MIKUCUWULOY 7
7
Ngwas migi madama matikina mbur gawla
1Mangal ɗu, ja mingiɓi ɗu a hirnga,
ɓi ya maɓuw di ɗaˀ le na, anja a ndir i zlili ɗiki.
2Da ki wuɗ le ɓa ki ndir ti siifa na, ja ɓi ya maɓuw di ɗaˀ le na a hirnga,
yo ɓi ya mudubunuw di na, jigina ka zinga ngi hiri ɗiki.
3Juwa taŋ kaˀ avu haŋ ɗike,
toho taŋ toh toh avu beleler ngir mevel ɗike.
4Ɓa sinmijileŋ na: «Ki sukum ɗu!»
Yo cufuɗa lesle hirdam hirdam ar deɗe ngi ngama ɗiki.
5A sa jiginuw avu ngwas misi may zil,
waɗ avu ngwas mulak misi mingiɓi naŋ deɗeke.
6Ngi pas mekelem ada na, ya deŋ a mi fenetir ngi hay ɗu,
i ra pur hiri ng'avra.
7I pur gawla manja lesley,
keɗ a wuzla gawlahay na, mangal menjeɓele manja lesle.
8Naŋ macuh tir jiviɗ madiɗa ngir walahaya, gweˀ avu li mukulkuc, hay ngi ngwas tuwa misi ara na,
a zla a zuɓ jiviɗ ngi hay ngwas tuwa.
9Li zuyyo, li miji le kutupuˀo,
wuzla duvuɗ, luvuŋ titira,
10keɗ na, ngwas tuwa, ara ru nga ji di hirnga,
zana kaˀ kaɓa ngwas sulome, wer pal naŋ.
11Ngwas nah a wus haɓar haɓar, naŋ anta cifi teˀteˀe ta,
naŋ anta cifi virzi a hay naŋ ta ma.
12Neˀ na, n'ani ar li ngi luuma a diga, neˀ na, n'ani a jiviɗ madiɗa a diga,
a pi hiri ar mazlaka jiviɗey gar.
13Pura ɗi, a ja mangal tuwa le kuɓuy,
a luwaŋ hiri law, a ɓaŋ:
14«Ya ti may ngi gi mikuli ngi gi sise zleˀe,
gwat ya miɓa i sa ga na, dana a gi le muduba.
15Vurˀe, ya mubo na nga sipi ɗike, ɓa i ji ti ka hirnga,
ani i lumuw le jaka.
16I ɗiya arngawo ɗu le, gwatay sirit sirit,
ti boɗoko mungboɗoɗohoy, ti gabaga mislirkeɗ slirkeɗ ngi ruwuy Ezipte.
17I kuca urdi mezlehey le da li hin ɗu,
urdi mir, alowe waɗ urdi kanel.
18Sawa ɓa i wam ti wuɗa vu, hã avu mipriki.
Cunukum ndum arleˀe ti wuɗa vu ndra.
19Asi zil ɗu naŋ anta a haya ta.
A zuɓ mulak le kileŋ ng'ar li.
20A hil dala le a haŋ ar gabala.
A sa mo sey ti kiya babaraŋ.»
21A ja mangala le ti mingiɓi naŋ ngi tikina vu tuwa,
a kaŋ le kuɓulaŋ aseˀe ti mi naŋ mideɗek haɗa tuwa.
22Mangal ara sipaŋ a haŋhaŋ si,
kaɓa sla maram di nga sliˀay,
kaɓa gilaw mujuwa le, maram di nga kuti ti bonoy,
23hã sliɗ naŋ na, a bo ɓultoŋ ɓultoŋ avu vu.
A wus vu kaɓa ɗiyuw mawus vu ng'ar mazaɓa,
ara zizi di i siifa naŋ na, a si na ta,
24Ziri ɗuwoy, wurenna, cinaka mingiɓi ɗu,
jikaka slimiɗe kuy kuy asi mingiɓi ngi balam ɗu.
25Vur ngwas misi kanah na, anja ki wuluk wuluk le ngi ci ng'ava ta.
Ki zizi ng'ar jiviɗ naŋ maru di na ta.
26Asi mike na, a hizigiɗ mizli le haɗa teˀe,
mizli naŋ mikiɗa taŋ gar na, i gambarahay.
27Hay naŋ i jiviɗ ngi ru ng'ar li ngi mizli mumucahay,
aru ti mburo ng'ar hay misi luvuŋ ngi mucu.
Bible en Langue Guiziga © L’Alliance Biblique du Cameroun, 2011.