Gálatas 2
2
1Tátsekua témbeni t'ámu uéxurhini jimbo, ménderuchi Bernabe jinguni Jerusaleni karhamaspka ka Títuntuni pájtaspka. 2Jerusaleni karhamaspka jimbokarini Diósï jánhastaspka. Ka jakajkuticheri urhejtsïkurichani ambakiti aiangperakuani támu aianguantaaspka, imani engani no judiuechani aianguantaaka, jimbokani míteni uékaxapka eskani no ískusïni xáni incharhetakuka ánchekorheni. 3Ka Títuni enga jíndeni jinguni jámani jápka, nájkiruka gríegueka, nóksï ts'iuekuarhu sïkuiri p'ikujtsïtarakuekaspti. 4Imechani jimbo engaksï juchari erachi eratakorhejka engaksï inchapka xéni uékani, nénachisï Jesukristuni jimbo nóteru katsijkukata jakiia, jiniksïsï uékani jápti eskachi ménderu juramukuani jántspekupiringa. 5K'óruni jucha méntkuni no jurajkutakorheska, jimbokachi uékaxapka eska jurhimbekua ambakiti aiangperakueri cha jinguni pakarapiringa. 6Ka indeni engaksï jakajkuticheri urhejtsïkuri arhiajka, ¡Ambe uéjkinksï! Acha Diósï jimbochi iámenduecha májkueni jarhaska, ka támujtsïni urhejtsïkuricha nómbema jimbanhe ambe jurhendasti. 7Sánderuksï jamberi uandasti, eskani ji ambakiti aiangperakuani no judiuechani míndanhaska aianguantaani, ísï eska Pédru na judiuechani míndanhaka uandakuani aianguantaani. 8Jimboka ísï eska Diósï Pédruni na judiuecheri uandakua pári úka, jíndenturini míndasti eskani ji no judiuecheni uandakua pákuauaka. 9Ka Santiagu ka Pédru ka Juánu, ima engaksï urhejtsïkuri exenhani jaka, jupijkusptijtsïni jíndeni ka Bernabeni ísï xarhataparini eskaksï jaiapanhentaspka, ka eskani jucha no judiuechani jinguni nipiringa ka imaksï judiouecha jinguni nipirindi. 10Arhisptijtsïni eskachi no mirikurhipiringa imani engaksï kómu nitamakorheni jaka, ka indeni ambe ji ísï úxaka.
Páblu Pédruni xukaspti
11Ka jiájkani enga Pédru Antiokia janopka, ji arhinharhikuspka, jimboka arhikuespka imani ambe jimbo eska na jámani jápka, 12engaksï nótki janoempka ima engaksï Santiagu jingunipka, Pédru no judiuecha jinguni t'iresïrempti, engaksï ima judio jakajkuticha janoka, chérheani, no judiuechani jarhareaspti. 13Ka máteru judiuechajtuksï chúngumaspti ísku ísï jámani ka Bernabeni jamberinksï pájtamaspti. 14Engani xépka eskaksï no ísï jámaxapka eska néka, ísï eska ambakiti aiangperakua na arhijka, Pédruni iámenduechani japarini arhispka: “Najkiri t'u judioue andi, ka nóri judiueni irekaska, ¿Andirisï uéjki eskaksï no judiuecha judioueni jámaaka?”
Imasï sési jásï k'uiripueti enga Jesusini jakajkujka
15Juchachi judiueni andajpenuska, ka nóchi k'amanharhintstiska ísï eskaksï ima engaksï no judiueka. 16K'óruchi míteska: Eska nónema kaxumbesïnga juramukuani kurhandirakutini, imasï kaxumbejti enga Jesukristuni jakajkujka. Juchajtuchi Krístu Jesusini jakajkuska ka Diósïjtsïni xéxati eskachi ambakiti k'uiripueska jimbokachi jakajkuska, ka no juramukua jimboesti.
17Ka ekachi Krístuni jimbo uéjka sési jásï k'uiripu exenhani, juchajtuchi k'amanharhintstini exenhasïnga. ¿Ka Krístusï k'amanharhintskua ambe úrpejki? ¡Nómendu ambe! 18Ekani ménderu úntaaka ambe engani ji xerentaka, jisïni nósesi úkorheni jaka. 19Ji juramukuani jimbo uarhirixakaia, iásï Diósï jimbo irekaxakaia ka Krístu jinguni cháparhatakata jarhaska. 20Nóteruni jísïni irekakia, Krístusï jucheti tsípekuarhu irekani jati. Ka íni tsípekua enga jucheti anhanhatakuarhu jaka, Diósï Uájpani jakajkuparini irekaxaka, engarini jíndeni xáni xénhchaka ka jíndeni jimbo tsípekua íntspentasti. 21Ji no uéksïnga Diósïri kóntperatani no jiókurheni, jimboka enga juramukua jimbojku únhapiringa sési jásï k'uiripuenhani, jiájkanchka Krístu ísku uarhipirindi.
Currently Selected:
Gálatas 2: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.