AMOS 2
2
Da Moˀapay
1Bumbulvuŋ a ɓi ani:
«I ra mbiɗa hirnga da mizli Moˀapaya, asi a gam mungra madiɗahay le haɗa,
wãˀ naŋ asi hana:
a zlumaka tesl ngi buy Edomo le hetetete, a tiri buɗ buɗ ka fucu.
Vurˀe, y'anta sa pula ɓi ɗu ya mujuwa a mevel ɗu ngi gi na teˀ mata. 2I saka vu da ruwuy Moˀapa,
vu a sa zuma hay mimezle mezle misi a Keriyoto. Mizli Moˀapay a sa micam a wuzla gwatay mahurumom haɗi, a wuzla widi ngi vurum, a wuzla hurum ngi tulum.
3I sa muɗa migi kiita ceɗ ti wuzla taŋ
waɗ gawla naŋhaya gar, i sa kiɗa taŋ vagay vagay gar arleˀeŋ.»
I Bumbulvuŋ miɓi.
Da Zudahay
4Bumbulvuŋ a ɓi na:
«Vur mizli Zudahay makir malla mufaɗ mimbiɗam hirnga na,
y'anta sa pula ɓi ya mujuwa a mevel ɗu ngi gi na teˀ vur i taŋ si ta.
Asi a pulaka dubun ngi Bumbulvuŋ fuk, a jaka ɓimujuwa naŋhaya ta.
Asi slir taŋ miziza cine taŋhay na, a ziza taŋ le ya.
5I saka vu da ruwuy Zuda,
joˀ vu a sa zuma hay mimezle ngi Zeruzalemeye.»
Da Israyeley
6Bumbulvuŋ a ɓi ani: «I ra mbiɗa hirnga da Israyeley, asi a gam mungra madiɗahay le haɗa, wãˀ naŋ asi hana:
mbur mijeŋŋe a hiɗikam di dala le,
mbur misi murga a hiɗikam di mapiya piya sar pal.
Vurˀe, y'anta sa pula ɓi ɗu ya mujuwa a mevel ngi gi na teˀ mata.
7Yo ma na, putukulo mbur misi murga ar murɓuko, may naŋ a ja taŋ haɗa.
A zumaka gwat ngi mizli mihina hirngahaya ma.
Cine ati mangala a hinam ti ngwas misi purla.
Naŋ kine, a hiryaka slimiɗ nga ya Bumbulvuŋ le.
8A ciki li gi mikulihey gar na, zanahay, mizli misi murgahay mijikaka taŋ na, taŋ a slam taŋ himaˀ, waɗ tutup tup ar taŋ#2.8 Angi ɓimuɗuva ngi Israyeleye na, da mbur a jika godo naŋ le avu ka na, anja ki maŋ, manja duvuɗ a ji, pura Bi 22.2 5-26 .
Ar hay ngi kuli taŋhaya, ara sam mbaazla taŋ mitikam di vu.
9Na ya, ya mingizla mizli Amorihey na, a mihiri taŋ ngbaŋ.
Amorihey i mizli madiɗakaɓa miterey,
gidaŋ taŋ kaɓa ngi widis madiɗa.
I ngizla tizer taŋ le kuɗup wãˀ. 10Mbak nah vuna le ma na, mubo ti kum ti ruwuy Ezipte i ya.
Yˀar li kis kum a wuzlaɓuh mikirɗak kirɗaka, hã vi kukur mufaɗ,
ɓa ki tiɓaka hirwuy ngi Amoriheye da kumo. 11A dirba nah, i wini mijiviɗey a wuzla ziri kumoyo. A wuzla ziri gawla kumoyo i wini mizli muvulahay le hadam da Bumbulvuŋ. Naŋ kanah gisiŋ takwa mizli Israyeley? I ya Bumbulvuŋ maɓi. 12Mizli ngi si mbaazlahay zleˀe ta, ki vulaka taŋ. Ki tikaka mijiviɗeye, ki ɓaka taŋ: ki njikaka ɓi ngi Bumbulvuŋ ta! 13Na y'ani, i wuɗ i kurupukum ndaɗaɗ ndaɗaɗ daˀ arleˀeŋ,
kaɓa mota ngi slahay mimbaf ti maslapa ngi alkamari makurup gwat a jiviɗi.
14Ko mbur mawus vu haɗi, anta sa ndila li ngi ɗumo ta,
ko mbur migidaŋ haɗa, anta sa gi gwat gu neˀ le ta,
ko bugawla, anta sa lih ta.
15Mbur misi gulum a duba, anta sa cici deŋ gu ta.
Mbur makil haɗa, anta sa lih ta,
mbur misi pilis anta sa lih ta.
16Tapasa, mbur bugawla miwãˀa,
a sa kil virzi ti mi.
I ya Bumbulvuŋ maɓi.
Currently Selected:
AMOS 2: BEGDC
Highlight
Copy
Compare
Share
Want to have your highlights saved across all your devices? Sign up or sign in
Bible en Langue Guiziga © L’Alliance Biblique du Cameroun, 2011.
