Filipenses 1
1
Uandajperata
1Ji Páblu ka Timoteu, engachi Jesukristueri jántspirika, Filipusï anapu Jesukristueri jakajkutichanichi karakuaxaka, chánksïni ka ístu chári urhejtsïkurhichani ka tángorhekuarhu anapu jarhojpirichani. 2Juchari Diósï Táteri ka Acha Jesukristueri kóntperata ka sési pajperakua cha jinguni jaue.
Páblueri komarhijpekuecha
3Ji chánksïni jimbo Diósïni méntkisï diósmaiamukua arhini jarhasïnga, 4ka engani uandamukukorheni jarhajka, tsípekua jingunksïni komarhijpechesïnga, 5jimbokajtsï uénakuarhutki sési jakajkuska ka iásï jamberijtsï sési jarhaskia; 6Diósïni k'amak'asï mintsikaxaka, eskaksïni na uénakia sési ambe kóndeni, eskaksïni sánderu ambe kondentani jauaka eka jamberi tata Jesukristu júnkuaaka. 7Ji sési jimbochkasï chaksïni jimbo ísï sési p'ikuarhenhejka, jimbokaksïni mintsitarhu kámasïnga ka jamberijtsï chájtu p'ikuarherasïnga ambe engarini Diósï kóndejka, ka nauejki engani ónhakata jaka ka enga uétarheaka ambakiti aiangperatani uandantani, juramutichani japarini uandantasïnga. 8Diósï mítesti na engaksïni xáni xénhchajka, ísï eskarini Jesukristu jíndeni na xáni xénhchajka. 9Ka kómarhijpechexakaksïni eska chári xénhchperata sánderu ka sánderu kánepani jauaka ka eskajtsï sánderu jánhaskapani jauaka, 10ka jurhenantsï erakuni ambeski sési irekani ka sési jámani. Ka sésijtsï anhaxurhikorhetini jarhani jiáni enga Krístu junguaaka, 11jimbokajtsï chasï xarhataaka chári sési jángua ukuecha jimbo, enga Tata Jesukristuni jimbo jurhajka, ka eska Diósï k'éri ambe arhinhaka.
Ambakiti aiangperata etsakorhexati
12Erachicha uékasïnga eskajtsï míteaka ambe engani úkorhenchaka, eska marhuaska, ambakiti aiangperakuani uandantani, eska sánderu mítenhaaka; 13Ka engani ísï ónhakata jaka, marhuasti jimbokani iámendu jurahamutichani aiankuantaxaka eskani Krístuni jimbosïni ónhakata jaka. 14Ka uánekua erachicha isï exerintsïni na engani jamani jaka, ts'iuentastiksï ka indejtuksï sánderu tsípekua jinguni íni ambe uandantaxati.
15Máruchkaksï Krístueri ambe uandantaxati jimbokajtsïni epurhesïnga ka andakuekantsïni, k'óruksï máteruecha sési jimbosï uandantajti, 16kaxumbekua jinguni, jimbokaksï míteska eskani ji ónhanhaska jimbokani ambakiti aiangperakuani kuájpesïnga, 17ka máteruechaksï nósesi jimbosï uandantajti, sánderujtsïni uékani nósesi jájpacheni andakuekantsïni iásï engani ónhakata jaka, eskani sánderu nósesi p'ikuarheraaka. 18¿Ka ambejtu nósesi iua? Krístueri ambesï uandanhantani jati, ísku ísï uandaparinhani o ambakiti mintsita jinguni, ka ji tsípesïnga indeni jimbo ka méntkisï tsípeaka.
19Jimbokani míteska eska marhoauaka chári komarhikuecha jindeni jimbo, ka Jesukristueri Espiritu jarhojperata jimbo, ji no íoni jimbo jurhajkunhaka. 20Ka mintsikaxaka eskani no k'urhatsetakorheaka, sési ambesïni erokorheni jaka uinhapiti jarhani ka úni Krístuni k'éri ambe arhini ka ekani nótki uarhini jauaka, Krístueri t'íntskua jíndeni jinguni iámu xarharaati, 21jimboka jucheti tsípekua jíndeska, Krístuni marhuakuni, ka ekani uarhiska imanisïni andakorheaka. 22Ka engani no uarhini jauaka jimboka jucheti anchekorheta kánekua ambeteru kuerataxaka ¿Nénasïni jamaia? 23Tsimapuru uékapiringa jarhani: Ji kánekua sési p'ikuarheransïnga ka uékapirinkia Krístu jinguni niántania, jimboka indesï sánderu sésika; 24k'óru sánderu uétarhexati eskani íni parhakpenirhu pakaraka chánksïni jarhuatanderu. 25Ka jimbokani íni ambe sési inchajtsïtini jakaia, míteska eskani pakarakateru ka eskani cha jinguni jauaka ka jarhuatanksïni eskajtsï sánderu tsípekua jinguni jakajkuaka, 26ka engani menderu cha jinguni jauakia, úaka eskajtsï cha Jesukristuni jimbo sánderu k'éramakorhiaka Jíndentsïni exerini.
Eska na arhijka Ambakiti aiangperakua ísï irekani
27Cha jangorhentsï je, Jesukristueri ambakiti aiangperakua jimbo sési irekani jarhani, náuejkini ji niranksïni p'urhembeni o no nirani, eskajtsï sési anhaxurhitini jáuaka májku espiritu jinguni, ka ambakiti aiangperakuantsï májku mintsita jinguni jakajkuni, 28ka eskajtsï no jámaaka chéparhakuni jarhani chári ikiatspirichani jinguni, jimboka íni jimbosï xarharaaka, eskaksï ima tsinchekuarhu niraxaka, ka xarharani eskachi juchasï p'ímutantskateka. Ka i ambe Diósï jimbosï ukorhejti. 29Jimboka Krístuni jakajtuni no kóntperatajkusï p'inhajka, imani jimbojturi nósesi kánhaaka, 30márkuchkachisï jángorhentani jaka íni ambe niatani, chájtsïni exeriskia eskani uinhamu jámaspka ka kurhaxakajtsï eskani iásï jamberi incharhetakuxakateruni.
Currently Selected:
Filipenses 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.