MISE 3
3
Ki mumuyuŋ zay sla a slimiɗ madiɗa ngi mizli
1Mise a ɓi na:
«Mizli madiɗa ngi dideˀ ngi Zakopoy,
migi kiita ngi mizli Israyeley,
cinam so!
Anja sinukum ɓi mikaslsla na, i kum ta jak kwa?
2Amma kumo, gi gwat mezle na, ki puraka hiris le, dar ki wuɗam gi malambaˀ jaka,
kum kaɓa migi useˀhey, ki turoko kuturkuy ngi dumvu ngi mizli,
waɗ useˀ ngi vu taŋ misirit a hirnga tesl taŋhaya.
3Haˀaw ɓula ni, mizli mazumaka useˀ ngi mizli ɗuwoy,
kaɓa migi useˀhey maturoko taŋ kuturkuy ngi dumvu,
mangilaka taŋ tesleye,
maslaka taŋ laŋ laŋ kaɓa useˀ ar misirgaɗ,
yo kaɓa useˀ ar mejejeŋ na,
4da taŋ misa hizigam widi le ng'avu Bumbulvuŋ na,
naŋ anta sa mbiɗa taŋ di ta.
Ti hin nana, a sa ɗumo mihiri naŋ avu taŋ,
vur a gam mungra madiɗahay le haɗa.
Ki mumuyuŋ zay sla a slimiɗ mijiviɗ mitikina vuhoy
5Mizli matikinaka mizli ɗuwoy na,
Bumbulvuŋ a ɓi vur t'ani:
«Da a lumam gwat le ngi humbuɗ a balama na,
a tilam mi a ɓam zuy ada,
amma da a lumam gwat ngi humbuɗ a balama ta na,
a slikiɗam gi vurum mipal.
6Vurˀe, duvuɗ a sa ji avu kumo, pura gwat ti kleŋ anta mata,
yo luvuŋ a sa gi avu kumo, njika ɓi a sa gi anta mata.
Pas a sa diɗ avu kum mijiviɗeye,
luvuŋ a sa sirtukum.»
7Mizli mupuroyo a sa pam mesem,
mipi daˀasaya, a sa gam welele.
Taŋ gar taŋ, a sa ɗumoko mihiri taŋ,
asi Buymisemuŋ anta zila taŋ mi mata.
8Amma ya, mbele ˀUf ngi Bumbulvuŋ na,
yi lum gidaŋ le haɗa,
si na sli ɓi ati tuso mevele,
ɓa dideˀ ngi Zakopoyo taŋ mislikiɗam ɓi, yo Israyeley migam mungra na, i njika taŋ di.
Mise mitil mi ti Zeruzalem masa tiri diŋ
9Mizli madiɗa ngi dideˀ ngi Zakopoy,
yo migi kiita ngi mizli Israyeley,
cinaka ɓi ani.
Ki puraka ɓi mijeŋŋe hiris le,
yo ɓimujuwa na, ki tiram di paraway.
10Zlili ngi walahay Siyoŋ,
ki lumaka ti pi pumbus ngi mizli, ngi Zeruzaleme, ki lumaka ti gi mungra madiɗa.
11Buy taŋhaya, ɓa a gaka kiita na,
sey gwat ngatara taˀ le,
masay taŋhaya, ɓa a dubunaka gwat da mizli na,
sey a wurkaka taŋ wuruk le,
mijiviɗ taŋhaya, ɓa a ɓaka ɓi ngi gwat masa gi na, sey dala taˀ le.
A jaham jah ti Bumbulvuŋ, a ɓam:
«Bumbulvuŋ naŋ anta wuzla ndra ta kwa?
Kay, mendere anta so ng'ar ndra ta.»
12Vurˀe, asi ɓi kumo,
Siyoŋ a sa tiri kaɓa guva muhuva le ɓultoŋ ɓultoŋ,
Zeruzalem a sa tiri kaɓa kitikil,
yo muwã ngir hay ngi Bumbulvuŋ a sa tiri ɓuh.
Currently Selected:
MISE 3: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
