ZOZUWE 3
3
Israyeley mutuwuɗaka mizaw Zurdeŋ
1Ngi miprik prik naŋ na, Zozuwe ati Israyeley gar a slikiɗam baɗ a Sitime, ara ndilam a mi mizaw Zurdeŋ, a hinam a diga ɗagay, ɓa a sa tuwuɗama. 2Angi kiɗa mi ngi hin mimakir naŋ na, buyɓi ngi wuzla Israyeleye, a laˀam ar walahay guɗuko, 3a ɓaka mizli ɗaˀ le: «Da kum mupuraka levi masayaya le, a zuɓaka akoti ngi jumoˀay ngi Bumbulvuŋ, Buymisemuŋ kumo le na, pulaka li misenna, sipaka taŋ. 4Amma da kum mira ram na, anja li a ndir ar wala kum ati taŋ, zliv gwat ngi kilometir pal gu. Anja ki kiraham gweˀ ng'avu taŋ ta. Kanah na, naɓa kisa sinaka jiviɗ kum masaram ti raˀa, asi ki cohom tir jiviɗ nah ɗaˀ zleˀe ta.»
5A dirba nah na, Zozuwe a ɓa mizli: «Zuɓaka hiryi kumoy avra, asi tiprike, Bumbulvuŋ a sa gi gwat ngi zuma hirngahay a wuzla kumo.» 6Yo Zozuwe a ɓa masayaya: «Zuɓaka akoti ngi jumoˀaya, a ram ɓaˀ a mbuŋ mizli.» Dar taŋ a zuɓaka akoti ngi jumoˀaya, a ram ɓaˀ a mbuŋ mizli.
7Bumbulvuŋ a ɓa Zozuwe: «Dana na, i sa tiri ti ka madiɗa a hirnga Israyeley gar, ɓa a sinaka, yi sa ndir ati ka kaɓa ya misi zleˀe ati Moyis na ya. 8Naka so na, masayay majijiraka akoti ngi jumoˀaya, ɓa taŋ ɗaˀ le: ‹Da kum misa ndilam le a mi mizaw Zurdeŋ na, ki cam nga hur mizawa, ki cicam dedeŋ anga.›» 9Akẽh na, Zozuwe a ɓa Israyeleye: «Kirohoko ng'aka, ɓa ki cinaka mingiɓi, Bumbulvuŋ Buymisemuŋ kum maɓukum di anihĩ.» 10A dirba nah, Zozuwe a ɓa taŋ: «Bumbulvuŋ misi ti siifa, tapas naŋ masa ɓula mizli a mbuŋ kum: I kanaˀanay, Hitihey, Hivihey, Persihey, Girgasihey, Amorihey waɗ Zebusihey na, kisa sinaka naŋ da a wuzla kumo gisiŋ na ava. 11Bumbulvuŋ miwa hirwuy gara, akoti naŋ ngi jumoˀaya, ani a sa ru ɓaˀ a mbuŋ kumo, a hur mizaw Zurdeŋ. 12Wurenna so na, a wuzla sukwi Israyel na, hilam mizli kuruˀ nga cuw, vur sukwi gar na, mbur purla. 13Bumbulvuŋ, miwa hirwuy gara, masay majijirakaŋ akoti ngi jumoˀaya, da sar taŋ misa ci le kulaˀ angi yam ngi mizaw Zurdeŋ si na, yam maɓul a mizawa, ti muŋ naŋ na, a sa sli, a sa gi totoŋ kaɓa mohol.»
14Mizli, ti taŋ maslikiɗam ti walahay guɗuk taŋ, ɓa ara tuwuɗaka mizaw Zurdeŋ na, naɓa masayay majijiraka akoti ngi jumoˀaya, taŋ ara ram a mbuŋ si. 15Hirak ti hin nah na, i sifi, naɓa mizaw Zurdeŋ ara zuɓ reŋ reŋ. Naŋ kine, masay mijijira akoti ngi jumoˀaya, micaka sara kulaˀ a mi ngi yama si na, 16dar yam maɓul a mizawa tir vay muŋ naŋ na, a cici. A ki totoŋ ɓultoŋ, naŋ zar kileŋ hã a Adam, walahay ngi ciki Sartaŋ. Yo yam maɓul jik kini ngir ti wuzlaɓuh mikirɗak kirɗak, mubuliy mandaŋ na kwana, a sli tasl wãˀ. Joˀ mizli a tuwuɗaka mizawa hiri taˀ nga Zeriko.
17Masayay, majijiraka akoti ngi jumoˀay ngi Bumbulvuŋ, a cicam dedeŋ ar li mingbaŋ ngbaŋ a wuzla mizaw Zurdeŋ, ko a wusam neˀ ta. Dar mizli Israyeley gar a tuwuɗaka mizaw Zurdeŋ ti sar njiraŋ njiraŋ, hã zigiduw gar a tuwuɗu.
Bible en Langue Guiziga © L’Alliance Biblique du Cameroun, 2011.