Filipenses 2
2
Kaxumbekua jinguni marku jarhojperani
1Jiájkani, engaksïni Krístu uinhaperantajka, ka xénhchperata ka Espiritu jimbojtsï p'ikuarhenheni máteruechani jarhuatani, ka eska iámendu inde, p'ikuarhenhekua mintsita jinguniuaka, 2ji kánekua tsípeaka, exeparinksïni eskajtsï márku sési irekaxaaka, iámenduecha májku jásï xénhchperata jinguni, ka májku xasï espiritu ka p'ikuarhenhekua jinguni. 3Eska nómema nemani ikiakuaka, ójtsï k'éramakorheni jámani jinijtsïsï máteruechani sánderu sési káuaka, ka eska chári kaxumbekua máteruechani sánderu k'eri p'ikuastauaka, 4ásï jame je jandiojku uékani ambe kánerakorheni, jinijtsïsï máteruechantu jarhuatauaka.
Na enga Krístu kétsekua uérapka ka k'éri ambe arhinhani
5Eskajtsï iamenduecha ísï p'ikuarhenheparini jámaka eska Tata Jesukristu, 6Jimboka náuejki ima:
Ísïpka eska Acha Diósï
no jámasti imani ónharhini
ka uékani méntkuenini eska Acha Diósï.
7Sánderu sáni jinisï,
jurajkupti imeri k'érikua
ka k'uiripuechani jinguni márkuentani
ka k'uiripueni jántspiri úkorhentani,
ka k'uiripueni jámaspti;
8ka jurajkutakorheni,
uarhikuarhu jamberi kurhandirani
ka krúsirhu uarhini.
9Jimbosï Diósï sánderu k'éri arhinhatarati
ka iámenduecha jinguni
sánderu k'éri ambeni
imeri jakangurhikua,
10Ka eska, Jesusiri jakangurhikua jimbo,
auandarhu iámendu tinguixurhinhaka
ka parhakpenirhu, ka echerindu inchatsekua,
11ka eskaksï iámendu uandanhaataka
eska Tata Jesukristusï Acheka,
ka Diósï Táte k'éri arhinhe.
Néna enga jindeka sési irekorheni
12Ka ísï jimbo, jucheti erachicha, eskajtsï na jimbo méntkisï sési kurhandira jarhajka, ka no jíantku engani cha jinguni jápka, iásichka sánderu sési kurhandira je engani iauanisï jámani jaka, chári p'ímutantskua jimbo chéparini ka xéparini jáma je, 13jimbokaksïni Diósïsï p'ikuastaka ka cha uékani sési ambe úni, ka imaksïnisï p'ikuarhenhetaati nénajtsï jáma,
14Iámendu ambe pínasku ka sési u je, nóma uandaparini, 15ka nónanijtsï no jaiapanhanheantaka, ka jima enga xáni nósesi irekanhanka, ka no kurhandiranhani, chájtsï jima meremerejkuaka eska t'íntskua parhakpenirhu anapu jimbokajtsï cha Diósï uájpeska, 16ka uandakua tsípekuerijtsï uandantapari. Ka jiáni enga Krístu junguaka, ji ísï k'éramakorheni chánksïni jimbo mítetini eskani no ískusïni incharhetakuka jini ka jini nirani ánchekorheni. 17Ka náuejkini ji jamberi uándikunhani imani kéjtsitakua nóna andangutani enga cha jakajkukua jimbo aiátspentajka, ji tsípekua jinguni uarhiaka ka cha jinguni aiákorhentaaka. 18Chájtuchka tsípe je, ka ju je márku tsípeni.
Páblueri jarhojpiricha
19Acha Jesusini mintsikaxaka eskaksïni úaka sóntku Timoteoni axacheni, ka jíjtuni tsípentani ka sési p'ikuerherantani chári ambe kurharini ka mítetini, 20jimboka nónema jarhaska máteru nema ixu, enga chánksïni jimbo xásï p'ikuarhenhekua kámaaka ka uandanheani chari sési jakua jimbo, 21iámenduechaksï jínisï sési jakua jirinhakorhentajti, ka nóksï Jesukristueri ambe jirinhantani. 22K'órujtsï cha Timoteoni míteskia, na enga sési kurhandirajka, jimbokarini jucheti uátsïtini chúxapuska ambakiti aiangperakua uandantani. 23Ka ísï mintsikaxaka imanksïni axacheni, engani jamberi míteaka nénasï pakara jucheti ambe, 24nájkirukani Acha Diósïni mintsikani jaka eskani úaka ji sóntkuni nitsikorheni.
Epafrodito
25Nájkiruka uétarheaka erachi Epafroditunksïni axachentani, jucheti pámpiri ka jarhojpiri engani ji uétarhenchani jápka, chájtsïni axachespka eskarini jarhuatapiringa.
26Imaksïni jirinhantaxati ka uandanheaxati, mítetini eskajtsï cha inderi p'amenchakuani míteskia. 27Ísïspti p'amenchaxapti ka uinhamu jarhaspti ka jamberi uarhixaptia. K'óru Diósï p'amojkusti imani, ka no imantku jíndenturini p'amojkusti, eskani ji no sánderu mískorhepiringa. 28Jimbochkaksïnisï kókuani axachentani jaka, eska cha tsípeaka erontatini ka ji jámberi nóteru xáni uandanheani jauakia. 29Tsípekua jinguni ka Achani jinguni erontsï je, ka sési arhi je, ka sési arhia je indeni jarhati achetichani, 30jimboka ima Krístuni jimbo sáno uarhiska, ka íntskukorhentaspti chánksïni jimbo jíndeni marhoacheni ka sano uarhispti, jimbokajtsï cha no ixu jarhaspka.
Currently Selected:
Filipenses 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.