BI NGI ISRAYELEY 40
40
Buymisemuŋ mupula jiviɗ ngi nga guɗuk naŋ
1Bumbulvuŋ a ɓa Moyise na: 2«Hin ɓulaˀ, ngi kiya mudumbuŋ na, kisa nga guɗuk ngir guɗuk ngi zlir ti ya Buymisemuŋ. 3Akoti misi ɓi ngi jumoˀay ara na, a sa kaka anga, ɗum a duba zana minjar ngi tika hiri na. 4A sa soko ti tabulo, a sa ɗiyaka ɗaf muvulahay le da ya, angi tabul vuna, a sa soko ti li ngi ɗuva lampe, a sa jaka vu avu taŋ. 5Li gi mikuli ti urdi miɗiya ti ɓiri tapasl tapasl pal naŋ tuwa, a sa ɗuvaka taˀ a mbuŋ akoti ngi jumoˀaya, a sa njiram zana ngi tika hiri njar avu miviŋ. 6A sa ɗuvaka li gi mikuli ti ginew zlam zlama, a mizlingre guɗuk ngi zlir ti ya Buymisemuŋ. 7A sa ɗuvaka kisa ngi buno ar wala ngi guɗuk ngi zlir ti ya Buymisemuŋ waɗ li gi mikuli, ki pam yam cer cer araŋ. 8A sa njiraka zana, njar ng'ar sarzlavaɗ, gun guɗuko, waɗ zana ngi tika hiri njar a mizlingre ngi wazlaraya. 9Ki sa zuɓa mal ngi vula slra, ki kuca guɗuko, waɗ gwat ngi raˀahaya gar. Naŋ kine, kisa vula da Buymisemuŋ jom ati gwat ngi slra naŋhaya gar. Zle tapasa, a sa tiri inga ya gisiŋ. 10Ki sa pa mal da li gi mikuli ti ginew zlam zlam waɗ da gwat ngi gi slra naŋhaya gar, kisa vuliy di da ya Buymisemuŋ, joˀ li gi mikuli a sa tiri inga ya. 11Ki sa pa mal da kisa waɗ da li ɗuv naŋ na, ki vuliy taŋ da ya. 12Ki sa ru ti Aroŋ ati ziri naŋhaya, nga mizlingre ngi zlir ti ya Buymisemuŋ, ki buna taŋ. 13A dirba nah, kisa ka zanahay mipal na da Aroŋ. Ki paŋ mal, ɓa a tiri masay ngi gi slra ɗu. 14Ki sa ɓa ziri ngi Aroŋhoy ɓa a kirohoko ng'avu ka, ki ka taŋ jibehey. 15Ki sa vula taŋ slra ti pa taŋ mala, kaɓa ka muvula da cine taŋ na ya, ɓa a gikiy mikuli. Mal ka masa pa taŋ di nah na, a sa tiri ti taŋ i masayay hã ngi sete, taŋ vuna ati dideˀ taŋhaya.
Moyis miɓa mizli, a ng'aka guɗuk ngi Bumbulvuŋ
16Moyis a ga slra le heˀ kaɓa Bumbulvuŋ miɓaŋ di ɗaˀ le na: 17Hin muɓulaˀ ngi kiya mudumbuŋ, ngi vi mucuw naŋ, a dirba bo taŋ ti hirwuy Ezipte na, a ng'aka guɗuko. 18Moyis a ɓi ɓa a ng'aka guɗuko, ng'asi virzi ngi ɓamtalaya, a nga dum naŋhaya, a ka mbalaya, a nga ɓamtalaya. 19A njiraka zana a hirnga guɗuko, waɗ a sirtaka sirit ti zana ngi garak, kaɓa Bumbulvuŋ muɗuva da Moyise. 20Moyis a hila beleler misi ɓimuɗuva mukuruˀhoy tuwa, a pa taŋ nga hur akoti, a ca ɓeɓele ngi zuɓa akoti kulaˀ kulaˀ ar li taŋhaya, waɗ tiɗeˀ mi ngi akoti. 21A ci ti akoti tuwa ng'ar guɗuko, waɗ njar zana ngi ɗumo akoti misi ɓimuɗuva ara tuwa, kaɓa Bumbulvuŋ miɓa ɗaˀ le zleˀe da Moyise. 22A ɗuvaka tabul tuwa taˀ asi guɗuko, kini tir vay muŋ, ti mbuŋ zana minjar ngi tika hiri tuwa. 23A ɗiyaka ɗaf muvula le da Bumbulvuŋ tuwa ɗiyeˀ ɗiyeˀ angaŋ, kaɓa Bumbulvuŋ miɓa ɗaˀ le zleˀe da Moyise. 24A ɗuvaka li ɗuva lampe taˀ ar guɗuk ngi zlir ti Buymisemuŋ, kini tir vay ruwuy, cir angi tabulo. 25A nduvuɗaka vu avu taŋ, a mbuŋ Bumbulvuŋ, kaɓa Bumbulvuŋ miɓa ɗaˀ le zleˀe da Moyise. 26A ng'aka li gi mikuli miɗiya ti ɓiri tapasl tapasl pal naŋ tuwa, kaˀ a hur guɗuko, ti mbuŋ zana minjar ngi tika hiri tuwa. 27A zlumaka urdi anga, kaɓa Bumbulvuŋ miɓa ɗaˀ le zleˀe da Moyise. 28A njiraka zana ngi tika hiri njar avu miviŋ ngi guɗuko. 29A dirba nah, a nga li gi mikuli ti ginew zlam zlama, gweˀ avu mizlingre guɗuk ngi zlir ti Buymisemuŋ, a gam mikuli ti ginew zlam zlam anga, yo a vulam gwat mutukuzohoy anga, kaɓa Bumbulvuŋ miɓa ɗaˀ le zleˀe da Moyise. 30A ɗuvaka kisa taˀ ar wala ngi guɗuk ati li gi mikuli, waɗ yam cer cer ara ngi buna haŋ ati saray. 31Moyis, Aroŋ ati ziri naŋhaya, a bunaka haŋ ati saraya ti yam nah. 32Da a wuɗam le ɓa a cam ng'ar guɗuk ngi zlir ti Buymisemuŋ malla a kiraham ng'ar li gi mikuli na, sey a bunaka haŋ ati saraya ceɗ le, kaɓa Bumbulvuŋ miɓa ɗaˀ le zleˀe da Moyise. 33Moyis a ɓi, a njiraka zana ngi gi wuya da dalamay avu zlavaɗ ngi wazlaraya, gun gun a hirnga guɗuk ati li gi mikuli, yo ɓa a luwaka zana ngi tika hiri avu mizlingre ngi wazlaraya. Joˀ Moyis a kiɗa mi ngi slra wãˀ kahana so.
Dudok ngi Bumbulvuŋ minaha guɗuk naŋ
34Akẽh so na, cunju a tirslika guɗuk ngi zlir ti Buymisemuŋ tirslik, dudok ngi Bumbulvuŋ a naha guɗuko. 35Ha Moyis a ci ng'ar guɗuko gu mata, asi cunju aro tirslik a hirnga naŋ, yo dudok ngi Bumbulvuŋ a naha li guɗuko le. 36Israyeleye, ɓa a slikiɗam ng'ar li mekelem na, sey da cunju a zuɓ le nga muŋ, a hirnga guɗuko. 37Amma da cunju a zuɓ nga muŋ ta na, t'anta cohom ta, a kutukoko hin naŋ masa zuɓo. 38Bumbulvuŋ a biga da Israyeleye, naŋ da a wuzla taŋ na, ti papasa, cunju a tirslika guɗuko tirslik, yo ti duvuɗo kwana, vu ciɗak ciɗak, a gi kahana angi zuɓa mulak taŋ gar.
Currently Selected:
BI NGI ISRAYELEY 40: BEGDC
Highlight
Share
Copy
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.