MISE 2
2
Ɓi vur muzuma gwat ngi mizli fineˀ gidaŋhay
1Mizli mututup ar gwat ngi hin taŋhay ti duvuɗu,
mawulkam wuluk malambaˀ,
yo majuwam ɓi ngi gi mendere da mizli,
yo da li muwun le si na, a gaka gwat taŋ mawuɗama cummo, asi t'ada ti gidaŋ ngi gi naŋ.
Kay, mizli tayna, taŋ ar bonoy.
2Da taŋ hĩhĩyam guvahay le na, a tiɓaka taŋ da taŋ.
Da i hayay, a zuɓaka taŋ da taŋ.
A jaka buy ngi haya jom ati hay naŋ wãˀ,
yo a guzuvuraka mburo jom ati zlili naŋ wãˀ.
3Vurˀe, ya Bumbulvuŋ i ɓi na:
«Ani i juwa le a kwacay ɗu ngi go mendere ng'ar mizli tayna,
ko kum anta sa muɗoko ˀay kumoy ti raˀa gu ta,
kum anta sa ram hirnga paɗ a muŋ gu ta,
vur a sa gi i pas ngi bonoy.»
4Ti hin nah na, a sa ɓam ɓi ngi kicuwul ani ar kumo,
yo a sa zlukum dimis ani: A kiɗ mi le.
a sa ɓam: «Ndr'i ngizlam le pay.
A tiɓaka hirwuyo le avu mizli ndraˀahaya.
A gi mbri mbri ɓa a tiɓam ndra di maka?
Mislikiɗa ɓiheye, ara wuɗkaka guva ndraˀahaya ar wala taŋ.»
5Vurˀe, a wuzla jum ngi mizli ngi Bumbulvuŋhaya hirwuy, mi ngi kum na, ko mbur pal masa wuɗkukum di anta.
Mizli mangumam tiɓa mi ngi mijiviɗ ta
6Mizli a ɓam: «Ki ngilam mi ta,
anta ngilam mi kanah ta:
Ĩˀĩ, naɓa zi anta sa kiɗ mi pas le ta.
7Mizli Israyeley i minisahay le kwa?
Bumbulvuŋ anta ɓus ɓi mata, a kiɗ mi le sukwa?
Gwat ngi gi naŋ kahana sukwa?
Mingiɓi ɗu a gi mezle da mbur magi gwat kasl kasl na takwa?»
8Buymisemuŋ a ɓi vur kumo:
Ti zleˀe na, ki tiram mesene ngi mizli ɗuwoy le.
Mizli macohom manja zluwun avu kumo, ti taŋ mumoko le tir vurum na,
godo ngi hirnga zana taŋhaya, ki cukoko taŋ di avra.
9Ki ɓulaka ngwas ngi mizli ɗuwoy avra,
tir hay taŋ mawuɗama.
ya muɗuva hirnga da ziri taŋhay na,
ki tiɓaka taŋ di ngi wãˀ.
10Slikiɗam a ram, hana i pas ngi muska vu mata.
Dili ɗik na, masa suw ti bonoy i naŋ,
yo i bonoy ti vu ava.
11Mbur maɓi ɓi lambaˀ,
yo masli slir,
maɓi: «I wuɗ ɓa i tulukum mi vur ɓi ngi mbaazla ati gwat ngi si mawi vu» na, kisa lumam,
naɓa mbur nah vuna i mijiviɗ ngi mizli tayna.
12Kum dideˀ ngi Zakopoy keɗeɗe,
i wuɗ i kusukum gar kumo.
Kum Israyeley mindiram na, i wuɗ i cikilukum.
I sa jumo hirnga kum arleˀe, kaɓa tumuŋhoy ar gezleŋ purla,
kaɓa ginew taˀ gezleŋ ar li zum naŋ.
Joˀ ˀay kumo a sa cino wuwwo asi kum mihaɗi na.
13Mbur mangirukum jiviɗe, ara ru ɓaˀ a mbuŋ kumo,
ki ngiraka jiviɗ purla le,
ki tuwuɗaka mizlingre le,
yo ki bam le ti raˀa.
Miɓaˀ a mbuŋ kum ngi kis kumo, i buy kum Bumbulvuŋ.
Currently Selected:
MISE 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.