LEVIHEY 17
17
ISRAYELEYE, TAŊ PAL
Ɓi ngi zuma pumbusu
1Bumbulvuŋ a ɓa Moyise: 2«Aroŋ ati ziri naŋhay waɗ Israyeley gara, ɓa taŋ na: Ɓi Bumbulvuŋ muɓukum di ɗaˀ le na, anihĩ:
3Da mbur Israyel a sli ˀay ngi sla le, ngi tumuŋ malla ko ngi ˀaw ar walahay guɗuko, malla da ko a sla a duba gala, 4manja aru di ndol le a mizlingre guɗuk ngi zlir ti ya Buymisemuŋ, yo a biga bigeˀ le ngi vul da ya Bumbulvuŋ a mbuŋ guɗuko ta na, a sa cufuɗaka ɓi ngi pumbus naŋ mipa na ava, yo a sa gwahaka mbur nah ti wuzla mizli naŋhay avra. 5Naŋ kine, anja Israyeley a kiɗaka ginew ngi gi mikuliheye a duba gala lambaˀ ta, amma, sey a soko taŋ ndol le da masay a mizlingre guɗuk ngi zlir ti ya, ɓa a gam taŋ mikuli da ya Bumbulvuŋ ar deɗe ngi mikuli ngi vula zuy. 6Li gi mikuli misi a mizlingre guɗuk ngi zlir ti ya tuwa na, masay a kucaŋ pumbus ngi ginewe, yo a wura mungul naŋ anga, ɓa zĩˀĩ naŋ a tisliy mevel da ya Bumbulvuŋ. 7Vurˀe, Israyeley anta sa gaka mikuli ngi madama taŋ na, da kuli taŋ bazuwayay na mata. Hana i ɓimujuwa avu taŋ, a mbiɗi ta wãˀ, hã ngi set, ngi samadin.
8Yo kisa ɓa taŋ ma na, da mbur Israyel malla moholoy misi a wuzla kumo, da a wuɗ le ɓa a gi mikuli mizlam zlam wãˀ malla mikuli mekelem pal na, 9sey aru ti ginewe ndol le a mizlingre guɗuk ngi zlir ti ya, ɓa a giy di mikuli. Da buy nah a ga kanah ta na, a sa gwahakaŋ ti wuzla muy naŋhay avra.
10Da mbur Israyel malla moholoy misi ada a wuzla kumo, ara zum pumbus na, i sa mbuɗo hiri ng'ar naŋ, i sa gwahaŋ ti wuzla Israyeley avra. 11Asi gwat ya miga gar na, siifa naŋ, naŋ ar pumbusu, yo yi vulukum di le ar li gi mikuli, ɓa ngi vula jiviɗ ngi pula mungra ar siifa kumo. Naŋ kine, pumbus mavula jiviɗ ngi pula mungra na, asi siifa naŋ anga. 12Ya miɓa Israyeley: ‹Mbur Israyel malla moholoy misi a wuzla kumo, anja a zum pumbuso ta na, vurˀeŋ.›
13Mbur Israyel malla moholoy misi a wuzla kumo, da a kiɗ useˀ le a madala, ko i ɗiyuw misi zliv a zumaka useˀ naŋ na, a sla ˀay naŋ, waɗ a zih muyuŋ zah zah nga hirnga pumbus naŋ. 14Asi mike na, gwat ya miga gar misi titiri aruŋ na, siifa naŋ, naŋ ar pumbusu, yo ma na, yi ɓa Israyeleye le: ‹Gwat ya miga wanaka gar na, ki zumaka pumbus naŋ ta, asi siifa ngi gwat ya miga gar na, i pumbus naŋ. Da mbur muzuma le na, sey a gwahaka ti wuzla Israyeley avra.› 15«Gwat mumuca ti muc malla gwat ngi ɓuh mija, da mbur Israyel malla moholoy muzuma le na, sey a buna zana naŋhaya ceɗ ceɗ, naŋ vuna a bun, a ndir ti dili, hã pastaˀa, a dirba nah so na, dili naŋ a zuɓ le avra.
16Da a buna zana naŋhaya ta, yo naŋ vuna a bun ta ma na, zayɓi ngi mungra nah, naŋ a hirnga naŋ.»
Currently Selected:
LEVIHEY 17: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
