EZAYI 2
2
1Mingiɓi, Bumbulvuŋ miɓa ɗaˀ le da Ezayi, mangal ngi Amot, vur walahay Zuda ati ngi Zeruzalem.
Mizli gar a sa ram nga Zeruzalem
(v. 2.2-4; pura Mise 4.1-3)
2Hin a sa sawa, muwã, hay ngi Bumbulvuŋ misi anga na,
a sa gi dum hirnga muwãhay gar,
yo a sa funa li miɗigireye gar.
Sukwi ngi mizli gar a sa ram nga diga.
3Mizli haɗa a sa ram, yo a sa ɓam:
«Soko! Juɗukum nga muwã ngi Bumbulvuŋ,
ngi hay Buymisemuŋ ngi Zakopo.
A sa dubuna ndra gwat ngi gi naŋhay,
ndr'i sa sipam jiviɗ naŋ.»
Naŋ kine, gwat ngi dubun avu Bumbulvuŋ, a bo ti Siyoŋ,
yo mingiɓi naŋ, a bo ti Zeruzalem.
4A sa tiri migi kiita ar wala ngi sukwi ngi mizli,
a sa tiri miɗiya ɓi ngi mizli haɗa.
Maslalam taŋhaya, a sa vuɗ taŋ gulekey,
ziwit taŋhaya, a sa vuɗ taŋ slagwayay.
Sukwi ngi mizli anta sa pukam maslalam ng'ar sukwi mekelem mata,
anta sa dubunaka gi vurumo mata.
5Dideˀ ngi Zakopoy, soko,
akum ar li minjaha ngi Bumbulvuŋ.
Hin ngi Bumbulvuŋ, i hin ngi kiita
6Aw Bumbulvuŋ, mizli ɗikey, dideˀ ngi Zakopoyo, ki pula taŋ le.
Mizli ngi si pas ngi miprikey, a roko hoyo hoyo a diga,
mupura daˀasaya, taŋ fineˀ Filistiheye,
asi ziri ngi mulakay a diga haɗi wãˀ.
7Hirwuyo, i minaha le ti ɓiri bara waɗ ti ɓiri tapasl tapasl,
zlili anta sluf ta.
Hirwuyo i minaha le ti pilisi,
mota ngi vurumoy anta slufam ta.
8Hirwuy i minaha le ti kulihey:
mizli gar ara hurukom a mbuŋ gwat taŋ mindiraka taŋ,
a mbuŋ gwat, mbur titira miɗiya ti haŋ naŋ.
9Vurˀe, sey mizli titirahay a huruk hurukam,
mbur titira, sey a huruk huruk a ruwuy.
Buymisemuŋ, ko ki pula taŋ mungraˀahaya ta.
10Bumbulvuŋ a magi zluwun,
yo slimiɗ naŋ mazil fineˀ gidaŋ na,
kilam ng'ar mandazlayay, ara ɗumom a ruwuy.
11Mizli mahuhumom vu na, a sa maka taŋ nga ruwuy,
mizli manjurom vu na, a sa maka taŋ a ruwuy:
ti hin nah na, a sa hunumam i Bumbulvuŋ pal naŋ.
12Asi Bumbulvuŋ, i misi gidaŋ wãˀa, hin naŋ ada pal,
ti hin nah na, mizli mapuraka vu taŋ kaɓa taŋ gidaŋ, taŋ fineˀ mizli na, a sa ga taŋ kiita, ɓa a vuso taŋ,
ɓa a mataŋ nga ruwuy.
13A sa ga kiita da miter mijek, suburo ngi Libaŋhay,
waɗ da widis madiɗa kaɓa miter ngi Basaŋhay,
14a sa ga da muwã madiɗahay,
waɗ da li miɗingirey,
15a sa ga da hay musuburohoy
waɗ da mohol matuwuɗam tira gu ta,
16a sa ga da palalam madiɗa ngi yamay,
ati palalam hirngahay.
17Mbur mahuhum vu gar na, sey a huruk huruk,
yo mbur majijihi gar na, sey a huruk huruk a ruwuy.
ti hin nah, a sa hunumam i Bumbulvuŋ pal naŋ.
18Dar kulihey gar a sa susuymom.
19Bumbulvuŋ magi zluwun,
yo slimiɗ naŋ mazil mifineˀ gidaŋ na,
ti naŋ masa ga zluwun da ruwuyo,
cam ng'ar butumoy,
yo ara ɗumom ar vigiɗ ngi ruwuy.
20Ti hin nah, kuli mipa ti ɓiri bara ati ɓiri tapasl tapaslay, ɓa a huruk hurukam a mbuŋ taŋ na, mizli a sa hizigaka taŋ da munduwaŋhay ati gujumoy.
21Bumbulvuŋ magi zluwun,
yo slimiɗ naŋ mazil mifineˀ gidaŋ na,
ti naŋ masa ga zluwun da ruwuyo,
mizli a sa kilam ng'ar butumoy,
waɗ ng'ar poporohoy.
22Ki ɗuvaka wuluko taˀ ar mbur titira mata. I musuwun mabo fẽh ti hutuŋ naŋ tewle.
Naŋ na i mi yaka?
Bible en Langue Guiziga © L’Alliance Biblique du Cameroun, 2011.