MIKUCUWULOY 6
6
Duvus mbur mihil le avu mbur na, ki ci ar ɓi nah ta
1Mangal ɗu, da ki zuɓa ɓi ngi duvus ngi mbur cil ɗike le,
yo ki zliram haŋ le kap ati mbur muvulaŋ di,
2da ki juwa hirnga ɗike le ti mingiɓi ngi balam ɗike,
yo mingiɓi ngi balam ɗike, a cu le ar kwar na,
3ga gwat nah mangal ɗu, ka wurenna asi haŋ ngi mbur muvula duvuso, anja ki cuko hirnga ɗike,
ara lumaŋ, hurdum hirdam, ga slimiɗ da mbur cil ɗike.
4Ki pula vu ɗike mbak da hinje ta,
anja hinje a so zirip zirip a hiri ɗike ta,
sey da ka miwurka le. 5Cuko hirnga ɗik tir kwara, kaɓa mangazaw malla ɗiyuw malih avu ngamngam na ya.
Anja ki gi masafaya ta
6Masafaya malambaˀvu, pura milkitiŋ kwaɗay!
singila gwat ngi gi taŋ ayɗi, ki lum sinmijileŋ anga.
7Milkitiŋ, ko mijigin naŋ anta,
ko mbur makaŋ mbuŋ malla buy naŋ anta.
8Ti hin pas na, a wi vu ti gwat ngi zum naŋ,
yo ti sifi kwana, a cikila gwat ngi zumo.
9Masafaya malamaˀvu, k'ada tuppo hã ti vunaka?
Ki sa puɗuk tir hinje, hã ti vunaka?
10Ki wuɗ ki hinje neˀ, ki musuk vu neˀ,
ki muruɗo duba neˀ, yo k'ada haŋ gijaw so,
11na so na, angi pas nah gar na, murga a sa ndilo ka gurjik, kaɓa mbur maliˀi jew jew lambaˀ,
viya a sa ndilo ka kaɓa mbur mufuyo vu.
Kpak ngi mbur maɓi ɓi dar ta
12Mbur mandir ti ɓi mijeŋ ta ngek avu mi na,
i kesef lambaˀ, i mbur migi malambaˀa.
13A kuɓuc hiri ngi ga gilaw da mizli, a vuruk vu ti sar, yo ti haŋ.
14Gi malambaˀa, i kpak nga naŋ.
A gi gidiɓi ngi gi malambaˀ ar pas gar,
a slikiɗ tiri.
15Vurˀe, a sa zizi gurjik lambaˀ si,
a sa kiɗaka a haŋhaŋ kutum si, slalak naŋ anta.
Gwat Bumbulvuŋ mahirsa
16Gwatay ada merkeɗe, Bumbulvuŋ mahirisa taŋ, na zle taŋ tarnaˀ ti naŋ mapura kuyta wãˀa:
17Pura vu ɗik fineˀ mizli, irneˀ magi slir, pi pumbus ngi mbur migi gwat ta,
18wuluk malambaˀ mimbizeˀ a mevel,
sar mazuɓ kutum kutum nga gi malambaˀa,
19sedewo mijeŋ ta ti slir yoɓ yoɓ,
waɗ mbur mazlir sukumuŋhoy ngi tiri.
Ji lesl avu gi madama
20Mangal ɗu, ɓi ngi bunuk maɓuw di ɗaˀ le na, ja a hirnga,
yo ɓi ngi munuk madubunuw di na, ki pura ka sefel ta.
21Dira taŋ dar dar a mevel ɗike ndrehhe,
luwa taŋ law law gun asi ˀay ɗike, kaɓa gwat ngi wuya.
22A sa bugukuw jiviɗ ar ka maru ati ka masawa gar,
a sa jiginukuw ar li hin ɗike,
yo ka mupuɗuk le na, a sa vulukuw kuti.
23Asi ɓi maɓukuw di ɗaˀ le na, naŋ ka lampe, yo ɓi madubunukuw di na, i li minjahha,
mbur madubunuw gwat ti lesl mijileŋ na,
a buguw di i jiviɗ ng'ar siifa.
24A buguw di i ji lesl avu ngwas migi malambaˀa,
yo avu irne mideɗek ngi ngwas burvula.
25Ki hĩyã ngwas misi kanah asi kuy naŋ na ta,
pura hiri naŋ maɗiɗi vu na, ki pulaŋ vu ta.
26Asi ngwas sulome na, a sipi di i gwat ngi zum neˀkini,
amma madama, a zuzuw siifa ɗik mupuɗawa wãˀa.
27Mbur maki vu ar jiiba,
manja vu a tiɓi avu zana na, ada kwa?
28Malla mbur maru ar zayvu,
manja vu a wuraŋ sara na, ada kwa?
29Ko wa gar maru ng'avu ngwas ngi cil naŋ na, naŋ kanah ya,
ko wa gar muwusaŋ le na, naŋ anta bi njiraŋ ta.
30Mbur muhul gwat le ngi kiɗa may kwacay naŋ na,
anta hirsakaŋ ta.
31Amma da ɓi naŋ misa njik le na, a sa wuruk makaw tarnaˀ nga meˀe,
hã a ziza zlili ngi hay naŋ cek ma kini.
32Mbur magam madama ati ngwas na, hirnga anta ava ta,
a gi kanah ngi ziza siifa naŋ.
33A sa wurkakaŋ ti kiɗ, yo a sa mi a ruwuy,
pi mesem naŋ na, anta sa susuyum ta wãˀ.
34Asi suloŋ a sa slikiɗa himaˀ da zile fõh fõh,
yo tapas pula cuwal na, anta sa puraŋ ircece ta.
35N'anta sa ngum ɓa a wurkaŋ vurˀe ta wãˀ,
ko da a vulakaŋ gwat ngatarahay haɗaka wanaka gar na, naŋ anta sa tiɓa ta.
Bible en Langue Guiziga © L’Alliance Biblique du Cameroun, 2011.