EZAYI 3
3
Gi biyãˀbiyãˀ ar zumabuy ngi Zuda
1Haˀaw, zumabuy ngi Zuda ati ngi Zeruzaleme,
gwat mavula taŋ ɗaf ati yam gar na
Bumbulvuŋ migidaŋ wãˀa, a sa muɗa taŋ di avra
yo gwat majina taŋ gar na, a sa zuɓa taŋ di avra.
2Mizli migidaŋhay ati mizli ngi vurumoy,
migi kiitahay ati mijiviɗey,
mipi daˀasay ati mizli micawwahay,
3madiɗa ngi sojehey ati mizli madiɗahay,
mukuti vuhoy ati misina pura daˀasay,
waɗ misina ɓi ngi cucukoyo, a sa muɗa taŋ gar avra.
4Bumbulvuŋ a ɓi: «I sa vula taŋ ngi buyo
i ziri memeɗehey
ɓa a sa waka taŋ ka mawuɗam.»
5Mizli a sa guzuvuram vu ar wala taŋ,
mbur gar a guzuvur cala.
Zuŋ, a guzuvur midigila,
mbur kesefe, a guzuvur buyɓi.
6Mbur a sa ja sukum naŋ, muy mikaslsla, a ɓaŋ:
«Ka, zana ada avu ka, kisa cifi buy ndra.
Anja ɓi mibiyãˀbiyãˀ ndra hana, a ndir asi haŋ ɗiki.»
7Mbur numuŋ a sa ɓaŋ ti ˀay bok:
«Yi mumbulo mizli ta,
yo a hay ɗu gwat ngi zum anta, zana ngi ki anta.
Ki cifikiy buyo ta.»
8Zeruzalem a mbizli le, Zuda a diɗ le.
A ra mbiɗam hirnga avu Bumbulvuŋ
ti mingiɓi taŋ waɗ ti gwat ngi gi taŋ.
Yo ara hirsaka dudok naŋ.
9Mihiri taŋ a njika taŋ le,
a ɓaka ɓi ngi mungra taŋhaya kaɓa mizli Sodomoy na ya,
ko anta ɗumoko ta.
Kay, ara soko ti mendere nga hirnga taŋ.
10Kum ɓam: mbur mijeŋŋe ara mumul,
asi hiri a sa ciraŋ ti gwat ngi gi naŋ.
11Amma mbur misi moˀore, naŋ ar bonoy,
asi a sa gam di weˀe avu gwat ngi gi naŋ.
12Bumbulvuŋ a ɓi: Aw mizli ɗuwoy! Buy mihimaˀ kumo, i zuŋ meciɗeke.
Yo i ngwasay mawukum.
Aw mizli ɗuwoy! Miji hirnga kumoy ara zuzukum.
Yo ara ngizlam ti kum avu jiviɗ kum masipaka.
Bumbulvuŋ maga kiita da miwi mizli
13Bumbulvuŋ a ro weˀ vu ngi gi kiita,
a ro deŋ ngi gi kiita da mizli naŋhay.
14Bumbulvuŋ ara ru ti micawwa naŋhay ati buy ngi mizli naŋhaya ng'ar kiita.
A cufuɗa taŋ: «Guva ngi gudubuno, i kum mihiryaka,
yo hay kumoyo, ki nahaka taŋ le ti gwat kum mutuɓoko taŋ avu misi murgahay.
15Ki kirahaka mizli ɗuwoy avra vur mike?
Yo misi murgahaya, ki kurpaka taŋ asi sar vur mike?»
I ya Bumbulvuŋ Buymisemuŋ misi gidaŋ wãˀ maɓi.
Ngwas mukuyteˀ ngi Zeruzalemey
16Ya Bumbulvuŋ i ɓi na:
«Ziri diili ngi Siyoŋhoy, ara huhumom vu,
a laˀam ˀay kaˀ a muŋ,
a puram vu ti dangwal ngi hiri.
A ram ciɗkeˀciɗkeˀ,
ti hurumo ɓalaŋ ngi sartaŋhaya.»
17Bumbulvuŋ a sa ga taŋ movroko a hirnga,
yo a sa hijaka taŋ hirnga kuleɗ kuleɗ#3.17 Hirnga kuleɗ, a mbiɗiavra mbur nah naŋ ar vagay, malla ara liki. A mbiɗiavra mana mbur nah i mbur dangay.
18Ti hin nah, Bumbulvuŋ a sa cuko gwat ngi wuya taŋhay avra:
i mawiyerey, virzle hiri paatu, dangwa,
19gwat ngi slimiɗey, ɓalaŋ, zana memeɗe ngi sirta hiri,
20loppoloy, virzle memeɗe ngi ˀay,
kanda mislipa, muhurlum mutufa, laya.
21dangwa, gwat ngi hutuŋ,
22zana ngi muguzlumoy, adikuhoy, zana ngi luw asi ˀay, gabal ngi haŋhay,
23darogalay, zana mija ti gugumay mislirkeɗey, lafayehey waɗ zana ngi tuwuɗa hirnga.
24Ar deɗe ngi ˀurdi, i zĩˀĩ mitititi,
ar deɗe ngi kanda, i zeweɗe,
ar deɗe ngi slupa hirnga, a sa hijaka taŋ,
ar deɗe ngi zana ngi gugumay mislirkeɗe, i zana ngi vagay,
ar deɗe ngi kuy ngi vu, i dumvu mukuy ta.
Wudiga ngi Zeruzalemey
25Zeruzalem, a sa kiɗaka mizli ɗikeye pay ti maslalam,
soje ɗikey a sa micam ar kiɗa vu.
26Walahay gar a sa niˀic, yo a sa tuwuy.
Joˀ kisa cifi kupuyah ti lik, kaɓa ngwas miziza ziri naŋhay le cek.
Bible en Langue Guiziga © L’Alliance Biblique du Cameroun, 2011.