AMOS 3
3
Mizli ngi Buymisemuŋhoy a sa slufaka ɓi ngi gwat taŋ migaka na cummo
1Mizli Israyeley, kum i muyoy, i ya Bumbulvuŋ mimo ti kum ti ruwuy Ezipte, cinaka ya maɓukum ani: 2A wuzla mizli ngi si ruwuyoy gar na,
yi sin di i kum,
vurˀe gwat malambaˀ miwãˀ kum migaka na,
i sa cufuɗukum, ɓa kisa slufaka ɓi nah.
Da Bumbulvuŋ ara ɓi na, mijiviɗ a taˀa me ta
3Da mizli cuw a ɓam ar wal taŋ ta na,
a ram zlaɓ zlaɓ a jiviɗe kwa? 4Da mobor a pur gwat ngi ji ta na, a tuwuy a ɓuh kwa?
Da zingaˀ ngi mobor a ji gwat ta na, a tuwuy angi hay naŋ kwa?
5Da ɗiyuw a pur gwat asi diɓele ta na, a po sar ɓa a ci ngaseˀe kwa?
Diɓele, da gwat a wusa ta na, a mbizli kwa?
6Ada a fam tulum asi ruwuyo
manja a muɗa didak da mizli kwa?
Da Bumbulvuŋ a ga ta na,
gwat ngi mendere a gi avu mizli kwa?
7Naŋ kine, Bumbulvuŋ Buymisemuŋ, naŋ anta gi gwat neˀ
manja a njika da mijiviɗ gawla naŋhaya ta.
8Da mobor a tuwuy le na, mbur mazluwun ta i waka?
Da Bumbulvuŋ Buymisemuŋ a ɓa mburo le na, mbur manjika ta i waka?
Bumbulvuŋa sa ga kiita da walahay Samari
9Tilam mi a hirngi hay mimezlehey a Asdoto,
a hirngi hay mimezlehey misi a ruwuy Ezipte,
ɓam: «Cikilam a hirnga muwã Samari,
puraka, ara gam lambaˀ lambaˀ,
yo ara guzuvuraka mizli a muwã a diga!» 10«Mizli Samarihey a sinaka gi gwat ti jiviɗ naŋ ɗalla ta.
Gwat taŋ matiɓaka taŋ ti gidaŋ, waɗ taŋ mavaka taŋ avu mizli gar na, ara cikilaka taŋ ar hay taŋhay mimezlehey na.
I ya Bumbulvuŋ maɓi.
11Vurˀe, ya Bumbulvuŋ Buymisemuŋ a ɓi na:
«Mesenehey a sa gunoko hirwuy Samari,
a sa wahaka mohol mugun hirnga kumo,
yo a sa vaka gwat ngir hay mimezleheye.»
Lih ti ndurɓo hiri
12Bumbulvuŋ a ɓi ani:
«Da mobor a ji tumuŋ le na, mijigin a puwo avu mi naŋ,
i sar naŋ paw paw cuw malla slimiɗ naŋ buk tewle.
Naŋ kine, Israyeley misi a Samari,
muroko ginasl ginasl ar arngawo, malla ar gwat ngi hiney na, a sa gi avu taŋ kanah ya.
Ki mumuyuŋ ngi zay sla a slimiɗe
13«Cinam, yo kaka mumuyuŋ ngi zay sla a slimiɗ da ziri ngi Zakopoyo:
I ya Bumbulvuŋ Buymisemuŋ, Buy miwa si gazlavay kurzluˀ gar maɓi.
14Tapas ya masa ru nga mbiɗa hirnga da Israyeley vur malambaˀ taŋ na,
i sa mbiɗi hirnga avu li gi mikulihey misi a Betele,
a sa ngilaka durumoy misi avu li gi mikuli,
a sa ndilam a ruwuy.
15I sa waha hay ngi hinpas waɗ hay ngi kiya himiɗe.
I sa waha hay migaka taŋ wuya ti sliŋ ngi begeneheye,
yo hay madiɗahay a sa mbizlam.»
I ya Bumbulvuŋ maɓi.
Currently Selected:
AMOS 3: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
