?»
Haˀaw! I ɓi ɓi mutuwaˀ le haɗa tir manja sin naŋ,
ɓi mufuna wuluk ngi mbur, mifiniy gidaŋ le.
4Ka ki ɓiy na: «Cin, puliy ɓa i ɓi,
i wuɗ i cufuɗuw, ɓa ka ki mbiɗiy di.»
5I sinuw zleˀe na, asi ya macin ti cin maɓaka ɓi ɗike,
ani wurenna, i ra puruw ti hiri ɗu muduba.
6Vurˀe, mesem ara giy ti vu ɗu vuna, i ra zil marava ar ɓi ya miɓa zleˀe na,
y'ani burfuk burfuk ar murɓuk waɗ ar fucu.
BUMBULVUŊ MIƊIYA JOP AMUŊ
7A dirba Bumbulvuŋ mikiɗa mi ngi ɓi naŋ ati Jop na, a ɓa Elifas mbur Temaŋ tuwa: «Mevel ɗu ara tiɓi ka vu ar ka, waɗ ar ngama ɗikey mucuw na, asi ki ɓaka ɓi ɗu kaslsla kaɓa gawla ɗu Jop na ta. 8Wurenna, jam gusoŋ tarnaˀ waɗ zlengerek tarnaˀ, ara lumaka gawla ɗu Jopo, ɓa ki gam taŋ mikuli mizlamzlam vur hirnga kum, yo ɓa Jopo kwana, a sa dir dibiɗ vur kumo. Ya masa gi ti kum weˀe asi gilaw kum na ta na, mbele naŋ. Asi kumo, ki ɓaka ɓi ɗu kaslsla kaɓa gawla ɗu Jop na ta.»
9Elifas mbur Temaŋ ati Bildat mbur Suha waɗ Sofar mbur Naˀama, a gaka gwat Bumbulvuŋ miɓa taŋ di ɗaˀ ɗaˀ le tuwa, joˀ Bumbulvuŋ a tiɓa diradibiɗ ngi Jopo.
10Ti Jop madir dibiɗ vur ngama naŋhay tuwa na, Bumbulvuŋ a ɗiyaŋ a muŋ, a sikaŋ gwat ngi lum naŋhaya, hã makaw cuw cuw.
11Sukum naŋ mizile ati mongosohoy, waɗ mizli misinakaŋ zlezle zleˀe gar na, a soko nga pur naŋ. A zumam ɗaf bummoˀ a hay naŋ. A bigakaŋ wuɗ taŋ mawuɗakaŋ, yo a tislakaŋ mevel vur bonoy Bumbulvuŋ migaŋ di na gar. Dar mbur gar a vulaŋ gwat ngataraŋ, suloy ngi ɓiri bara pal waɗ dangwa ngi ɓiri tapasl tapasl pal.
12Bumbulvuŋ a ɗuwula mi da Jop ar siifa naŋ ngi dirba hana, fineˀ ar ngi vi mucohomoyo. Jopo naŋ ti tumuŋ durmuk kuruˀ ngaˀ mufaɗa, zlogomo durmuk merkeɗ, sla ngi hufoy gam durmuk waɗ madiya zunguhoy durmuku. 13Yo a yi ziri mizilehey tarnaˀ waɗ mongosohoy makir ma. 14A ca slimiɗ da zuŋ naŋ mongoso mudumbuŋ Yemima,#42.14 Yemima a mbiɗiavra gonok , mijingaˀ naŋ Kesiya,#42.14 Kesiya a mbiɗiavra mufuyuk ngi giziŋ mekelem ada, a zĩˀĩ ndum, waɗ mimakir taŋ Kereŋ-Hapuk,#42.14 Kereŋ-Hapuk a mbiɗiavra susuɗuk muɗumo. 15Bal bal hirwuy kurzluˀ na, ko ziri mongoso mukuy ka ngi Jopoy na anta, yo cine taŋ a vula taŋ zlili, mi nga taŋ, taŋ masa zumaka a dirba naŋ, rak rak ati sukum taŋ mizileheye.
16A dirba nah, Jop a zik vi skat ti kukur mufaɗa ava ma. A pura ziri naŋhay ati dideˀ naŋhaya, dideˀ ngi popurok ati dideˀ ngi mukuturtukutur waɗ dideˀ misintiwakahaya cek. 17Dar Jop a muc ti gal, a zum ɗaf le.
Currently Selected:
JOP 42: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.