BI NGI ISRAYELEY 13

Jiviɗ mekelemey ngi gi muguzlum Pak

1Bumbulvuŋ a ɓa Moyise na: 2«Modogom gar mubo dumbuŋ ti kwacay mumuŋ a hirwuy Israyele, vuliy di da ya, asi mangal modogom ati modogom ngi ginew gar na, inga yahay.» 3Moyis a ɓa mizli: «Hin kum muboko di tir beke ti hirwuy Ezipte na, anja i wulkam anga, asi Bumbulvuŋ mubo ti kum ti diga na, ti gidaŋ naŋ. Da ki ra gaka muguzlum nah na, ki zumaka ɗaf misi ˀis ara ta. 4Kum mabam ngi zuɓa jiviɗ dana na, i kiya ngi sifi. 5Yo ti Bumbulvuŋ misa ci ti kum le nga hirwuy Kanaˀan, hirwuy Hiti, Amori, Hivi ati Zebusi, hirwuy naŋ miɓa ti hudum a mbuŋ dideˀ kumoy, a sa vulukum di na. I hirwuy misi ɗuwa waɗ mam maɓulom ara. Ki sa ga mezegwel nah angi kiya nah. 6Ki sa zumam ɗaf manja ˀis ara, hin tarnaˀ, hin mitarnaˀ naŋ na, a sa gi i hin ngi gi muguzlum da Bumbulvuŋ. 7Angi hin mitarnaˀ nah na, kisa zumam ɗaf manja ˀis ara. Angi hirwuy ɗik gar na, ɗaf misi ˀis ara malla ko ˀis vuna, anta sa puram hiri naŋ ta. 8Tapas muguzlumo, kisa ɓa ɓi hana da ziri kumoy, ki ɓa taŋ: Ndra magaka kahana na, vur mezle Bumbulvuŋ miga ndra di tapas ndra muboko ti hirwuy Ezipte na. 9Mezegwel hana a sa sukum ti lesl keŋ, yo i gwat mutoho avu hirbazla kum malla a midibiɗ kumo ma. Ɓimujuwa ngi Bumbulvuŋ, sey ki tilam di mi na, a sa so keŋ a hirnga, asi i naŋ mubo ti kum ti hirwuy Ezipte, mbele gidaŋ nga naŋ mihaɗi na. 10Ɓimuɗuva hana kisa jaka hirnga ar hin naŋ kaslsla vur vi vur vi.» 11Moyis a ɓi ma na: «Ti Bumbulvuŋ misa ci ti kum le nga hirwuy Kanaˀan, yo da a vulukum di le kaɓa naŋ muɓuw ɓi nah ɗaˀ le da ka ati dideˀ ɗikey na, 12modogom ngi mizli ati ngi ginew misi a hay kum gar na, kisa vulaka mizile taŋhaya da Bumbulvuŋ, inga naŋhay. 13Modogom ngi zungu gar na, kisa mbiɗaka hirnga naŋ ti tumuŋ. Da ki mbiɗaka hirnga naŋ ta na, kisa murguɗokoŋ ˀaya. Mangal mizile modogom ngi wuzla kum gar na, kisa mbiɗaka hirnga naŋ. 14Tumbuŋ, da ziri kumoy a sa cufuɗukum le: ‹A gaka kanah vur mike› na, kisa ɓaka taŋ: ‹Bumbulvuŋ a bo ti ndra tir beke a Ezipte mbele khirba, zla naŋ migidaŋ.› 15Naŋ kine, buy Ezipte mangum pula ndra'i ram le ta tuwa na, Bumbulvuŋ a ngizla modogom ngi Ezipteheye talalaˀzle avu modogom ngi mizli hã avu ngi ginewey. Vurˀe, modogom mizile ngi ginew gar na, i gam di mikuli da Bumbulvuŋ, amma mangal mizile modogom gar na, i mbiɗaka hirnga naŋ.» 16Mikuli nah na, a sa so ndra ti wuluk keŋ, yo i gwat mutoho avu hirbazla malla avu midibiɗ kumoy. Bumbulvuŋ a bo ti ndra ti Ezipte, mbele hirbazla naŋ migidaŋ na, a so keŋ a hirnga.

Bumbulvuŋ miki ɓaˀ a mbuŋ ngi kisa mizli naŋhay

17A dirba buy Ezipte mupula Israyeley ɓa a ram muduba na, jiviɗ mabi ti hirwuy ngi Filistiheye, i jiviɗ mukwaŋ kutum ngbaŋ, Buymisemuŋ a kisa taŋ ti ra ta. Buymisemuŋ a ɓi zle'e ti kwacay naŋ na: «Da Israyeley a sa puraka mizli makiɗam vu na le na, naɓa a sa ngumam ru mata, a sa mam nga Ezipte a muŋ!» 18Vurˀe, Buymisemuŋ a ngizli ti taŋ ti wuzla ɓuh mikirɗak kirɗak mara bi ar mubuliy lavaɗa. Israyeley mibam ti Ezipte na, vu kaˀ kaˀ ti gwat ngi vurumoy. 19Moyis a hila tesl ngi vagay Zozefe le a haŋ, asi a hudumo sukum naŋhaya le zleˀe, a ɓa taŋ: «Buymisemuŋ anta sa pula jini kumo zleˀe ta si, da ki ra ram na, hilaka tesl ngi vagay ɗu a haŋ.» 20Israyeley a slikiɗam baɗ a Sukoto, ara cifam ti guɗukoyo, a ciki wuzla ɓuh a Etam. 21Bumbulvuŋ ti haŋ naŋ, aro ɓaˀ a mbuŋ: Ti papasa, i musure ngi cunju ngi biga taŋ jiviɗe. Ti duvuɗo, i musure ngi vu ngi ciɗika taŋ jiviɗe, joˀ taŋ ara ram ti duvuɗ ti papas. 22Musure ngi cunju ti papasa waɗ musure ngi vu ti duvuɗo, a pula ki a mbuŋ taŋ mbak le ta.

Currently Selected:

BI NGI ISRAYELEY 13: BEGDC

Highlight

Copy

Compare