AMOS 7
7
Amos mupurgwat ti kleŋ sar mudumbuŋ naŋ: jaray
1Bumbulvuŋ, Buymisemuŋ ɗu, gwat naŋ mibigiy di anihĩ:
Keɗ na, ara go jaray,
naɓa hirak ti giziŋ mazla ɗiɗi ti ɗiɗi aruŋ,
a dirba mislaka giziŋ mudumbuŋ naŋ le ngi murbuc da buyo. 2Jaray tuwa a zuma giziŋ ngi si ruwuyo le tirneˀ wãˀ?
Akẽh na, yi ɓi:
«Bumbulvuŋ, Buymisemuŋ ɗu, ambuh takwa,
pula mungra ngi mizli ɗikeye.
Da kanah ta na, mizli ngi Zakopoy a sa ngiram mbri mbrike?
Ani i sukwi meciɗek wãˀ mayse.» 3Dar Bumbulvuŋ a mbiɗa wuluko, a ɓi:
«Anta sa gi kanah mata.»
Amos mupur gwat ti kleŋ sar mucuw naŋ: Vu
4Bumbulvuŋ, Buymisemuŋ ɗu, gwat naŋ mibigiy di anihĩ:
Keɗ na, Bumbulvuŋ, Buymisemuŋ ɗu ara til mi ti ɓi ngi gi kiita ti vu,
yo vu vuna a zuma yam mijileŋ ngi si ruwuyo gar,
waɗ ara zuma hirwuyo ma. 5Joˀ yi ɓi: Bumbulvuŋ, Buymisemuŋ ɗu, ambuh takwa, pula ɓi nah si.
Mizli ngi Zakopoy a sa ngiram mbri mbrike?
Ani i sukwi meciɗek wãˀ mayse!» 6Akẽh na, Bumbulvuŋ a mbiɗa wuluko, a ɓi: «Anta sa gi kanah mata.»
Amos mupur gwat ti kleŋ sar mimakir naŋ: zeweɗ ti ɓiri ava ngi wi gil ngi dalam cir cir
7Bumbulvuŋ, gwat naŋ mibigiy di anihĩ:
Keɗ na, Bumbulvuŋ deŋ ar mohol miwa gil nah le cir cir,
waɗ zeweɗ ti ɓiri ava ngi wi gil ngi dalamakaw a haŋ. 8Bumbulvuŋ a ɓiy: «Amos, ka mapur na i mike?»
I mbiɗaŋ di: «I zeweɗ ti ɓiri ngi wi gil ngi dalam cir cir.»
Bumbulvuŋ ɗu a ɓiy: «Pura, y'ani i wa Israyel mizli ɗuwoy na ti zeweɗ ti ɓiri ava ngi wi gil ngi dalam cir cire,
zle dana na, y'anta sa pula mungra taŋ teˀ mata. 9Ti ya masa slikiɗ badam, maslalam kaw a haŋ ng'ar mizli ngi hay Zeroboˀamay na,
i sa waha li miɗingir ɗingir ngi gi mikuli ngi mizli ngi Izakay na, kiɓac kiɓac,
yo hay muvuku vu taŋ ngi Israyeley na, musukuɗ musukuɗ.
Amasiya masay muɓula Amos ti Betel
10Amasiya, masay a Betele, a slin ng'avi Zeroboˀam, buy Israyele, ɓa a ɓakaŋ na: «Amos ara gi gidiɓi ar ka, ɓa a putukusuw tir zumabuy ɗik a Israyele. Mizli anta ɓusaka ɓi naŋ na mata. Asi Amos vuna a ɓi na: 11A sa kiɗaka Zeroboˀama ti maslalam,
yo a sa jaka Israyeleye cek, a ram taŋ kileŋ avu hirwuy taŋ.»
12Akẽh na, Amasiya a ɓa Amoso na: «Ka mbur mupura daˀasa, cuh baɗ aka, kil nga ruwuy Zuda. Zum ɗaf ɗik, yo ga slra ɗik ngi mijiviɗ a diga zuy ɓula! 13Amma a Betel aka na, ki mahiri ngi ga slra ɗik ngi mijiviɗ na mata, asi aka i hay ngi buy, yo i hay ngi Bumbulvuŋ ma!» 14Amos a mbiɗa da Amasiya: «Yi mijiviɗ ta, yo yi mangal ngi mijiviɗ ta ma. Yi mijigina slahay zleˀe, yo i pi yam da bazlawaray. 15amma Bumbulvuŋ a zuɓo ya baɗ asi gineweye, a ɓiy: Aru! Njika ɓi ngi mbuŋ da Israyel, mizli ɗuwoy. 16Wurenna, cine mingiɓi ngi Bumbulvuŋ maɓuw di:
Ani ka ki ɓiy na: Ki njik ɓi ngi mbuŋ da Israyeleye ta, yo ki ɓi mi kwiliŋ kwiliŋ da mizli ngi Izakaya ta kini! 17Vurˀe, Bumbulvuŋ a ɓi ani:
‹Ngwas ɗike, a sa tiri sulome ar walahaya,
a sa kiɗaka ziri ɗik mizile ati mongosohoyo vagay vagay ti maslalam.
A sa waka hirwuy ɗike ti zeweɗ weˀ weˀ, wunak wunak da mizli,
ka kisa ra muc ar hirwuy mihirya le ti dili,
yo a sa jaka Israyeleye, a ram taŋ kileŋ avu hirwuy taŋ.»
Currently Selected:
AMOS 7: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
