Filipenses 3
3
Ts'iuekuarhu p'ikujtsïkukueri ka juramukueri ambe
1Jiájkani jucheti erachicha, Achani jimbo tsípentsï je, ambe uéjki jarhani. Ji no kuatantaaka ménderuksïni indeni ambe karacheni jarhani, ka engaksïni chánksïni marhoachejka. 2Xéparini jáma je uíchueni jarhatichani jinguni, ka imecha jinguni engaksï nósesi eratseparini ánchekorhejka, jarharea je, ka engaksï ts'iuekuarhu p'ikujtsïkukata arhikorherika. 3Jimbokachi juchasï jindeka engachi sési jimbo ts'iuekuarhu p'ikujtsikumenhaka, engachi Espirituni jimbo Diósïni k'éri ambe arhijka ka engachi Jesukristuni jimbo tsípekorhejka, ka engachi no parhakpenirhu anapu ambe mintsikani jarhajka, 4nájkirukani jíjtuni játsika, andi parhakpeni anapu ambemintsikani jarhani. Eka nema parhakpenirhu anapu ambe mintsikajka, jíjtuni sánderu mintsikapiringa. 5Iúmu tanimu jurhia jimbo, andajpenutini, ts'iuekuarhu pasïri p'ikujtsïkumenhaspka, Israelicheri arhujtateska, Benjaminiri sïrukua; ebreueska ka juramukua jimbo fariseuespka 6xáni ikiani, juramukuani kuájpekuekani, tángorherichani andanguani káska ataani; ka juramukua jimbo nómbe ma arhikua jukaspka jimbokani kurhandirakusïrempka. 7Ka imani ambe engani ji jukaparhakua eratempka urhetku, iásï Jesukristuni jimbo jurajkuskia iámu ambe 8ka iásï sanderuia, sési xentaparini; ji nósani jukaparharasïnga Krístu Jesusi jinguni jucheti Tate, engani jimbo iámendu ambe tsîtaka, ka iámu ambe k'uanikuska, ka Krístu Jesusini andakorheska, 9ka engani imani jinguni járhajkia; no jucheti sési jángua jimboesti, enga juramukuarhu arhijka, Krístuni mintsikani ka jakajkuparini jimbuesti, enga Diósï jimbo jurhajka, jakajkukua jimbo mintsikaparini. 10Krístunisïni ueéjka míteni, ka tsíntskua imeri uinhapekua p'ikuarherani, ka imeni nósesi p'ikuarherani ka eskajtuni imeni uándikunhapiringa, 11nandikani jíjtuni antajkorhiakia tsítanhantani.
Auandarhu anapueni
12Ka íni jinguni no arhixaka, eskani sési jáxentaskia ka eskani iámu ambe íntsïnhaskia, jínisïni jángorhentani jaka urhepani uérani, nándikani andajkorhiaka niarani andanguni, jimborinisï Tata Jesukristu p'ímutantati. 13Erachicha, nóchkani arhixaka eskani úskia niarani. K'óru engani úni jaka: Ióntki anapu ambe mirikurhixakaia ka jángorhentaxaka urhepani uerani. 14Uinhamuchkasïni nirani jaka andakuarhu niárani, ka íntsimperata p'irani engarini Diósï auandarhu uératini uandajpaka Tata Jesukristuni jimbo.
15Ka Jucha, engachi sáani míakua jukarikia, ísïchisi jatsika jamani, ka enkajtsï ambe ménderueni p'ikuarhenhejka, imechantu Diósï sési jánhastauti. 16K'óru, játsiskachi ísï irekani eskachi na jánhaskakia, ka ju je chúngumani sánderu jánhaskapani.
Juchachï auandarhu anapueska
17Erachicha, chájtu méntkueni jáma je, eskani ji, ka exea je imechani engaksï ísï irekaka, eskachi jucha na irekaka. 18Jimbokaksïni mémechani uéntaspkia arhini, ka ménderuksïni uéparini arhixaka, eskajtsï uánekua ísï irekaska enakijtsï ikiajki exeni Krístueri chaparhatakuani, 19indeksï tsînchekuarhu ísï niraxati, indeksï parhakpenirhu anapu ambejkusï tsítijti, Diósïnksï indeni ambe jimbo mójtakuxati ka ísïksï jámani k'éramakorhesïndi, jiniksïsï k'uratsekua jukapirindi ka nóksï parhakpeni anapu ambejku eratseni. 20K'óruchi jucha auandarhu anapueska, ka erokaxakachi eska jini uératini júuaka P'imutantspiri Acha Jesukristu, 21ka sési jájkuntaati juchari nósesi jasï anhanhatakuechani, eska ima na sési jáxeka, ka imeri uinhapekua jinguni júati enga iámendu ambeni juramukuaka.
Currently Selected:
Filipenses 3: DKPJ
Highlight
Share
Copy
Want to have your highlights saved across all your devices? Sign up or sign in
Biblia en P´urhépecha, Michoacán, México © Sociedad Bíblica de México, A.C.