Efesios 6
6
Janhanharhi táteni ka nándeni
1Uátsïticha, Achani jimbo chári tátechani kurhajchaa je; jimboka i ambe sésiska. 2“Janhanharhi táteni ka nándeni,” inde juramukua urhetisti enga ma ambe aiatspeni jaka: 3“Ísïri úaka parhakpeni sési irekani ka ióniri irekani.”
4Tátecha, chári sapichani ásï ikiataa je, sánderu sáni jurhendakorhea je ka Acheri ambe aiangua je.
Ánchetpiricha ka jántspiricha
5Jántspiricha, imani engajtsï parhakpeni ánchekorhekuajka méntkisï kurhajchaa je, ka sési p'ikuarhenheparini ísï eskajtsï Krístuni na kurhajchajka, 6ka no jiájkantku engajtsï exenhani janhaaka, sési pakaratspeni uékani. Sánderu sáni ísï jáma je eskaksï Krístueri jántspiricha engaksï mintsita jinguni újka ambe enga Diósï uéjka; 7únhchaparini, ísï eska ima enga Achani marhuakuni jámka, ka no ísï eska ambe marhuatspeni jámani. 8Mítetini ja je eska mándani arhini náuejki jántspirini o no jántspirini, Acha maiamuantauaka ambe engaksï sési ambe úaka.
9Ánchetpiricha, chári jántspirichani májkueni kaa je, ásteru chéraaparini kaa je; mia je eska chári ka indecheri Acha, auandarhu jarhaska, ka eska ima iámenduechani májkueni exeasïnga.
¡Uinhapekorhe je!
10Ka iásï Achani jimbo ka imeri xáni k'éri uinhapekua jimbo uinhapekorhe je. 11Ka Diósïri uarhiperatarakuani jukantsï je, engajtsï nóambakitiri tandojchperakuani kuájpetarakorheaka. 12Jimboka juchari uarhipekua no k'uiripuni jinguniska, jinisï juramuticha ka uinhapekuecha jinguniti, ima nósesi járhaticha jinguni engaksï íni parhakpeni juramujka, espiritu nósesi járhaticha engaksï tarhiatarhu jámka. 13Ísï jimbo Diósïri uarhipetarakuechani p'íkua je, engajtsï jiájkani enga nósesi jánhaskorheaka kuájpetarakorheaka, ka engajtsï iámendu ambeni andaakia, útasïjtsï sési anhaxurhitini jauaka.
14¡Sési anhaxurhikorhetini ja je! Ka jóngorhekua sési juángorhentatini ja je eska jurhimbekua néka, ka ambe tánhentsï je, ka ambe enga Diósï uéjka imani tatsunhe je. 15Ka ambakiti aiangperakua sési pájperakuerini jimbo kuarhachichani sési jukantsï je, 16ka jakajkukuani kuájchatarakorhe je, eska ch'urhurhpetarakuechani enga Nóambakiti étskutini k'uanirajka, pátauaka. 17Úra je inchajtsïntskua tiámuerini enga p'ímutantskueka, ka k'éri akuarhpetarakua Espirituerini enga Diósïri uandakueka; 18ka méntku uandamukorheni ja je ka kómarhijpe je, ásï kuatantsï je Espiritu jimbo uandamukukorheni, ka iámendu Diósïrichani kómarhijpekua je. 19Ka jíndentujtsïni kómarhijpeche je, engani ji uandakuekani jámaaka, eskani uandakua intsïnhaaka, ka eskani úaka ts'iueparini ambakiti aiangperakueri ambe aiangpentani enga no uánekua mítenhapka: 20Imani engani ji uandantani jámani jaka, engani jimbo jótakata jaka, eskani ji nósani chéparini úaka indeni ambe uandantani eska na uétarheni jaka.
Uandanuntskua
21Tíkiku, juchari erachi xáni xénhchakatanksïni axachexaka, ima Achani no jurajkuntasti marhuakuni, indeksïni iámendu ambe aianguati eskajtsï míteaka néna engani nitamakorheni jaka ka ambe enga xáni jaka. 22Indenksïni axachexaka jimbokani uékasïnga eskajtsï juchari ambe míteaka ka eskaksïni inde sési uinhaperantaaka.
23Erachicha eskajtsï Diósï Táteni ka Acha Jesukristuni mintsikatini, sési pájperaaka ka xénhchperantsï. 24Újchakuranheksï iámendu ima engaksï juchari Acha Jesukristuni méntkisï mintsita jinguni xénhchajka.
Currently Selected:
Efesios 6: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.