DANIYEL 12

Hin ngi lik waɗ mo ti siifa a muŋ

1«Modro ngi Bumbulvuŋ a ɓiy na: ‹Ti hin tayna, Misel madiɗa ngi vurum ngi muŋhoyo

naŋ macici zlak ar mizli ɗikey na, a sa bugo vu.

A sa tiri i hin ngi muɗa didakay,

zle ar zli virzi ngi ruwuy, hã dana,

ko gwat ngi muɗa didak kanah, a gi ɗaˀ ta.

Ti hin tayna, mizli ɗikey a sa laham,

ko wa gar a wuzla taŋ, misi slimiɗ naŋ i mutoho le ar ɗerewol ngi siifa na, a sa lihi.

2Mizli misi ar li cifi ngi mizli mumucahay haɗa, a sa slikiɗam,

cah mekelemeye ng'ar siifa ngi sete,

cah numuŋhoyo kwana, ng'ar mesem muwãˀ naŋ, ng'ar bonoy mukuyta wãˀ ngi sete.

3Mizli misi lesley a sa wucuɗam kaɓa gwatay mawucuɗam ar birngiŋ a muŋ,

mizli mitiram ti zigiduw taˀ ɓa a ndram teŋteŋ na, a sa wucuɗam ngi caˀa, kaɓa wurzlaŋ ngi muŋhoy.

4Naka, Daniyele, ndir ti mingiɓi hana yaŋ a mevel ɗiki, yo slirɓa ɗerewol hana sliraɓ hã avu kiɗa mi ngi hin. Mizli haɗa a sa slufaka, yo sin taŋ kwana a sa sik nga mbuŋ aya.»

Hin ngi kiɗa mi, a ndir i ɓi miyaŋŋa

5Ya Daniyele, i ra pur hiri, keɗ na, mizli mekelemey dedeŋ cuw, pal ti ˀay didik ngi mizawa, pal numuŋ kwana ti ˀay didik vay mekeleme ya. 6Mbur mideŋ a hirnga yam ngi mizaw, zana ngi gugumay mislirkeɗ ɓaˀ avu vu na, mbur pal a wuzla mucuwoy tuwa, a ɓaŋ: «Gwat ngi zuma hirnga hanayna vuna, hin ngi kiɗa mi taŋ a sa so ti vunaka?» 7Yi ra cine ˀay ngi mbur misi zana ngi gugumay mislirkeɗ, misi a hirnga yam ngi mizaw tuwa. A hila haŋ hazum ati haŋ gula hoc ng'a muŋ, a ɓi: «Hadam, ti slimiɗ ngi Buymisemuŋ mandir caˀkine ngi sete. Gwat hanayna, a sa zikam hã vi makir ti reta. Da a sa tikaka gidaŋ ngi mizli ngi Buymisemuŋhoyo le na, naɓa a sa kiɗam mi.» 8I cine cin cin na, ko i sla wala naŋ ta, i ɓi: «Kumani ɗu, gwat hanayna vuna, kiɗa mi naŋ i wanaka?» 9Naŋ a mbiɗiy di: «Aru ti zuy Daniyel ɗu, asi mingiɓi hana anja a ndir i ɓi miyaŋŋa, yo sliraɓ sliraɓ hã ar hin ngi kiɗa mi naŋ. 10A sa zuɓaka dili ngi zigiduw taˀ, a bunaka taŋ ndazl ndazl, yo a ndiram celelle baɗ tir bonoyoy. Misi moˀoreheye, a sa gam ti gi moˀore taŋ. Ko misi moˀore pal anta sa sla wala naŋ ta, amma misi lesleye, a sa slaka wala ngi gwatay macohomo. 11Zle avu hin ngi mikuli vur hin gar masa kiɗ mi, hã tapas masa kaka malambaˀ mukuyta wãˀ ngi hirya gwata, ɓaˀ ar li gi mikuli na, naɓa hin a gi le durmuk ti skat skat cuw ti kukur ngoltir. 12Mbur masa kutuko hin nah, yo masa ndila hin durmuk ti skat skat makir ti kukur makir nga zlum na, naŋ ar mumul. 13Naka so na Daniyel, cici gidaŋ gidaŋ hã ar kiɗa mi naŋ. Ar hin ngi kiɗa mi naŋ na, kisa lum muska vu, yo kisa slikiɗ ngi tiɓa migir ɗike.»

Currently Selected:

DANIYEL 12: BEGDC

Highlight

Copy

Compare