BI NGI ISRAYELEY 14
14
Eziptehey misipaka Israyeley ɓa a moko taŋ a muŋ
1Bumbulvuŋ a ɓa Moyise na: 2«Ɓa Israyeleye, ɓa a moko, a sa pam a Pi-hahirot, ar wala ngi Mikdol ati mubuliy. Ki sa paka walahay guɗuk kumo a diga, puɗak ar Baˀal-Sefoŋ, gweˀ a ciki mubuliy. 3Dar buy madiɗa ngi Ezipte a sa ɓi vur Israyeleye: Pura t'ani a laˀam kiŋ kiŋ ka mibihirngahay lambaˀ asi ruwuyo, wuzla ɓuh mikirɗak kirɗaka, a ziza taŋ le, a gi le birngiŋ avu taŋ! 4I sa ga ɓa hirnga ngi buy Ezipte a tiri gidaŋ, a sa supukum. Amma i sa biga dudok ɗu ava, ti ya masa ngizla taŋ ati soje naŋhay gar na, Eziptehey a sa sinaka yi Bumbulvuŋ.» Joˀ Israyeley a gaka kanah gisiŋ. 5Mizli a ɓaka buy Ezipte ati gawla naŋhaya na: Israyeley a kilam le na. Akẽh na, buy Ezipte ati gawla naŋhay, a mbiɗaka wuluko, a ɓam: «I gam hana i mike? I pulaka Israyeley a cohom mbak slra ndra!» 6Buy Ezipte a ɓi ɓa a juwakaŋ mota ngi vurumoyo, a cohom ati soje naŋhaya. 7A hil mota ngi vurum hirnga hirnga skat skat merkeɗ waɗ mota ngi vurum ngi ruwuy Ezipte gar, mota ngi vurum gar njukumoˀ njukumoˀ ti sojehey. 8Bumbulvuŋ a ga ɓa hirnga ngi buy Ezipte a tiri gidaŋ, dar a sipa Israyeleye. Ti Israyeley mabam na, a waka zleˀe kaɓa a pulam vu le. 9Ezipteheye ti pilis taŋhay gar, mota ngi vurumoy waɗ misi piliseye, a sipaka Israyeleye, ara jaka taŋ is a Pi-Hahirot, puɗak a mihiri ngi Baˀal-Sefoŋ, gweˀ a ciki mubuliy, taŋ mipaka walahay guɗuk a diga tuwa. 10Israyeley tuwa, keɗ na, Eziptehey ara supoko taŋ, yo buy Ezipte naŋ gweˀ si! Zluwun a ga Israyeleye le haɗa, a wudam ng'avu Bumbulvuŋ ˀay ngar ngar. 11A ɓaka Moyise: «Ki so ti ndra nga muc a wuzla ɓuh akaka na, li dika vu a kic le a Ezipte kwa mbrike? Ki bo ti ndra ti Ezipte vur mike? 12I ɓukuw le a Ezipte a diga takwa: Pula ndr'i gam gawla ngi Eziptehey! Zuwen ndra migam gawla ngi Eziptehey, a funa ndra mamicam a wuzla ɓuh na le.» 13Moyis a ɓa mizli: «Ki zluwunam ta! Cicam gidaŋ gidaŋ! Dana, kisa puraka Bumbulvuŋ masa luhukumo. Kum mupuraka Eziptehey dana ani na, kum anta sa puraka taŋ mata ndiɗaˀ wãˀ. 14I Bumbulvuŋ masa kiɗ vu ar deɗe kumo, kumo cifam teˀteˀ»
Bumbulvuŋ miki jiviɗ ar mubuliy
15Buymisemuŋ a ɓa Moyise: «Ki tiliy mi da ya vur mike? Ɓa Israyeley vuna a zuɓam jiviɗ jaka! 16Amma ka, zuɓa ganday a muŋ, zuɓa haŋ ng'ar mubuliye, wuɗuka kpah a wuzla cuw, ɓa Israyeley a tuwuɗaka ti sar njiraŋ njiraŋ. 17Na ya, yi sa ga ɓa hirnga ngi Eziptehey a tiri gidaŋ, ɓa a cam ng'ar mubuliy a dirba kumo. Dar yi sa biga gidaŋ ɗu angi buy Ezipte ati mizli naŋhaya gar, angi mota ngi vurum naŋhay waɗ misi pilis naŋhay. 18Naŋ kine, ya misa biga gidaŋ ɗu le angi buy Ezipte, angi mota ngi vurum naŋhay waɗ ar misi pilis naŋhay na, a sa sinaka Bumbulvuŋ i ya.» 19Modro ngi Buymisemuŋ miɓaˀ zleˀe a mbuŋ Israyele tuwa, ara cici ti dirba taŋ. Musure ngi gazlavay miɓaˀ zleˀe a mbuŋ taŋ tuwa ma na, a sa ki ti dirba taŋ. 20A cici ar wala ngi Eziptehey ati Israyeley. Gazlavay a gi luvuŋ tir vay mekeleme, tir vay numuŋ, a ga li njahha ti duvuɗo. Akẽh na, kap ti duvuɗo, mbur makirih ng'avi cala anta. 21Moyis a zuɓa haŋ ng'ar mubuliye, kap ngi duvuɗo, Bumbulvuŋ a kursa yam ngir mubuliye ti burkataŋ gambara maso tisi pas ngi miprik, a hila yama, yam a wucuh wucah, li a ndir ngbalaŋ ngbalaŋ. 22Israyeley a tuwuɗaka mubuliye ti sar njiraŋ njiraŋ. Yam a gi toŋ toŋ tir hazum taŋ, toŋ toŋ tir gula taŋ kaɓa mohol. 23Eziptehey a sipaka taŋ, a cam a dirba taŋ ti pilis ngi buy Ezipteheye gar, mota ngi vurum naŋhay waɗ misi pilis naŋhaya cek sesẽŋ a wuzla mubuliy. 24Ng'avi li mawuɗo wun na, Bumbulvuŋ a singilo Ezipteheye ti wuzla musure ngi vu ati ngi gazlavay tuwa, a ga ɓa Eziptehey a gam welele lambaˀ. 25A ja sar ngi mota ngi vurum taŋhaya gric gric, hã a kukurom tuwaˀ tuwaˀ. Akẽh na, Eziptehey a ɓam: «Kulukum kileŋ avu Israyeleye, asi i Bumbulvuŋ makiɗ vu ati ndra ar deɗe taŋ!» 26Bumbulvuŋ a ɓa Moyise: «Zuɓa haŋ ng'ar mubuliye: ɓa yam a mo ng'ar Eziptehey, ng'ar mota ngi vurumoy waɗ ng'ar misi piliseye!» 27Moyis a zuɓa haŋ ng'ar mubuliye. Gweˀ ng'avi li mawuɗ a wun na, yam a mawa nga naŋ nga naŋ ng'ar li naŋ a muŋ. Eziptehey makilam na, ara zliram gajaˀ ati yama. Dar Bumbulvuŋ a pa taŋ haŋ nga wuzla yama. 28Mota ngi vurumoy ati misi pilisey, mizli ngi buy Ezipteheye cek micam nga wuzla yam asi Israyeley na, yam a sawa, a nda taŋ pay, ko mbur loŋ mindir anta. 29Amma Israyeley a tuwuɗaka mubuliye zleˀe ti sar njiraŋ njiraŋ, yam a gi toŋ toŋ ti hazum, toŋ toŋ ti gula kaɓa mohol. 30Naŋ kine, tapasa, Bumbulvuŋ a laha Israyeleye le tisi haŋ ngi Ezipteheye, yo Israyeley a puraka vagay ngi Ezipteheye le a ˀaydidike. 31Israyeley a puraka gidaŋ Bumbulvuŋ mikiɗ di Eziptehey na le. Dar a zluwunam ti Bumbulvuŋ, a pulaka mevel taŋ da Bumbulvuŋ waɗ da gawla naŋ Moyise.
Currently Selected:
BI NGI ISRAYELEY 14: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
