ZOZUWE 2
2
Zozuwe mislin mupura lihey cuw nga Zeriko
1Zozuwe, mangal ngi Nuno, a slin mizli cuw, zle a Sitime, ɓa ara puroko li yaŋ yaŋ. A ɓa taŋ: «A ra puroko hirwuyo waɗ walahay Zeriko.» Mupura lihey tuwa, a ram nga Zeriko, a cam ngi hay ngwas sulome ada, a zilaka Rahap, a hinam a hay naŋ. 2Mizli ara ɓaka ɓi nah da buy madiɗa ngi Zeriko, a ɓakaŋ na: «Ngi duvuɗ hana, mizli mizilehey a coko ani ng'ar walahay aka, i Israyeley, a soko ngi pura hirwuyo.» 3Akẽh na, buy tuwa, a slin ng'avi Rahapa, ɓa a ɓakaŋ: «Mizli ziley miram ng'avi ka, micam ngi hay ɗik na, bo taŋ, asi a soko ngi pura hirwuyo gar.» 4Naɓa Rahap a ɗumo mizli mucuwoy tuwa le zleˀe ɗum. Joˀ a mbiɗa da mizli: «Naŋ kanah gisiŋ, mizli tayna a soko le ng'avi ya gwat naŋ, amma taŋ i mizli ngi damahay ka na, i si na taŋ zleˀe ta. 5Duvuɗ miji, ti taŋ mawuɗ a gicaka mizlingre ngi walahaya na, mizli tayna a bam le. A ram nga maka na, yi si na ta. Sipaka taŋ kutum, ɓa ki ra jaka taŋ is.»
6Dambalaka na, ngwas tuwa, a jiɗ ti taŋ le nga hirnga gbale a muŋ, waɗ a ɗumo taŋ ɗum asi dum ngi gugumay mislirkeɗ naŋ micikila zikitiŋ a hirnga gbale naŋ tuwa. 7Mizli tuwa, a sipaka taŋ kini nga mizaw Zurdeŋ, kini tir li ngi tuwuɗ a mizawa. Misipi mizli tuwa, mibam put tir walahaya si na, a gicaka mizlingre ngi walahaya giceˀ kutumo si. 8Mupura lihey tuwa, a hinam ɓa a hinjam t'aruŋ si na, Rahap a jiɗ ng'avi taŋ a hirnga gbale. 9Joˀ a ɓa mizli tayna tuwa: «I si na le, Bumbulvuŋ a vulukum hirwuyo le da kum. Zluwun ara ga ndra ti kum haɗa wãˀ, hã mizli ngisi hirwuy ndra gar, ara jijikam ngbaˀ ngbaˀ ti kumo. 10Asi mike na, ti di kum muboko ti ruwuy Ezipte na, Bumbulvuŋ a hisika yam ngi mubuliy lavaɗa hisik a mbuŋ kumo. Yo gwat kum migaka a dubazaw Zurdeŋ da buy madiɗa ngi Amorihey mucuw, Sihoŋ ati Ok, kum mingizlaka taŋ kap wãˀ na, i cinaka ɓi nah le gar. 11Ndra micinaka ɓi tayna na, a huluɓa ndra le hilaɓ hilaɓ wãˀ, ko i musuwunam fẽh a mbuŋ kumo gu mata. Asi Bumbulvuŋ Buymisemuŋ kum, i Buy a muŋ waɗ a ruwuy aka ma gar. 12Wurenna so na, hudumom hidam le a mbuŋ ɗu, ti slimiɗ ngi Bumbulvuŋ. Ani yi gukum mezle le, anja kisa gaka mezle da mizli ɗuwoy a ya takwa. Bigikiy gwat ɓa i sa si na i gisiŋ, 13kisa pulaka miyi ɗuwoyo ti siifa, sukum ɗu mizile ati mongosohoy, waɗ gwat taŋ misi ti nah gar, yo kisa laham ndra avu muco.» 14Mizli tuwa, a mbiɗakaŋ di: «Haˀaw so, i muc ndra, na sey da ki njika ɓi ndra ta far. Da Bumbulvuŋ misa vula ndra hirwuyo le na, i sa purukum ti hiri mezle, yo i sa gukum gwat ti jiviɗ naŋ kasl kasl.» 15Rahap a pi sar ti mizli tuwa ti zeweɗ tir fenetir, asi hay naŋ, naŋ zlar da mohol migidaŋ muguno walahaya. 16Dar a ɓa mizli tuwa: «Ngam hirnga kini nga muwã, vur mizli masupukum na, masa lumukum. Ki ra ɗumom a diga, hã hin makir kwaɗay, sey da mizli masupukum na, a moko le. A dirba nah so na, kisa zuɓaka jiviɗ kumo gwaɗ kum.» 17Mizli tuwa, a mbiɗakaŋ di: «Hudum ka muhudumo ndra na, ɓa i sa gaka gwat nah na, jiviɗ naŋ a sa cuh ani: 18Ti ndra masa coko nga ruwuy kumo na, zeweɗ gagaza hana, kisa juwa tizirehhe a mi fenetir ka mupo sar ti ndra ti nga na. Ki sa cikila miyi ɗikeye ngi hay ɗiki, sukum ɗikey ati mizli ngi hay kumoyo gar. 19Da mbur ngi hay ɗik mutuwuɗa miviŋ le, ɓa a bo ng'avra, da a kiɗaka le vagay na, pumbus naŋ a sa mbiɗi nga hirnga naŋ a muŋ, amma ndra, ndra cimak ar ɓi nah. Amma mbur gar, kum mubummoˀ a haya, da a kiɗaka le vagay na, pumbus naŋ, a sa mbiɗi nga hirnga ndra. 20Amma da ki njika ɓi ndra le na, naɓa hudum ndra, anta sa ja ndra ta.» 21Ngwas tuwa, a mbiɗa taŋ di: «I tiɓa le, anja a gi kaɓa mingiɓi kumo!» Akẽh na, a pula taŋ, joˀ taŋ a cohom so. A dirba nah na, a juwa zeweɗ gagaza tuwa, kaˀ a mi fenetire. 22Taŋ a ram kini nga muwã tuwa, ara ɗumom ɗum a diga hin makir, hã mizli misipaka taŋ tuwa, a moko. Dambalaka mizli misipaka taŋ vuna, a ram ti pur taŋ le bal bal a jiviɗe, ko a lumaka taŋ ta. 23Akẽh na, mizli mucuwoy tuwa, a poko sar ti muwã, a tuwuɗaka mizaw Zurdeŋ, a mam ng'avu Zozuwe, mangal ngi Nuno. Gwat taŋ mupuraka a diga gar na, a slufakaŋ ɓi nah so. 24A ɓaka Zozuwe na: «Kay, Bumbulvuŋ a vula hirwuy nah le gar asi haŋ ndra gisiŋ. Ko mizli ngisi ruwuy ngi digahay vuna gar na, hã a jijikam kpar kpar a mbuŋ ndra ma kini.»
Currently Selected:
ZOZUWE 2: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.