Gálatas 1
1
Uandajperata
1Páblu, Jesukristueri uandakua pári, no parhakpeni anapuechani jimbo, Acha Jesukristuni jimboesti ka Diósï Táteni jimbo enga tsítantaka.
2Iámendu erachicha engaksï jíndeni jinguni jaka, ka tángorhekuechani engaksï Galasia jaka. 3Eskaksïni Diósï juchari Táte ka Acha Jesukristu kánekua kóndeaka ka sésiksïni p'íkuastani. 4Jesukristu, juchari k'amanharhiskuecha jimbo intsïnharhitakorhesti, ka p'ímutantastijtsïni iásï enga xáni nósesi jánhaskorheka, jimboka juchari Diósï Táte ísï uékaxapka, 5Ima méntkisï k'éri ambe arhinhe. Jo, k'éri arhinhe.
Ambakiti aiangperakua májkuesti
6Ji no jánhaskaxaka néna jámantsïsï Diósïni xáni kókuani jarharenta engaksïni Krístueri kóntperatani jimbo uandapapkia, ka xáni kókuantsï máteru jásï aiangperakuani chúngumani. 7Ka no jimboka jaka máteru aiangperakua, jiniksïsï máru jati engaksïni manatka ka uéksïndiksï Krístueri ambakiti aiangperakuani tsîjpani. 8Ikimenhe ima, náuejkini jucheni o auandarhu anapu ánjeli ma engaksï no imani ambakiti aiangperakuani aianguntaaka engaksïni jucha aianguntapkia. 9Arhiskaksïnia ka ménderuksïni arhixaka: Engaksïni nema, no imani aiangperakuani arhijtsïkuska engajtsï cha p'itini jápkia, ¡Ima ikimenhe! 10¿Andi ji iásï k'uiripunisïni sési pakarakuni uéjki? O ¿Diósïnisïni uéjki sési pakarakuni? ¿Ji k'uiripu jingunisï uéjki sési pakarani? Engani ji útasteruni sési pakaratspeni uékapiringa, ji nóteruni Krístuni jántspekuni jámapiringia.
Páblueri ánchekorheta
11Erachicha, uéksïnga eskajtsï míteaka eska i ambakiti aiangperakua engani ji uandantani jaka, no k'uiripueri jurhentperakueska; 12nónemarini aianguntasti, nírini nema jurhenda, Jesukristurinisï exerati.
13Chájtsï mítetixaka na engani ji jámempka engani judiuecheri jakajkukuani jakajkuempka, ji Diósïri jakajkutichani nósesi káasïrempka ka jángorhentaxapka k'amajkuani. 14Ji uánokumaaspka uánekuechani engaksï sánderu k'érati judiuecheri jakajkukuarhu, ka sánderuni uékasïrempka juchari iótki anapuecheri p'indekuechani chúxapaani. 15K'óru Diósï, imeri kóntperatani jimborini t'uíni erakutixaptia engani ji nótkini andajpenuni jápka, ka sésekuarini íntskusti, 16eskani ji uájperi ambe jánhaskapiringa, ka eskani ambakiti aiangperakuani no judiuechani aianguantaapiringa. Jiájkani ji nónemani kurhamarhespka, 17ka nójtuni karhamaspka Jerusaleni, jini engaksï máteru uandakua páricha jaka engaksï t'uíni jápkia. Ji Arabia ísï niraspka ka tátsekua Damasku k'uanhatsentaspka.
Páblu ka Jesusiri uandakua páricha
18Tátsekua tanimu uéxurhini jimbo, Jerusaleni karhamaspka Pédruni míteni, ka témbeni iúmu jurhia ima jinguni pakaraspka. 19Ka nóteru ma Jesusiri uandakua párini exespka, Santiaguntku, Jesusiri erachi jémbani. 20Íni ambe engaksïni karacheni jaka, Diósï exexati eskani no chkuándiraxaka.
21Tátsekua Síria ka Silisia ísï niraska; 22ka Judea anapu Krístueri tángorhekuajtsïni nótki úxapti míteni; 23jinijkuksï kurharini jápti: “Ima engajtsïni jupikani jámempka, iásï ambakitini aiangperakuani uandantaxatiia imani enga k'amantskantani uékempka.” 24Ka jíndeni jimboksï Diósïni k'éri ambe arhisïrempti.
Currently Selected:
Gálatas 1: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.