LEVIHEY 18

Ɗuvavu mitika jiviɗ naŋ le

1Bumbulvuŋ a ɓa Moyise: 2«Ɓa Israyeleye na: I ya Bumbulvuŋ, Buymisemuŋ kum. 3Hirwuy Ezipte, kum micifam zleˀe a diga na, ki sipaka sar ngi mizli ngi digahaya ta, yo hirwuy Kanaˀan, ya masa ra ci ti kum ng'ara na, ko ki sipaka ɓimujuwa taŋhaya ta. 4Sirikey muboko tivi ya na, jaka taŋ a hirnga, yo sipaka ɓimujuwa ɗuwoyo, asi yi Bumbulvuŋ, Buymisemuŋ kum.

5Ɓimujuwahay ati sirikey muboko tivi ya na, jaka taŋ a hirnga, da mbur mira gi taŋ slra na, a ndir ti siifa. I ya Bumbulvuŋ.

6A wuzla kumo, anja ko mbur Israyel a hin ti muy naŋ ta. I ya Bumbulvuŋ.

7Ki pura mbuŋ ngi bunuko ta, yo ki pura ngi munuko ta ma, asi i munuku, ki pura mbuŋ naŋ ta.

8Ki pura mbuŋ ngi ngwas ngi bunuko ta, asi i mbuŋ ngi bunuku.

9Sukum ɗik ngi bunuk malla ngi munuko, ko da a gil a wazlaray, malla avra kwana, ki pura mbuŋ naŋ ta.

10Dideˀ ɗik, zuŋ ngi mangal ɗik malla ngi zuŋ ɗik mongoso na, ki pura mbuŋ naŋ ta, asi i mbuŋ ɗik tehhe a muŋ vuna si.

11Zuŋ ngi ngwas ngi bunuk na, ki pura mbuŋ naŋ ta, i zuŋ ngi bunuku, i sukum ɗik mongosoŋ.

12Mudumunuk, sukum ngi bunuko, ki pura mbuŋ naŋ ta, asi taŋ pumbus purla ati bunuko.

13Mudumunuk, sukum ngi munuko, ki pura mbuŋ naŋ ta, asi taŋ pumbus purla ati munuko.

14Ki pura mbuŋ ngi jamba ɗike, ti hin ti ngwas naŋ ta, asi i mudumunuku.

15Ki pura mbuŋ ngi dideˀ ɗik, ngwas ngi mangal ɗike ta, asi i ngwas ngi mangal ɗiki, ki pura mbuŋ naŋ ta.

16Ki pura mbuŋ ngi ngwas ngi sukum ɗike ta, kite i mbuŋ ngi sukum ɗik vuna si.

17Ki pura mbuŋ ngi ngwasa cuw taŋ ati zuŋ naŋ ta, ko dideˀ mongoso ngi ngwas vuna, zuŋ ngi mangal naŋ malla ngi zuŋ naŋ mongoso kwana, ki pura mbuŋ naŋ ta, asi taŋ pumbus purla ati ngwas vuna, naɓa ki gi di i gwat ngi mesem.

18Ngwas ɗike, ti naŋ misi angi siifa aruŋ na, ki zuɓa sukum naŋ ta, ka masa pura mbuŋ ngi sukum naŋ na, a sa gam mesene ar wala taŋ.

19Ngwasa, ti naŋ muro ti nguf na, ki pura mbuŋ naŋ ta, asi naŋ ti dili.

20Mbur, kum misi ar hirwuy purla na, ki pura mbuŋ ngi ngwas naŋ ta, asi a cuw ar dili.

21Ziri ɗikeye, ko ki vul pal asi taŋ ngi gi mikuli da kuli Moleke ta#18.21 Molek i slimiɗ ngi kuli, ti mi Hebere, a mbiɗiˀvra ‹buy› malla ‹mesem›. . Da ki gaka le kanah na, kite ki hiryiy slimiɗ nga ya Buymisemuŋ ɗike le. I ya Bumbulvuŋ.

22Mbur mizile, a hin ti zil cil naŋ, kaɓa mahinam ti ngwas na ta, asi i gwat malambaˀ mukuyta wãˀ.

23Ki hin ti gwat misãmi ta, asi a cuw ar dili. Yo anja ko ngwas a vula vu naŋ da gwat misãmi, ɓa a hin di ta, asi i jiviɗ naŋ ta.

24Sirik tayna gar na, anja ko purla asi taŋ, a ci ti kum ar dili ta wãˀ, asi sukwi ya maɓula t'ani a mbuŋ kum na, mica taŋ ar dili, i sirik tayna vuna. 25Mica hirwuy Kanaˀan ar dili i gwat tayna vuna, yi kutaŋ ti bonoy asi malambaˀ naŋ na, dar hirwuy a ɓula mizli ngir naŋhay avra.

26Kumo na, ɓimujuwa ɗuwoy ati sirik ɗuwoyo, jaka taŋ a hirnga. Mbur Israyel malla ko moholoy misi a wuzla kumo na, gwat ngi gi malambaˀ tayna gar na, ki gaka taŋ ta. 27Gwat ngi gi malambaˀ tayna gar na, mizli ngisi ruwuyoy dumbuŋ ar kum zleˀe na, a gaka taŋ le, joˀ hirwuy a hiryi. 28Naŋ kine, ki hiryaka hirwuyo ta, vur naŋ masa ɓulukum avra, kaɓa naŋ muɓula sukwi mudumbuŋhoy ar kum na ya. 29Amma gwat ngi gi malambaˀ tayna, mbur migi le purla ar wala taŋ na, a sa gwahakaŋ ti wuzla mizli naŋhay avra.

30Ɓimuɗuva ɗuwoyo, jaka taŋ a hirnga. Amma ɓimujuwa malambaˀ tayna, mizli magaka zleˀe na, ki gaka taŋ ta, yo anja ki cam ar dili ti gwat ngi gi tayna ta. I ya Bumbulvuŋ, Buymisemuŋ kum.

Currently Selected:

LEVIHEY 18: BEGDC

Highlight

Copy

Compare